Read Khiamniungan Naga Haove 15 Bible Online

Haove 15 - Khiamniungan Naga bible

Haove 15

¹APAOU nou Mosa hau

²athalotaiutsün goumchi nai kankeiao Israelhai thaiutha ngio- khem yam nouso kium.

³APAOU hau ajahtsün chaithio kiunai Jangtso- pong tsak, onnemok apong tsak, onnemok tsak, tsüdekünai won tsak ta kiuao shio-e tsüdekünai ngiomong shinge thawaotsün tsakli, amongchio chaithio tsakli, asam don sümai nai thiotsün tsakli, nung angannyam chihsikhiam chaithio nousoüh APAOU mong lengi-e.

⁴Sauhaiüh APAOU hau ajahtsün chaithio au onnemok tsak tsüdekünai won tsak thio-e, thainian pungkü ko wonne tsoi tsak nouko Olip khiam tsoi tsak ta chih chaithio tsakli theng tsoi tsak nouko hakü kiu-ela.

⁶Tilai onnemok apong chaithio thio-e, tsak ko wonne tsoi nime lao-ekü naiuso Olip khiam tsoi apaitso,

⁷tsak ko hoi-e naiuso theng tsoi apaitso ta thioau noin. Nung chaithio angannyam nousoüh APAOU monglengiji.

⁸Tilai jangtsopong tsak ajahtsün chaithioli APAOU hau thio-e, tsüdekünai ngiomong shinge tsak thawaotsün aloat chaithio tsakli thio-e, tsüdekünai aalo chaithio tsakli thio-e,

⁹chih chaithio tsak wonne lao-ekü tsoi püle nouko Olip khiam tsoi nime ta

¹⁰theng tsoi nime nouko aikü thio-ela. Nung angan nyamtsün aloat chaithio nou APAOU monglengiji.

¹¹Nungti jangtsopong pungkü, onnemok apong pungkü, onnemoktso pungkü, tsüdekünai won pungkü thaiutha chaithio thio-ela.

¹²Tilai thainian tsak khengai chaithio thio-e, nungko hoi-ekü chaithio thiohatsün lüko lilukü waokü thioha ao noin.

¹³Israel paopong pungkü nou tilai apaüh chih chaithio thio-e, angannyam nou APAOU monglengi- tsün chhi nou chhi-ela.

¹⁴Naiuso titaoko lünou melemaohai asam ongko kiha nai, asaita hau si lohaulu kiha lüko, chih chaithio tsak shantsün angannyam nou APAOU monglengikü shan naito, apaüh lüko don yam ngiokhem nouso wekü kan- keiao noin.

¹⁵Atao pungkü thaiutha nung ngiokhem wekü noulu asam tü naiuso melemao asam ongko kiha nouso tü kekü noi-e. Asam naiuso ngüso APAOU khako wekülu noin;

¹⁶nung ngiokhemlu ngüso naiuso asam tü wekülu kankei-e.

¹⁷APAOU nou Mosa hau

¹⁸apaüh thalotaiutsün goumchi nai kankeiao Israelhai thaiutha ngiokhem yam nouso kium.

¹⁹Tilai asamüh nungai sungtsün tso he-e haoson ajantso mothikü APAOU hau kiutsün ta chosankü wanao noin.

²⁰Tilai asamüh themtsai tsai-e, ayating tsaitsün tshemjai ayan chihsikhiam ainou APAOU hau amothi chaithio tsak thioao noin.

²¹Ashiao tao chikü thaiutha asamüh tsaitsün themtsai ainou nung APAOU hau amothi paopei kiuao noin.

²²Athalu nai, khaiunia ajantsoüh APAOU nou Mosa hau kiutsün don yam ngiokhem nouso kankeiao mongdem tsüdekü phiowan nai,

²³Naiuso ashiao taoko hoikam athum nou APAOU nou Mosa tsangkü thoiluttsün alum chhiao nou phiowan nai,

²⁴nung aphio nou hoikam athum tsüngetsün tsangkü naito, ngüsoüh APAOU monglengitsün angannyam nyamkü, chih chaithio naiuso theng chaithioko hakü jangtsopong tsak ajahtsün chaithio thioao noin.Aphop nou, ngüsoüh angei chaithio wonpong tsak thioao noin.

²⁵Meson nou hoikam thaiutha alosang amkham kiuao noin, küta ngüso hau wankiu-e, tiautenai nung aphio nou mongdem tsüde naiuso ngüsoüh APAOU tü eheshiu chaithio tsakli ngüso angei chaithio kankü shin.

²⁶Israel hoikam athum naiuso ngüso ongko kihatsün melemao nouso hau wankiu-e, tiautenai khaiunia pungkü nung aphio chhisiya nai hakü noiküla.

²⁷Mongdem tsüdekü tengkhaiu nou angei sunhe nai, apaüh won sangtso pon tsak shelokü noitsün angei chaithioli thio-ela.

²⁸Meson nou amthang nai nung khaiunia apa angei ainou losioao alosio amkham shanela, naiuso apa angei wankiu-e.

²⁹Israel paopong lüko tsüdekünai melemao kihakü thalüko sauhaiüh mongdem tsüdekü angei sunheji, nungso thako nung don yam ngiokhem nouso tsaklu kankeiao noin.

³⁰Lüko khaiunia ajantso paopung- hoi ongko lüko naiuso melemaohai ongko lüko sauüh ngengekü angei sunheji, küta APAOU tsüvesankü kankei-iu, apa to loatkü wanao noin.

³¹Tiautenai apaüh APAOU nou ngiokhem tsülokü apaüh thoiluttsün tsak mongdem lothean. Apa eantsün nung apa tengkhaiu thsale noin.

³²Atao tsak ko tilai Israelhai liutsa nai noiküla, khaiunia tsak chinyatnyi nouko pai lokü noitsün epsan.

³³Apa Mosa si Aron ne naiuso hoikam athum dongai nialokü khu,

³⁴naiuso ehükü noiküla. Tiautenai apa tü ti chhi-e nung tsütsangsheikü noiküla.

³⁵Nungai APAOU nou Mosa tü ngiom, “Nung khaiunia nou loatkü wanao noin; hoikam athum nou apa asaothang bechiai lung nou yakkat ao noin.”

³⁶Nungtiphe APAOU nou thoiluttsünli hoikam athum nou apa bechiai nialokü khuküta lung nou yakkatkü wan.

³⁷APAOU nou Mosa tü

³⁸Israelhai tü ngioau thoilut: “Asam nepat athun nouso ai ewoi nou chankü lülolut naiuso nung ewoi chankü nou pungkü tü aochan asangnya leng lülolut. Asamüh nung ashiao noitsün atao apem thaiutha chhiao noin.

³⁹Nung ewoi chankü loluttsün nou ayangsani ao tsak noi-e, naiuso atao pungkü asamüh nungso epnai, Ngü thoiluttsün apem yangsane küta kankei-e; naito asam Ngü ainou asamüh aiutsün naiuso chinektsün nai laokü tsükhu-e.

⁴⁰Nung ewoi chankü loluttsün nou jü athoilut apem kankeiao asam hau yangsani-e, naiuso asam thumkü jü haoson noi-e.

⁴¹Ngo APAOU, asam Goa noin, Ngo asam Ijip ainou asam Goa theao niasan. Ngo APAOU nou noin.”