Read Khiamniungan Naga Haove 16 Bible Online

Haove 16 - Khiamniungan Naga bible

Haove 16

¹Levihai Kohat kau ainou Izhar thso Koraüh Mosa ahei thako khengshi. Apa ko Reuben kau ainou Eliab thso Datan naiuso Abiram, naiuso Pelet thso On naiuso amao Israelhai mepem 250 hoi tsangkü chosantsün aheihoi nou niakü Mosa ahei thako khengshikü tsalo.

³Ngüso Mosa si Aron ne khako kamshi küta ngüne tü ngiom, “Asam thatü thsüokü khu-iu! Hoikam mepem apem APAOU haoson noin, naiuso APAOU nou sam ko asaita noin. Naito, Mosa, ni tiau APAOU hoi- kam khengai achija ashe shanloji?”

⁴Tilai Mosaüh nung ngio lula, apa chija gohai loikü ta misao sao.

⁵Nungai apaüh Kora naiuso apako hatsün hoiso tü ngiom, “Lühom ahom APAOU nou apa ko sauhai hakü noin nung sam tü hane; apako hakü noitsünso, apaüh chosantsünso amthang nai apa khako shi-e.

⁶Lühom ahom ni naiuso niko hatsünsoüh sonlak nai inthio nou thiokü, loüh nung chiai angannyamtsün lolutkü, nung amthang nai kankü lükhu. Nungai samüh APAOU nou chosantsün sübao nou noin nung eppe. Asam Levihai thatü thsüokü khuwantsün tsak noin!”

⁷

⁸Mosaüh Kora tü tsülaokü chite. “Asam Levihai, anglu!

⁹Asam apa khako shiao shiokü hao, APAOU Nejenkhio nai asam ayathsüotsün chhi chhiao, naiuso hoikam nouso yathsüotsün chhiao hoikam thum ainou Israel Goa nou asam mothikü shingsan taiutsün nung chhi ehentso ta asamüh yangji süne?

¹⁰Ni naiuso amao Levihai apem nou nung asuhat taim naiuso loüh asamüh meson chhisiya lüko loha ao koweji!

¹¹Tilai asamüh Aron thako namnam, nung ni naiuso ahoisoüh khengshitsün atsüoting APAOU thako noin.”

¹²Nungai Mosaüh Datan naiuso Abiram ne jonao hong, lüko ngüsoüh ngiom, “Sam tsüshi-e!

¹³Ni sam Ijip gohtsa goumchi ainou sam nung liutsa nai loatao niasantsün nou tsüsaiu süne! Ni loüh sam khako APAOU theshi-e süne!

¹⁴Loüh ni nyaokhiam naiuso liukhiam tsangkü noitsün goumchi ai sam nialokü tsüshi, tsüdekünai sam hau eiu tsüdekünai eiu tengkam kamao tsükiu, naiuso ni lo sam kausaiat ao koweji.Sam tsüsunge!”

¹⁵Mosa mongmat sungkü APAOU tü ngiom, “Nungsoüh kankü shitsün chaithio titso lalo. Ngo ngüso thako sau tü tsümeikü tsüchhi; naiuso ngo ngüso gado tsaktso tsülo.”

¹⁶Mosaüh Kora tü ngiom, “Lühom ni naiuso niko hatsün khaiunia 250 nouso titilünou APAOU Nejenkhio nai shiao noin, Aron lüko nungko noi-e.

¹⁷Asam khaiunia pungkü nou sonlak nai angan nyamtsün thiokü alo, küta nung amthang nai kiuwane.”

¹⁸Nungtiphe ngüso khaiunia pungkü nou meshen sonlak lo, nungko inthio naiuso angan nyamtsün thio, naiuso Nejenkhio bekhan nai Mosa si Aron neko hakü tsakü noiküla.

¹⁹Nungai Koraüh hoikam thum kamshi-in, naiuso ngüso Nejenkhio bekhan nai Mosa si Aron netü kha seilutkü tsakü noiküla. Alekta hoikam athum khako APAOU hatsün ajinka awon nou thsalut kü sungh,

²⁰nungai APAOU nou Mosa si Aron netü ngiom,

²¹“Nung khaiunia nouso ainou soikü tsakü anoi, küta ngo ngüso loting mowani-e.”

²²Lüko Mosa si Aron neüh ngüne kha gohai kauthio küta ngiom, “O Goa, ni khaiuniathso aa apem chet- santsün noin. Tilai khaiunia tsaküh angei sunhe-e, nungai nung hoikam athum tü ni mongmat sunge süne?”

²³APAOU nou Mosa tü ngiom,

²⁴“Khaiuniahoi nou tü Kora si Datan naiuso Abiram so nejenkhio dongko nou asoian ta lüngio.”

²⁵Nungai Mosa Israel ahei hoi nouso hakü Datan naiuso Abiram dongai khu.

²⁶Apaüh khaiuniahoi nou tü ngiom, “Nung akausai khaiuniahoi nejenkhio ainou soikü atsa naiuso jengtsaiu titatso lathantan. Thantan naito, asam lüko ngüso angei shioko ngüso ko aikü moisemkü mowane.”

²⁷Nungtiphe ngüso Kora si Datan naiuso Abiram so nejenkhio ainou soikü khuwan. Datan si Abiram ne ngüne tsam- mongnyiu naiuso thsoso hakü ngüso nejenkhio bekhan dongko kingchiai shiküta tsakü noi.

²⁸Mosaüh khaiuniahoi nou tü ngiom, “Nung chhisiya apem ngo jüchija cholotsün tsüde, lüko APAOU nou hong ta asamüh nge-e.

²⁹Nung khaiunia nouso Goa ainou tso angja tsühakü elun e naito, naito, APAOU nou ngü tsühong.

³⁰Lüko tsüludekü nou chhisiya APAOU nou ajantso chhi nai, naiuso goh nou pai an küta ngüso ko ngüsoüh taiutsün apem hakü miolian nai, küta ngüso eantsün goumchi nai aa napan nai, asamüh nung khaiuniahoi nou APAOU nou tsüthalokü nanan ta ngela-e.”

³¹Apa ngio chitekhem kü thunkü, Datan naiuso Abiram thakü goh nou pai an

³²küta ngüso tsammongso Kora hoiko ngüso tengkam apem mioliküwan.

³³Nungtiphe ngüso eantsün goumchi nai ngüso tengkam hakü aa noikü napan. Goh nou ngüso khütha nai waokü shikü nungko ngüso mowan.

³⁴Israel hai nungko noitsünsoüh tilai ngüso shaptsün lula, ngüso hatatkü khuwan.Nungai ngüsoüh lüko nungti wekü ngiom, “Lükhaolao! Goum nou sam lüko mioliane.”

³⁵Nungai APAOU ainou in tsak hongkü angannyam chaithio kiutsün khaiunia 250 nouso apem chethean.

³⁶Nungai APAOU nou Mosa tü ngiom,

³⁷“Meson Aron thso Eleazar tü achetheantsün khaiuniahoi ainou taoson lung lakpai ainou apoitaiu nouso naiuso inthio nouso loküta nung lusokpeng ta lüngio, tiautenai nung inthio nouso asio noin.

³⁸Tilai ngüsoüh nung APAOU amthang nai thio, nungai nung asio iula. Nung- tiphe sauhai mowankü noin nung khaiunia nouso sonlak ngüso angei thaiuthako alo, küta nungüh chio matchaikü ashan shi, naiuso nung amthang thaiutha akapjeiao athe. Nung Israel khaiunia thaiutha alotsüoau tsak noi-e.”

³⁹Nungtiphe meson Eleazarüh sonlak nou loküta nelangkü thiopek naiuso nungüh chio amatchai tsak shan, nung amthang kapjeitsün akap tsak noiküla.

⁴⁰Aron thsoso tsüdekünaito, amthang nai angan nyamtsün jahkü amkham kiuao sau tsüshi-e ta Israel hai thaiutha alotsüo tsak noiküla. Meson kau ainou tsüdekü shinaito, apa lüko Kora ko apa khaiuniaso hakü lomowantsün khekkü mowane. Nung chhisiya apem APAOU nou Mosa tsangkü Eleazar tü thoiluttsünli, chhikü noiküla.

⁴¹Nungthan ajekhaiu hoikam athum nou Mosa si Aron ne tü namnamkü ngiom, “Asamüh APAOU khaiunia ajantso loataniu.”

⁴²Mosa naiuso Aron tü khengshiao ngüso apem kamshikü phiai ngüso kha Nejenkhio dongai sheishi nai nung thengmia nou loijei kü ep, küta APAOU hatsün ajinka awon nou sungh!.

⁴³Nungai Mosa si Aron ne khukü Nejenkhio khako tsakü noiküla,

⁴⁴naiuso APAOU nou Mosa tü ngiom,

⁴⁵“nung khaiunia nouso ainou phiai soikü atsa, naiuso ngo ngüso nungkolu lomowane!” Nung ngio lula nai Mosa si Aron ne nemthso kha gohai thaothiokü kaukü nap,

⁴⁶naiuso Mosaüh Aron tü ngiom, “Asonlak lülo, amthang ainou nungko inthio nou lüthio, naiuso inthio chiai angan nyamkü jahtsün intso lülolut. Küta nung lokü ngüso thaiutha alosio amkham kiuao liukü lükhu, tiautenai imkia tsak nou tsalowaniu.”

⁴⁷Aronüh angiotsün angkü, apa sonlak loküta khaiuniahoi kamshikü noitsün mongai kopkü nap. Tilai apaüh imkia nou yalowankü ep, apaüh inthio chinai angannyam jah- tsün lolut küta khaiuniahoi thaiutha alosio amkham shan.

⁴⁸Nung chhi nou imkia lolao, naiuso apa e si aa jetko tsakü noi.

⁴⁹Koraüh kheng- shitsün taoko eantsünso tsüwehakü, khaiuniahoi eantsün haove apem kamko nai 14, 700 noiküla.

⁵⁰Tilai imkia nou laolo, Aron Nejenkhio bekhan nai Mosa dongai laokü shi.