Read Khiamniungan Naga Haove 17 Bible Online

Haove 17 - Khiamniungan Naga bible

Haove 17

¹APAOU nou Mosa tü ngiom,

²“Israelhai kau pungkü ahei tsak tsak ainou Pailai chekü nime ni hau akiu ta lüngio. Khaiunia pungkü nian apa pailai tü lüsatlut

³naiuso Pailai nou tü Levi kau liko Aron nian lüsat. Kau ahei pungkü thaiutha Pailai tsak tsak noi-e.

⁴Nungso Ngü noitsün Nejenkhio nai kankü lükhu, küta tilai ngo niko epeji nung Athalou-e Paidan khako lütaiu.

⁵Nungai Ngo chosantsün khaiunia nou Pailai da asun nyimsane. Nungti ngo asam thako Israel haiüh asaita namnamtsün lolaoao nung thio-e.”

⁶Nungti Mosaüh Israelhai hau chite, naiuso kau pungkü aheihoi nou apa hau Pailai tsak tsak kiu, nung kau pungkü Pailai tsak tsak, apem nai Pailai chekü nime, naiuso Aron Pailai lüko nungko taiuha.

⁷Nungai Mosaüh nung Pailai nouso apem Nejenkhio nai APAOU Athalou-e Paidan khako taiukiu.

⁸Nungthan ajekhaiu nai, tilai Mosa Nejenkhio nai nap, apaüh Levi kau liko taiutsün Aron Pailai tü asun sungankü ep. Ajong nou poku, apun nou punkü, naiuso almond shep semankü eiusankü ep!

⁹Mosaüh Pailai apem lokü Israelhai hau han, nungko ngüsoüh ti shithawao nung ep, naiuso ahei pungkü nou meshen Pailai laokü lo.

¹⁰APAOU nou Mosa tü ngiom, “Aron Pailai Athalou-e Paidan khako laokü lületaiu. Nung Israelhai ngüso akhengshi nou tsülaokülu naito, ngüso eane ta akhengshitsünso lotsüoao tsak taiukü noin.”

¹¹Mosaüh APAOU nou thoiluttsünli chhikü noiküla.

¹²Israel haiüh Mosa tü ngiom, “Naito, sam thaiutha nungko yang- külu athunan!

¹³Nejenkhio shimkü khaiunia ajantso shi nai, eane tünaito, nungaito sam apem amowanhai tübao meitsokü noi-e!”