Read Khiamniungan Naga Haove 19 Bible Online

Haove 19 - Khiamniungan Naga bible

Haove 19

¹APAOU nou Mosa naiuso Aron

²netü Israelhai hau ayamhan ajantso kiuao thoilutkü ngiom. Mosa naiuso Aron dongai jangtso aleng aseng ti aleng ii tsüpokü naiuso tilaitso chhisiya nai tsükankeikü nou tsak kankü ashi,

³küta nung ngüsoüh meson Eleazar hau kiu-e. Nung asaothang bechiai kankü khuküta apa khako lüloat.

⁴Nungai Eleazarüh nung she ajantso lokü apa phakha nou Nejenkhio dongai kha- seikü chinyat jam satpenge.

⁵Nung thainian athum, akhun, anyih, ashe, naiuso asaih nouso meson khako in nai jahwanao noin.

⁶Küta apaüh cedar pai, hisop pai, ajantso naiuso aseng aochan tsak loküta nungso in nai yakthio-e.

⁷Nungphiai apaüh apa neshe so phetankü hau noin naiuso nungtü khiam nou thsalute, küta lu apa asaothang nai napao shio-e, lüko apa asham saokü amkham khako tsüyanthsüokü noi-e.

⁸Khaiunia sauüh jangtso nou jahwanji apaüh lüko apa neshe phetan au noin naiuso apa chija khiam nou apa tü thsalut ao noin, apa lüko asham saokü to tsüyanthsüokü nai noi-e.

⁹Nungai khaiunia sau amkham yamko yanthsüokü noin apaüh nung jangtso mut nou kamloküta asaothang bechiai amkham yamko siokü noitsün athang nai nungso wan, nung ngüsoüh hoikam thum thaiutha amkham yamko tsüyanthsüokün tsaowanao khemlotsün noin.

¹⁰Khaiunia sauüh jangtso mut kamsan, apaüh apa neshe phetanao noin, lüko apa asham saokü tsüyanthsüokü nai noi-e. Nung ngiokhem nouso Israelhai thaiutha naiuso melemao sauhai ngüso ongko kihkü noin nunghoi nemtso thaiutha ashiao noitsün atao apem thaiutha oukong mongkü noin.

¹¹Sauhaiüh meadang nou tü thantane apa amkham yamko ajekhaiu chinyatnyi tsüyanthsüokü noi-e.

¹²Apaüh apa chija alosiotsün khiam nou ajekhaiu samnyi nouko naiuso chinyatnyi nouko losioloau noin, nungphiai lu apa yanthsüokü noi-e. Lüko apaüh ajekhaiu samnyi nouko tsüdekünai chinyatnyi nouko chija tsülosiolo naito, apa tsüsio-e.

¹³Sauhaiüh meadang nou tü thantan naiuso apa chija tsülosiolo, nung tsüsiokü noi-e; tiautenai alosioau thaiutha khiam nou apa tü mothsalut. Apaüh APAOU Nejenkhio lochinyanji, naiuso loto apa Goa khaiunia ongko mepem tsak ta tsüwesane.

¹⁴Khaiunia ajantso nejenkhio mongai eannai, saulünou eantsün taoko nungko noikü latha-e tsüdekünai nung taoko nung tsamai napji, nung amkham yamai ajekhaiu chinyatnyi thaiutha tsüsiokü iulaji.

¹⁵Chiosilak naiuso meng nejenkhio mongai akap tsüpokü nouso apem tsüsiokü iulaji.

¹⁶Khaiunia ajantsoüh tsamai tsü- dekü bechiai eantsün naiuso loattsün meadang nou tü thantan nai, tsüdekünai khaiunia oukeng naiuso meakhan thang tsak tü thantan nai, apa ajekhaiu chinyatnyi thaiutha tsüsiokü iulaji.

¹⁷Tsüsiokü nou lowanau thaiutha, jang seng sübao jahkü noin nung ainou amut nou lo-e küta lak tsak ko thio-e, naiuso nung tü khiam sang nou hoilute.

¹⁸Khaiunia sau losio lokü noin, chongting nouko hisop pai tsak loküta khiam nai chamthio kiuküta nejenkhio nou tü, nungai taiutsün jengtsaiu alum tü, naiuso khaiunia sauhai nungai noin nungso tü satlute.Müjam nai sau losiolokü noin apaüh khaiunia oukeng tü thantantsün tsüdekünai meadang nou tü thantantsün naiuso meakhan thang nou tü thantantsünso ta satlute.

¹⁹Samnyi nouko naiuso chinyatnyi nouko khaiunia sau losiolokü noin apaüh molosiokün khaiunia tü khiam nou satlute. Chinyatnyi nouko apaüh khaiunia nou losio au noin. Sauüh meshen neshe phetan naiuso apa chija khiam nou chalutloji, apa ajenap taoko losiokü iulaji.

²⁰Khaiunia ajantso amkham yamko tsüsiokü iula nai, naiuso apa chija tsülosiolo nai, apa tsüsiokülu noi-e, tiautenai alosio ao nou khiam apa da mothsalut. Apaüh APAOU Nejenkhio lochinyanji naiuso loto apa APAOU khaiuniahoi ongko mepem tsak ta tsüwesanshi-e.

²¹Asamüh nung ngiokhem ashiao noitsün atao apem nouko kankeiao noin.Khaiunia sauüh khiam nou tü thantane, apa asham tü thalut kü tsüsiokü noi-e.

²²Tilüsong tü tsüsiokün khaiunia nou thantanji nung tsüsio, naiuso khaiunia sauüh nung tü thantanji nung asham tü thalutkü tsüsiokü noi-e.