Read Khiamniungan Naga Haove 20 Bible Online

Haove 20 - Khiamniungan Naga bible

Haove 20

¹Chongting alei ve nouko nai Israel hoithum Zin liutsa nai shisao naiuso Kades nai ngüso asaothang shankü noi. Miriam nungai ean küta khanan.

²Ngüso saothang nouko khiam tsünoiküla, nungtiphe khaiuniahoi nou Mosa naiuso Aron ne lemkü kamshi,

³küta namnamkü ngiom, “APAOU Nejenkhio khako sam deisinioso ean taoko sam lüko eanha naibao chenela.

⁴Sam thainianso ko nungai eanao lümeikü asamüh sam nung liutsa nai tiauta nialokü shin?

⁵Ti sungao tsünoi, aalo tsünoikün nung athangai taiuao asamüh tiauta sam Ijip ainou nialokü shin? Nungai chih tsünoi, phioshep tsünoi, sainaoshep, tsünoi, sasashep tsünoi. Nungai khiam ashiuao lüko tsünoi!”

⁶Mosa naiuso Aron ne khaiuniahoi ainou soikü khukü Nejenkhio bekhan dongko tsakü noi. Ngüneüh ngüne kha gohai kauthio, naiuso APAOU hatsün ajinka awon ngüso khütha nai sungh.

⁷APAOU nou Mosa tü ngiom,

⁸“Athalou-e Paidan khako taiu nou Pailai lülo, küta ni naiuso Aron ajeüh khaiunia hoikam athum akamshi-i. Ngüso khako nung lung ainou khiam sungi-ao apemüh achite. Nungli asamüh khaiuniahoi thaiutha lung ainou khiam achet- sani, nung ngüso si thainian nousoüh shiu-e.”

⁹APAOU nou thoiluttsünli, Mosa khukü nung Pailai lo.

¹⁰Mosa si Aron neüh hoikam athum nung lung khako kamshi-i, küta Mosaüh ngiom, “Khengshikü tsalotsünso asam, anglu! Samüh asam thaiutha nung lung ainou khiam losane süne?”

¹¹Nungai Mosaüh Pailai loksan küta nung lung nou tü müjam shiuh, naiuso khiamngan sungkü nung lung ainou khiam shiuhshi, küta khaiunia chikü nou si thainian chikü nou nung khiam shiu.

¹²Lüko APAOU nou Mosa si Aron netü thsüokü thut. Apaüh ngiom, “Tititenai Israelhai khako jü oukong mitha kiuao asamüh amonglam saiukü tsütaiuphe, ngo ngüso hau kiuao thalotaiutsün goumchi nai asamüh ngüso nialokü tsünape.”

¹³Israel haiüh APAOU thako namnam naiuso APAOU nou ngüso hau apa asio nou han, nung Meriba nai thawaokü noiküla.

¹⁴Mosaüh Kades ainou Edom nokpao dongai ngiongem kantsünso hong. Ngüsoüh ngiom, “Nung ngiongem nou adeisinio Israel kau ainou noin. Sam angja omhetsün ni ngeji,

¹⁵sam pon piakü kihkü shitsün Ijip nai sam paosiposo titi khukü noiküla. Ijip haiüh sam paosiposo tü naiuso sam tü tsümeikü kankeikü shin,

¹⁶naiuso samüh APAOU tü ahachu saokü noiküla, nungai Apaüh samüh vetsün lulakü hongthon tsak hong, küta sam Ijip ainou niasan. Lo sam anokshing elungko noksong tsak nou Kades nai noin.

¹⁷Tsüojin- yangkü sam hau agoumchi yankü khuau yam asopkiu. Sam si sam tsam thainian nousoüh yam ainou tiai tsükhilükhune tsüdekünai asam eiu ai si sainaoshep eiu ai tsünape, naiuso samüh asam temkhao ainou khiam tsüshiu-e. Agoumchi elung moyankün lektso sam yamkheng mongailu tsakeikü khu-e.”

¹⁸Lüko Edom haiüh thalakü ngiom, “Samüh asam hau sam goumchi yanlükhuni-au sam tsümongchioji! Asamüh ayanlükhunao kowe naito, sam tsalokü asam tü po-e.”

¹⁹Israel haiüh ngiom, “Sam yamkheng mongkolu kei-e, naiuso nungko sam tsüdekünai sam thai- nian ajantsoüh asam khiam shiuwan naito, samüh nung thaiutha amai kiu-e samüh to yankü khuaulu aiuji.”

²⁰Edom haiüh tsülaokü ngioji, “Samüh asam yanlükhuniao tsümongchio!” nungai ngüso süpai akongting nouso Israelhai tü po-au tsalo.

²¹Edom haiüh Israelhai hau ngüso goumchi yankü tsükhu-i nou shioko Israelhai amao yam tsakai laokü khuwan.

²²Israelhai hoithum Kades ainou tsalokü khuküta Hor King shisao;

²³nung Edomhai elung ko noiküla. Nungko APAOU nou Aron si Mosa netü ngiom,

²⁴“Ngo Israel hau kiuao thaloutaiutsün goumchi nai Aron tsünapha-e; apa eanao noin, tiautenai aje nemtsoüh Meriba nai jü athoi- luttsün thako khengshin.

²⁵Aron naiuso apa thso Eleazar Hor King ai nialokü asungh,

²⁶küta nungai Aron meson neshe nou angiosan küta nungso Eleazar tü lütholut. Aron nungai eanao noin.”

²⁷Mosaüh APAOU nou apa tü ti thoilut nung chhikü noiküla. Ngüso Hor Kingai hoikam nou epkü sungkhuwan;

²⁸küta Mosaüh Aron meson neshe ngiosankü Eleazar tü tholut. Nung Kingson nai Aron ean, küta Mosa si Eleazar ne laokü saoshin.

²⁹Hoikam athum nou Aron eaniu ta ngela, küta ngüso apem apa thaiutha amongsaiu ajekhaiu aosamnyi noiküla.