Read Khiamniungan Naga Haove 21 Bible Online

Haove 21 - Khiamniungan Naga bible

Haove 21

¹Tilai ajepekki nai noi nou Kananhai nokpao Aradüh Israelhai Atharim yamai shiji ta lula, apa Israel thako ehli tsalo naiuso ajantso thalo.

²Nungai Israel haiüh APAOU tü ngiomong shinge tsak shankü ngiom, “Ni atsüoting nung khaiunia nouso sam phako thumkü kiu naito, samüh ngüso noknio nouso naiuso ngüso ni hau thumkü kiu-e küta ngüso moisemkü mowani-e.”

³APAOU nou ngüsoüh ngiotsün lulakü ngüso tü hachu küta Kanan hai shiolo. Nungtiphe Israel haiüh ngüso naiuso noknio nouso moisemkü lomowan, nung athang nou tü Horma ta jon.

⁴Edom goumchi komankü khuau nou shioko, Israelhai Hor King wankü khuküta Agaba ai khutsün yamai khu. Lüko yamai tsakei taoko khaiuniahoi mongau laiukü taiutsün thonan

⁵küta ngüso Goa naiuso Mosa thako namnamkü chite kü ngiom, “Nung liutsa tiai eheao tsüdekünai ashiuao khiam tsünoi nungko eaniau tiao ni sam Ijip ainou nialokü shin? Nung atheao tsünoikün chihsikhiam nou loto sam thatsüluwaniu!”

⁶Nungai APAOU nou khaiuniahoi ongai aliule suntsün pao nouso hong, naiuso Israelhai piakü tü nungüh haiu küta ean.

⁷Khaiuniahoi nou Mosa dongai shikü ngiom, “Tilai sam ni naiuso APAOU thako chite samüh angei sunhe-iu. Lo nung pao nouso kankü khuau APAOU tü misao asaokiu.” Nungtiphe Mosaüh khaiuniahoi thaiutha misao sao.

⁸Nungai APAOU nou Mosa tü son nou pao tsak shankü paiphu tsak da nung ataiu nungtiphe sauhai tü nung pao nou haiukü noin nungtü thapao shio-e naiuso meila-e ta ngiom.

⁹Nungtiphe Mosaüh taoson son nou pao tsak shanküta nung pai tsak chiai taiukiu. Khaiunia sauhai tü nung pao nou haiukü noin küta nung taoson son nou shantsün pao nou tü thap ngüso meila.

¹⁰Israelhai tsalokü khuküta Obot nai asaothang shan.

¹¹Nung athang wankü khuküta alotheantsün Abarim liutsa Moabhai goumchi ajepek nai asaothang shankü noi.

¹²Küta ngüso Zaret tsamei nai asaothang shankü noi.

¹³Nung athang ainou loüh ngüso tsalokü khuküta ajenapki Arnon Haiusai liutsa sübao Amorhai goumchi saokü noin nungko asao thang shankü noi. (Arnon Haiu nung Moabhai si Amorhai jetko elung noin).

¹⁴Nung shioko APAOU ün ehli Thsam nai nungti ngioji, “Waheb, Supha mongko, Arnon Haiu tsamei nouso,

¹⁵Ar noksong tü thalutkü noitsün tsamei nouso naiuso Moab elung dongai shinkü.”

¹⁶Nung athang ainou ngüso Temkhao nouso ta jontsün athang tsak ai khu, nungai APAOU nou Mosa tü ngiom, “Khaiuniahoi nouso aikü akamshi, küta Ngo ngüso hau khiam nou kiu-e.”

¹⁷Nung taoko Israel haiüh nung jih hang: “Temkhao nouso, khiam tsangkü achetsan, naiuso samüh monglingkü jih tsak hangkü nialo-e.

¹⁸Nokpao nousoüh thaiutsün temkhao naiuso aheihoi nousoüh thaiutsün temkhao, Nokpaohai chaiou lakkeng pailai nou thaiutsün naiuso ngüso pailaitsüo nou thaiutsün temkhao.” Ngüso liutsa ainou tsaloküta Matana ai khu;

¹⁹naiuso nung athang ainou ngüso Nahaliel ai khu, naiuso Nahaliel ainou Bamot ai khu,

²⁰naiuso Bamot ainou Moab tsamei nai noitsün goumchi sübao Pisga Kingson khemko singtso goh tü thapsantsün goh ai shin.

²¹Nungai Israel haiüh Amorhai nokpao Sihon dongai ngiongem kantsün hong.

²²“Sam hau agoumchi yankü akhu-i. Sam naiuso sam thai- nianhoiüh yamkheng nou tsüleane, naiuso asam eiu mongai tsünape, tsüdekünai sainaoshep eiu ai tsü- nape, naiuso samüh asam temkhao ainou khiam tsüshiu-e; samüh asam goumchi moyankün lektso sam yamkheng mongkolu tsakei-e.”

²³Lüko nokpao Sihonüh Israelhai hau apa goumchi yankü khu-iao ayam tsüsopkiu. Apaüh apa süpaihoi lokam küta Jahaz liutsa nai khukü Israelhai thako ehli tsalo.

²⁴Lüko Israel haiüh ehli nai ehoi piakü loatan, naiuso ngüso goumchi tsak nian Japbok tü ajenapki uai noitsün Arnon Haiu ainou Ammonhai saokü thalowan, tiautenai Ammonhai elung nung thatü kongkü noiküla.

²⁵Nungtiphe Israel haiüh Amorhai noknio Hesbon naiuso nung lemkü noitsün noksong nouso thalowan küta ngüso nungko kihlokü noiküla.

²⁶Hesbon nung Amor nokpao Sihon sauüh aya Moab nokpao thako ehliküta Arnon Haiu saokü apa goumchi apem thalowan, nung apa nokshing nouko ateng noknio tsak noiküla.

²⁷Nung shioko athatlu ngio ngiotsünsoüh ngioji, “Nokpao Sihon ün noknio Hesbon nai ashi! Samüh nung alothean nou lashanshikü naiuso shanshikü epao aiuji.

²⁸Ataojam nung Hesbon noknio ainou Sihon süpaihoi in khekkü khaai khukü noiküla; nungüh Moab nai Ar noknio lothean naiuso Arnon ha king nouso miolikü wan.

²⁹O Moab, athaiutha inyate! Asam Kemos amkhamtsünso lotheao shisao-iu! Asam goaüh khaiuniahoi tsam tsühakü iula-ikü noin, Naiuso menyiuhoi Amor nokpao sua iula-iu.

³⁰Hesbon ainou Dihon saokü Nashim ainou Nopha Medeba saokü, lo ngüso thsaosithsoso apem lotheaniu.”

³¹Nungtiphe Israelhai Amor hai goumchi nai noi,

³²naiuso Jazer noknio komanao yam ameiting epsanao Mosaüh khaiuniahoi hong. Israel haiüh nung thaloküta nung lemkü noitsün noksong nouso naiuso nungai kihtsün Amorhai koman.

³³Nungai Israelhai laokü shiküta Bashan nai khutsün yamai khu; naiuso Bashan nokpao Og apa süpai hoisoko tsalokü Edrei nai ngüso komheao khu.

³⁴APAOU nou Mosa tü ngiom, “Apa lün hatkü lanoi, Ngo apa khako, apa khaiunia apem khako naiuso apa goumchi khako ni hau ashio nou kiu-e. Amor nokpao Sihon sau Hesbon nai nokshingkü noiküla ni apa tü chhikü shitsün lilu apa tü lüko lüchhi.”

³⁵Nungtiphe Israel haiüh Bashan nokpao Og, apa thsoso, naiuso apa khaiuniaso apem sau tsüpoishikü loatan, küta ngüsoüh apa goumchi thalowan.