Read Khiamniungan Naga Haove 22 Bible Online

Haove 22 - Khiamniungan Naga bible

Haove 22

¹Israelhai tsalokü khuküta Yeriko tü lalutkü noitsün ajepek Yordan nai Moab Tsamei nousoko nejenkhio lahkü noi.

²Tilai Moab nokpao Zippor thso Balaküh Israel haiüh Amorhai tü ti chhin, naiuso nungai Israelhai khaiunia titso noiküla nung lula,

³nungai apa naiuso apa khaiuniaso apem hattat.

⁴Moab haiüh Midian aheihoi nouso tü ngiom, “Jangtso- pong nou khenglio thsanyan hean- tsün khekkü, nung hoi asong nou sam lemkü alum shakta lotheane.”

⁵Nungtiphe Balak nokpaoüh Peor thso Balam sau Eufrates Haiu shimkü Amaw goumchi nai noiküla apa dongai ngiongem kantsünso hong. Ngüsoüh apa dongai Balak ainou ngiongem nung kankü shin: “Mele tsak athum Ijip ainou shikü nung khaiunia nouso alumai peng- küta sam goumchi lowanao lohatkü kankeiji ta ngo ni hau nge-iao aiuji.

⁶Ngüso mepem haove nou sam khengai noin, nungtiphe tsüojin- yangkü ashi küta jü thaiutha ngüso khako athesan tsak ataiukiu. Naito tsüngean, samüh ngüso sam goumchi ainou komankü shiolo-e sao. Tilai ni khaiuniahoi tü ouk velute, khaiunia nouso ouk kiuji, naiuso tilai ni athesan velute ngüso athesan khemai noiji ta ngo ngeji.”

⁷Nungtiphe Moabhai naiuso Midianhai aheihoi nou athesan kiutsün thaiutha athamao amai lokü Balam dongai khu, küta apa hau Balak ainou ngiongem nge-in.

⁸Balamüh ngüso tü ngiom, “Lüsoh nungai anoian, küta APAOU nou ngü tü tilüsong ngio-e ngo nung asam tü lühom ngio kiu-e.” Nungtiphe Moabhai aheihoi nouso Balam ko shaman.

⁹Goa nou Balam dongai shiküta sang, “Niko noihatsün nung khaiunia nouso sauhai?”

¹⁰Apaüh thalakü ngiom, “Moab nokpao Balaküh ngüso ngü hao chiteao hong-

¹¹nung Ijip ainou shitsün khaiuniahoi nou nung goumchi meankü khu-iu. Apaüh ngüsoko ehli küta apa goumchi ainou ngüso koman ao apa thaiutha ngü ngüso thako athesan kiuao aiuji.”

¹²Goa nou Balam tü ngiom, “Nung khaiunia nouso ko lakhuha, naiuso Israel thako athesan nou lakiu, tiautenai ngüso tü jü ouk noin.”

¹³Nungthan nyap nai Balam ngiongem kantsünso dongai khukü ngiom, “Asam tsamai laokü lükhu; APAOU nou ngü asam ko khuha-iao tsümongchio.”

¹⁴Nungtiphe ngüso Balak dongai laokü shiküta Balam ngüso ko khuha ao tsümongchio ta chiten.

¹⁵Nungtiphe Balaküh chonghoi nouso ahei chiai phopkü loüh aheihoi asong atengting nouso hongshin.

¹⁶Ngüso Balam dongai khuküta apa hau Balak ainou nung ngiongem kium: “Tsüojinyangkü ni jüdongai shitsün ainou tiüh lalolao!

¹⁷Ngo ni hau amai meikü kiu-e, naiuso ni ti ngioji nung chhi-e. Tsüojinyangkü shiküta jü thaiutha ko nung khaiunia nouso athesan lükiu.”

¹⁸Lüko Balamüh thalakü ngiom, “Balaküh apa tsam ainou tangkason naiuso chaiou lakkeng ngü hao apem kiu lüko, ehentso chhisiya nai lüko jü APAOU Goaüh thoiluttsün ngo angio tsüangkü theao tsüshio.

¹⁹Lüko nung thaiuko amao nousoüh chhikü shitsünli, tsüojinyang kü lüsoh ashaman, nungaito ngü hao APAOU nou loüh chiteshiao noishi süne tsünoishi nung ngo ngela-e.”

²⁰Nungsoh nai Goa nou Balam dongai shiküta ngiom, “Nung kha- iunia nouso shikü ni tü ngüsoko khuha ao sang naito, akhuha ao lükhemlo, lüko ngo ni tü ti chite-e nunglu lüchhi.”

²¹Nungtiphe nung- than nyap nai Balam apa gado chiai moknoikü Moab ainou shitsün aheihoi nouso ko khuha.

²²Balam khutsün ko Goa mongmatkü noiküla, Balam apa gado chiai noikü apa tsamkei nimeüh lamthiokü khutsün taoko, APAOU hongthon nou apa khutsün kiapao yamko tsakü noiküla.

²³Tilai gado nou hongthon nou salaiu tsak semkü tsakü noitsün ep, apaüh nung yam leanküta eiu ai khuau kha phokle, Balamüh gado nou tü shiuh küta yamkheng nai nialokü shin.

²⁴Nungai sainaoshep eiu nime jetko yam atsotsan nai tisübao yamkok nemtso ai lungpe noiküla nungko hongthon nou tsakü noi.

²⁵Tilai gado nou nung hongthon nou ep, nungai lungpe nou dongai khukü nung lungpe nou Balam hok ai thio, nungtiphe Balamüh apa gado tü shiuh.

²⁶Loüh jam hongthon nou kha ai khuküta yankü khuao tsüshiokü noitsün aojen yam tsak ko apa tsakü noi.

²⁷Nung taoko gado nou hongthon ep nai apa saian. Nungai Balam mongmat sungkü apa gado tü pailai nou shiuh ao yalo.

²⁸Nungai APAOU nou gado hau ngiosingio ao oukong kiukü Balam tü ngiom, “Ngo ni tü ti chhikü noin? Ni nungühto samjam ngoikü ngü tü tiauta shiuhji?”

²⁹Balamüh thalakü ngiom, “Tiau- tenai ni ngo tsüvesan! Jüphako salaiu tsak taiukü thatünto, ngo ni loatela.”

³⁰Gado nou thalakü ngiom, “Ni aakihlaiu thumkü moknoitsün ngo nung gadolu tsüde süne? Nung khako ngo ni tü nungti kankeikü shin süne?” Apaüh “Tsüde,” ta thalan.

³¹Nungai APAOU nou Balam hau hongthon nou apa salaiu semkü tsakü noitsün epi; nungko Balam gohai kha thaothiokü loian.

³²Hongthon nou apa tü sang, “Tiauta ni agado tü samjam ngoikü shiuh keikü kankei? Ngo ayam kiapao thaiutha shin, tiautenai ni nung süme nou tsü-iu ao noin.

³³Lüko agadoüh ngü epküta samjam soikü noiküla. Nungti tsüdetünto ngo ni loatküta agado poi-ela.”

³⁴Balamüh thalakü ngiom, “Ngo angei nou sunhe-iu. Ni yamko ngo kiapao noin ta ngo tsüngekü noiküla, lüko lo, ngo khuau ayam tsünoi ta ni yang naito, ngo tsamai laokü shi-e.”

³⁵Lüko hongthon nou ngiom, “Nung khaiunia nousoko lükhuha, lüko ngo ni tü ti lüngio ta ngiom, nunglu lüngio.” Nungtiphe Balam ngüso ko aikü khuha.

³⁶Tilai Balaküh Balam shitsün lula, apa Moab elung Arnon Haiukok Ar noknio ko apako pheteao shin.

³⁷Balaküh apa tü ngiom, “Ngo adongai chongting hongtsün taoko ni tiauta tsüshi? Ngo ni hau paopei saiukü kiuao tsüshio-e ta ni yang süne?”

³⁸Balamüh thalakü ngiom, “Ngo shi-iu, ngo tsüshi süne? Lüko lo ngo ti oukong taim. Ngü tü Goa nou ti chiteao ngio-e, nunglu ngo chiteao shio-e.”

³⁹Nungtiphe Balam, Balak ko Huzod noksongai khu,

⁴⁰Nungai Balaküh jangtso naiuso onnemok loatküta Balam naiuso apa ko hakü noitsün aheihoi hau eheao nyih ajantso kium.

⁴¹Nungthan nyap Balaküh Balam Israelhai apaitso epao shiokü noitsün Bamot Baal nai nialokü sungh.