Read Khiamniungan Naga Haove 23 Bible Online

Haove 23 - Khiamniungan Naga bible

Haove 23

¹Apaüh Balak tü ngiom, “Jü thaiutha nungko amthang chinyat ashan naiuso jüdongai jangtsopong chinyat naiuso onnemokpong chinyat kankü ashi.”

²Balaküh apa tü ngiotsünli chhin, naiuso apa si Balam neüh jang- tsopong tsak naiuso onnemokpong tsak ta amthang pungkü amkham kiu.

³Nungai Balamüh Balak tü ngiom, “Ni nou ajahtsün amkham chaithio dongko tsakü anoi, nungai ngo khukü APAOU ngüko phete-e süne tsüphete-e ta lou-e. Apaüh ngü tü tilüsong atsangshei hane ngü nung ni hau chite-e.” Nungtiphe apa pemsa kingson nai sungh,

⁴naiuso nungai Goa apa ko pheten. Balamüh Apa tü ngiom, “Ngo amthang chinyat shanküta jangtsopong tsak naiuso onnemokpong tsak ta nung pungkü chaithio kiu-iu.”

⁵APAOU nou Balam hau Balak tü ti ngio-e nung chiten, küta apa Balak dongai laokü khukü ngiongem kiuao hong.

⁶Apa laokü khunai Balak losaokü ajahtsün chaithio amkham dongko Moabhai aheihoi apem hakü tsakü noikü ep.

⁷Balamüh nung khapiam ngio nouso ngiosan: “Moab nokpao Balaküh ngü nialokü shin Siria ainou naiuso ajepek king nouso ainou. ‘Shiküta jü thaiutha achite’ ta apaüh ngiom. Israelhai thako athesan tsak ataiu!

⁸Goa nou athesan tsükiukü ngo titi athesan kiu-e, tsüdekünai Goa nou tsüngiokün ngo titi alekkat ngio ngio-e?

⁹Lung atsok nouso ainou ngo ngüso epao shioji; king nouso ainou ngo ngüsotü thapao shioji. Ngüso mele chija kihtsün mele tsak noin; amao mele nouso chiai ngüso ouk ta ngüsoüh ngeji.

¹⁰Israel thsaosithsoso to pukhao khekkü noin- ngüso haove ao thatü piakü noin. Goa khaiuniahoi tsakli ngü jü ajekhaiu thonane; Ngo asio khaiuniali aalo nai eane.”

¹¹Nungai Balaküh Balam tü ngiom, “Ni ngü tü ti chhin? Ngo ni nungai jü ehoiso athesan kiu-iao nialokü shin, lüko ni chhitsün apem ngüso ouk kiu.”

¹²Apaüh thalakü ngiom, “APAOU nou ngü tü ti lüngio ta ngiom, nunglu ngo ngioau shioji.”

¹³Nungai Balaküh Balam tü ngiom, “Athang amao tsakai tiai ni Israelhai ajantsolu epao shioji nung athang ai ni ngüko hakü ashi. Nungko noikü jü thaiutha ko ngüso athesan akiu.”

¹⁴Apaüh Zofim tsamei Pisga kingson nai niakü sungh. Nungai lüko apaüh amthang chinyat shankü jangtsopong tsak naiuso onnemok apong tsak ta nung pungkü chaithio kiu.

¹⁵Balamüh Balak tü ngiom, “Nungko ni nou ajahtsün chaithio dongko anoi, küta ngo Goa ko nungai khukü phete.”

¹⁶APAOU nou Balam ko phete küta ti ngio-e nung apa ko chite, naiuso apa Balak dongai nung apa ngiongem kiuao laokü hongshi.

¹⁷Nungtiphe apa laokü shi, naiuso nung atao sao- kü Balak apa ün ajahtsün chaithio dongko Moabhai aheihoi hakü tsakü noikü ep, nungai Balaküh APAOU nou ti ngiom ta apa tü sang,

¹⁸nai Balamüh nung khapiam ngio chitesan: “Zippor thso Balak ashi, naiuso ngo ti ngio-e nungtü anglu.

¹⁹Goa to khaiuniali yaang tsandetsün tsüde, Apa to mongyang li-etsün khaiunia tsak tsüde. Tilüsong apaüh thalou-e, apaüh chhiji; Apaüh chiteji, naiuso nung chhianji.

²⁰Ngo tü ouk kiuao thaiutha ayam han Naiuso tilai Goa nou ouk kiu-e, ngo nung lolao au tsüshio.

²¹Ngo Israelhai ashiao nou aküo epji nungüh apa hau aküothe, naiuso angja tsükanjikan kiu-e. Ngüso Goa APAOU nou ngüso ko hakü noin; Ngüsoüh apa ngüso nokpao ta veji.

²²Goa nou ngüso Ijip ainou niasan; Mothasanglokün jangtsopong tsak khekkü apa ngüsoko hakü ehli li-e.

²³Tiautenai Yakob thako athesan ngio tsünoi, naiuso Israel thako khapiam ngio tsünoi. Lo khaiuniahoi nou Israel thaiutha ngio-e, ‘Athaplu, Goa nou ti in chhin!’

²⁴Israel mele to chongkhao oukong tsak khekkü noin; Nelangkü mochipekkün lektso nung aalo tsünoiji. Apaüh loat nouso she moshiukün lektso nung aalo tsünoiji.”

²⁵Nungai Balaküh Balam tü ngiom, “Ni Israel khaiunia athesan kiuao tsümongchio, lüko ngüso ouk to la ouk kiu!”

²⁶Balamüh thalakü ngiom, “Ngo APAOU nou ngü tü chitetsün alum chhi-e ta ni hau tsüchite süne?”

²⁷Balaküh ngiom, “Ngü ko ashi, küta ngo ni athang amao tsakai nialokü khu-e. Tsüngean jü thaiutha ni nungai noiküta Goa nou ngüso tü athesan kiu-iao mongchiokü noiao shio-e.”

²⁸Nungtiphe apaüh Balam Peor Kingson nai singtso goh yankü thapao nialokü khu.

²⁹Balamüh apa tü ngiom, “Nungko jü thaiutha amthang chinyat ashan küta ngü hao jangtsopong chinyat naiuso onnemok chinyat kankü ashi.”

³⁰Balaküh apa tü ngiotsünli chhin, naiuso jangtsopong tsak naiuso onnemokpong tsak ta amthang pungkü chaithio kiu.