Read Khiamniungan Naga Haove 24 Bible Online

Haove 24 - Khiamniungan Naga bible

Haove 24

¹Lo taoko Balamüh APAOU nou apa hau Israel khaiunia ouk kiu-iao aiuji ta ngekü iula, nungtiphe apaüh nung khako athatlu ngio yamkü khutsünli tsükhushi. Apa singtso goh dongai phoklekü khu,

²naiuso Israelhai kaukau ta lingkü saotaiu nou ep. Goa Onthso nou apa mean,

³küta apaüh nung khapiam ngio nou ngiom: “Beor thso Balam ün ngiongem, Thsümonkü noitsün khaiunia nou ngioji:

⁴Goa ngio sauüh lulaji, apaüh ngioji, sauüh Apemshiotsün ajeiaikam epji, kaukü napkü lüko niovei tsümaishikü.

⁵Israelhai nejenkhio nouso alengmei noin.

⁶Mepai alaiu nouso khekkü, tsüdekünai haiusai nai noitsün aimong nouso khekkü, APAOU tsangkü thomtsün Aloe pai khekkü, tsüdekünai haiusai cedar pai nouso khekkü.

⁷Ngüsoüh ah uo saiukü eppe naiuso ngüso chihle khiamle goh paithsao nai kihtsün khekkü, ngüso nokpao Agag tü songkü noi-e, naiuso nokshing atheng atham losunge.

⁸Goa nou ngüso Ijip ainou niasan, Apa mothatsangkün jangtsopong khekkü ngüso thaiutha ehli liheji. Ngüsoüh ngüso ehso chipek, ngüso uo nouso sutne-e naiuso ngüso uokop pai nouso longekke.

⁹Nung mele chongkhao akong tsak khekkü noin; tilai nung saiane khaiunia sauüh apa lothsümonao tsüsom. Sauhaiüh Israel ouk kiuji, ngüso ouk kiu-e, naiuso sauhaiüh Israel athesan kiuji, ngüso athesan kiu-e.”

¹⁰Nungai Balak Balam thako mongmat sungküta Balam tü ngiom, “Ngo ni jü ehoi athesan kiuao jon, lüko lo nouto ni ngüso bao samjam ngoikü ouk kiuwaniu.

¹¹Nungtiphe ni, lo atsamai lükhuwan! Ngo nih au amai kiuao thalo, lüko amai epao Goa nou ni lolaokü wan.”

¹²Balamüh thalakü ngiom, “Ni jüdongai ngiongem kantsünso ta ngo ngio-iu

¹³ni ngü hau atsamai nou tangkasan tsudekünai chaiou lak- keng apem kiu lüko, ngo jüchija chhitsün tsangkü APAOU nou thoi- luttsün tsüchhikü noianao tsüshio, APAOU nou ngü tü ti lüngio ta ngio-e, nunglu ngo ngio-e.”

¹⁴Balamüh Balak tü ngiom, “Lo ngo jü khaiuniaso dongai laokü khuji, lüko ngo khuau nou khako, akhaiunia so tü Israel haiüh ti chhi-e nung ngo ni tü lotsüoji.”

¹⁵Nungai apaüh khapiam ngio nung ngiom: “Beor thso Balam ün ngiongem, Thsümonkü noitsün khaiunia nou ngioji,

¹⁶Goa ngio sauüh lulaji, apaüh ngioji- Naiuso Akhengting mongyang ngetsün nou ngioji, Sauüh Apemshiotsün ajekhaiu epji Kaukü napkü lüko niovei tsümaishikü.

¹⁷Ngo ashiao nou tü luji naiuso ngo Israel mele epji. Nokpao tsak awon kianthsüo tsak khekkü, nung mele ainou sunge. Israel ainou apa nokpao pailai tsak khekkü shi-e. Apaüh Moabhai aheihoi tü shiuh-e Naiuso Set hai apem shiuh thiokü wane.

¹⁸Edom nai apaüh meshen ehso shiolo-e. Naiuso ngüso goumchi apa jengtsaiu au theane, Israel haiüh ashiolotsün tsülao-e.

¹⁹Israel mele nousoüh ngüso ngamthio-e naiuso moisemkü soimokü wane.”

²⁰Nungai apa atsangshei nai Balamüh Amalek hai epküta nung khapiam ngio ngiom: “Apem chiko Amalek mele thatü akongting noiküla, Lüko athon nai nung asaita hau mowane.”

²¹Apa atsangshei nai apaüh Ken hai ep, naiuso nung khapiam ngio nou ngiom: “Ni noitsün athang aalo noin, Nung waio ap nouso ongai tsokkü shankü taim,

²²Lüko asam Ken hai mowane Asiria haiüh asam ngüso sua ao theane.”

²³Balamüh nung khapiam ngio ngiom: “Ajenapki nai kamshitsün khaiuniahoi nungso sauhai noin?

²⁴A-oulowantsünso Kupra ainou shi-e, ngüsoüh Asiria naiuso Eber shiolowane. Lüko phokleshikü ngüso athon tsüyangkü hau mowane.”

²⁵Nungai Balam khemloküta apa tsamai laokü khuwan naiuso Balak apa yamai khuwan.