Read Khiamniungan Naga Haove 25 Bible Online

Haove 25 - Khiamniungan Naga bible

Haove 25

¹Tilai Israelhai Akacia Tsamei nai asaothang shankü noi, khaiunia hoi nou nungai noitsün Moabhai menyiuhoiko ajisiwop chhi chhiao yachu.

²Nung menyiuhoi nousoüh Moabhai goa hau loatkü amkham kiutsün sümai nai ngüso jonkü noiküla. Israel haiüh chih- sikhiam heshiu haküta

³Peor nai Baal goa tü amkham. Nungtiphe APAOU ngüso tü mongmat

⁴küta Mosa tü ngiom, “Israel aheihoi apem jonkam küta, Israel thako APAOU amongmattsün laoloau thaiutha, ngüso APAOU thaiutha ahom beta lüloat, nungai ngo khaiuniahoi nouko tsümongmat shi-e.”

⁵Mosaüh aheihoi nouso tü ngiom, “Asamüh asam mele pungkü nai nou Peor nai Baal goa amkhamtsün khaiunia apem lüloat.”

⁶Ngüso APAOU noitsün Nejenkhio bekhan dongko mongsaiukü noitao, Israelhai ongko khaiunia tsaküh Midiahai menyiu tsak Mosa naiuso hoikam athum khako apa nejenkhio nai nialokü shin.

⁷Tilai meson Aron thsao Eleazar thso Phinehasüh nung ep, apa mongmat sungkü ngüso akam asong nou lean. Apaüh lai tsak semkü

⁸nung khaiunia naiuso menyiu netü hoilutkü nejenkhio nai nap, küta ngüne nemtso tü lai nou lang. Nungli Israel lotheantsün imkia tsak lolao,

⁹lüko nungtin aküo tsangkü khaiunia heng 24, 000 to loatankü noiküla.

¹⁰APAOU nou Mosa tü ngiom, “Tiautenai Phinehasüh ti chhin, nungüh ngo loto Israelhai tü tsü- mongmat shi-e.

¹¹Apaüh Ngü tü simkü amao goa amkhamtsün jei- taiuao tsüshio küta nung shioko ngo ngüso ko tsümongmat shi-e.

¹²Nungtiphe ngo apako ashiao noi- tsün atao apem saokü hao athalou-e tsak shane ta apa tü lüngio.

¹³Apa naiuso apa thsaosithsoso asaita meson theao shankiu-iu, tiautenai apaüh ngü tü khengshitsün sau jeitaiuao tsüshio naiuso Israel thsoso apem hau angei wankiuao thaiutha chhisiya chhin.”

¹⁴Israelhai nou sau Midianhai menyiu ko aikü loatan, apa Simeon kau mongko ahei Salu thso Zimri noiküla.

¹⁵Nung menyiu nou Midian kau mongko ahoi tsak ko atengting nou Zur thso Kozbi ta niankü noiküla.

¹⁶APAOU nou Mosa tü thoilutkü ngiom,

¹⁷“Midianhai tü lükom küta ngüso lomokü lüwan,

¹⁸tiautenai Kozbi sau Peor nai imkia taoko loat, naiuso tilai asam Peor nai kausaiat, nung taoko ngüsoüh asam tü tsü- meikü kankei nou shioko noiküla.”