Read Khiamniungan Naga Haove 3 Bible Online

Haove 3 - Khiamniungan Naga bible

Haove 3

¹APAOU nou Mosa tü Sinai King ai chitetsün taoko Aron naiuso Mosa tsammongso nungti noiküla:

²Aron thsoso püle: ngüso ongko petche nou Nadab, Abihu, Eleazar, naiuso Itamar ta noiküla.

³Ngüso meson theao tsomkiu naiuso thumkü yathsüoau kiuwan,

⁴lüko Nadab si Abihu ne ngüneüh Sinai liutsa nai APAOU tü In chaithio tsüsiokü kiutsün taoko loatan. Ngüne tü thsohai mochetlutkü noiküla, nungtiphe Eleazar si Itamar neüh Aron aakih taoko meson ayathsüo chhili chhikü noiküla.

⁵APAOU nou Mosa tü ngiom,

⁶“Levi kau shimkü nialokü ashi naiuso meson Aron yathsüoau ngüso lütaiukiu.

⁷Ngüsoüh Ngü noitsün Nejenkhio thaiutha apotsün chhisiya chhi-e, naiuso mesonhoi nouso si hoithum thaiutha chhikü noi-e.

⁸Ngüsoüh Nejenkhio jengtsaiu apem khako paotsange naiuso Israel hai thaiutha chhisiya-e.

⁹Levi haiüh chhiau nou thsale nung Aron naiuso apa thsoso yathsüoau noiküla.

¹⁰Ni Aron naiuso apa thsoso meson chhisiya nou chhiao lüchosan, amao hai khaiunia ajantsoüh nung chhisiya chhiao kowe nai apa to loatkü wane.”

¹¹APAOU nou Mosa tü ngiom,

¹²“Loto Levi hai Ngü nou noi-e.Tilai Ngo Ijip hai nioyamchong nouso apem loatan, Ngo Israel hai tsamkhaiu pungkü ainou melo thsoyamchong naiuso thainian chongting puntsün pungkü jühaoson theao losiokü wan.Israel hai melothso yamchong nouso jühaoson ta losiokü taiutsün liko loto, Levi hai Ngo nou noin; ngüso Ngü nou noi-e.Ngo APAOU nou noin.”

¹³

¹⁴APAOU nou Sinai liutsa ai nai Mosa tü thoilutkü ngiom,

¹⁵Levi hai kau kau naiuso pothso nai melothso pungkü alei tsak khengai nouso haove nai lüsatthio.

¹⁶Küta Mosaüh apa tü APAOU nou thoiluttsünli ngüso haove satlo.

¹⁷Levi thso melothso süme nouso Gershon, Kohat naiuso Merari noiküla; nung ngüso nianphi niantsün kau nouso paosiposo ngüso noin. Gershon thso melothso nime- Libni si Shimei ne noiküla, Kohat thso melothso püle-Amram, Izhar, Hebron naiuso Uzziel noiküla, naiuso Merari thso melothso nime-Mahli naiuso Mushi ne noiküla.Ngüso pothso ko kau nian nianlokü shitsün nung paosipo nou ngüso noiküla.

¹⁸

¹⁹

²⁰

²¹Gershon kau nouso nung Libni naiuso Shimei pothsoso hoi-ekü noiküla.

²²Melothso alei tsak naiuso nung khengai nouso sauhai haove nai monglo, nungso apem kamko nai mepem 7, 500 noiküla.

²³Nung kau nai Lael thso Eliasap akhengting ahei thekü Nejenkhio phiai ngüso saothang shanlo.

²⁴

²⁵Ngüso chhisiya thsale nung Nejenkhio, nung sapoktsün ne, achiai si akhei ai nouso, bekhan nai khongjeitsün ne, Nejenkhio lemkü khongjeitsün naiuso amthang, naiuso nung mongai naptsün bekhan khongjeitsün ne,

²⁶Nejenkhio lemkü khongjeitsün naiuso amthang, naiuso nung mongai naptsün bekhan khongjeitsün ne, ngüso nung chhisiya nouso tü sunkü noitsün ayathsüo- tsün chhisiya apem thaiutha thsale noiküla.

²⁷Kohat kau nung Amram, Izhar, Hebron, naiuso Uzziel pothsoso hoi-ekü noiküla.

²⁸Nung kau mongko melothso alei tsak naiuso nung khengai nouso sauhai haove nai vethiohaküla, ngüso apem kamko nai mepem 8, 600 noiküla.

²⁹Uzziel thso Elizafan atengting nung kau nai ahei thekü, nung kau nou Nejenkhio ajepekki nai ngüso saothang shanlo.

³⁰

³¹Ngüso chhisiya thsale nung: Athalou-e Paidan thaiutha, puo thaiutha, tson taiutsün thaiutha, amthang nouso thaiutha, AsioThang nai mesonhoi nou kankeitsün chiosilak thaiutha, naiuso thatü Asio Thang nai naptsün koukhan khongjeitsün ne thaiutha noiküla. Ngüso nung chhisiya nouso tü sunkü noitsün ayathsüotsün apem thaiutha thsale noiküla.

³²Levi kau mongko atengting nou meson Aron thso Eleazar noiküla. Apa chhisiya nung AsioThang nai chhitsün tü paotsangao noiküla.

³³Merari kau nung Mahli naiuso Mushi pothsoso hoi-ekü noiküla.

³⁴Nung kau mongko melothso alei tsak naiuso nung khengai nouso sauhai haove nai wethioha, apem kamko nai mepem 6, 200 noiküla.

³⁵Nung kau nai ahei Abihail thso Zuriel thekü, nung kau nou ngüso saothang Nejenkhio ajenapki nai shanlo.

³⁶Ngüso chhisiya thsale nung: Nejenkhio athanya nouso thaiutha, süon nouso thaiutha, kheam nouso thaiutha, anoilutao nou thaiutha, naiuso nungso apem waokü jippeao thaiutha kiu.Ngüso hau nungso chhisiya yathsüotsün au ai in pungkü thaiutha ko thsale kiu.

³⁷Ngüso hau loüh kheam nouso nung noiluttsün, pai ehen nouso, naiuso kam nai achiai lopoktsün thaiutha thsale kiu.

³⁸Mosa si Aron naiuso apa thsosoüh to Nejenkhio khako ajepek nai shinkü ngüso saothang shan. Ngüso tü Israel khaiunia thaiutha AsioThang nai chhisiyatsün kankü khuau thsale thoilut. Khaiunia ajantsoüh ngüsoli chhisiya ha au kowe nai apa to loatkü wanao noin.

³⁹APAOU nou thoiluttsün tsangkü Mosaüh Levi hai melothso alei tsak ainou nung khengai kau kau tsangkü haove nai mongthio hatsün apem kamko nai mepem 22, 000 noiküla.

⁴⁰APAOU nou Mosa tü ngiom, “Israelhai melothso yamchong apem jü haoson noin. Nungtiphe Israelhai thso melothso yamchong pungkü pon tsak ainou nung kheng ai nouso lüsatlo.Lüko nungso thangko Levihai thso apem Ngü nou ta Ngo loji! Ngo APAOU nou noin! Naiuso Israelthsoso ün chongting puntsün tsam thainian thangko Levihai ünchongting puntsün tsam thainian apem alo.”

⁴¹

⁴²Mosaüh angiotsün angkü, tsam thainian chongting puntsün apong

⁴³apem alei tsak nai nou nung khengai nouso satlo, küta nungso apem kamko nai 22, 273 noiküla.

⁴⁴APAOU nou Mosa tü ngiom,

⁴⁵“Lo Israelhai melothso yamchong nouso apem thangko Levihai thso Ngü nou ta lülosio, naiuso Israelhai tsam thainian chong ting puntsün thangko Levihai tsam thainian lülosio.

⁴⁶Israelhai thso yamchong haove 273 nou Levihai thso yamchong haove nou shela anphe, ni melothso aphop nouso laokü tuhshiao noin.

⁴⁷Apem chaithat tsangkü methso nai tangkason pungongo lükiu,

⁴⁸küta nung chai nou Aron naiuso apa thsoso hau lükiu.”

⁴⁹Mosaüh angiotsün angkü nung chhin,

⁵⁰küta tangkason 1, 365 loküta,

⁵¹nung Aron naiuso apa thsoso hau kiuwan.