Read Khiamniungan Naga Haove 32 Bible Online

Haove 32 - Khiamniungan Naga bible

Haove 32

¹Reuben kau naiuso Gad kau nousoüh tsam thainian piakü nyiokü noiküla. Tilai ngüsoüh Jazer naiuso Gilead goumchi nung thainian thaiutha titi ameiting ta epsan,

²ngüso Mosa, Eleazar, naiuso amao hoikam aheihoi dongai khukü ngiom,

³“APAOU nou Israelhai tü anoijeiloau hachukü shitsün khiam- khan nungko noksong nouso: Atarod, Dibon, Jazer, Ninra, Hesbon, Eleale, Sibma, Nebo, naiuso Beon nungso thainian thaiutha goh amei noin, naiuso samüh thainian piakü taim.

⁵Ngüsoüh ngiom, tsüojinyangkü sam hau nung goumchi sam tengkamao akiu, sam Yordan Haiu yankü kihloau lakhu ha-i.”

⁶Mosaüh thalakü ngiom, “Asam meshen khaiunia Israelhai ehli khu nai asam nungko noi-e ta aiuji süne?

⁷Yordan yankü goumchi sübao APAOU nou asam hau kiutaim nungai khuau Israelhai kowetsün ainou monglohenao asamüh titi kowesomji?

⁸Tilai ngo Kades Barnea ainou goumchi kautha ao hong, nungai asam poüh lüko nungti chhikü noiküla.

⁹Ngüso Eskol tsamei saokü laiukü khuküta goumchi nou ep, lüko tilai ngüso laokü shishin, ngüsoüh APAOU nou ngüso hau kiutaiutsün goumchi nai naptsün ainou khaiuniahoi monghen-ikü noiküla.

¹⁰Nung ajekhaiu ko APAOU mongmat küta athalo tsak shan.

¹¹‘Atsüoting ngo Abraham, Isak, naiuso Yakobso tü thalotsün goumchi nou, Ijip ainou shikhutsünso pon eknime naiuso nung khengai nousoüh to tsüepe; tiautenai ngüso jüphiai thumkü tsühoilut.’

¹²Keni- zhai nou Jefune thso Kaleb naiuso Nun thso Yihusua netü simkü amaohai to jüphiai tsühoilut, lüko ngüne to jüphiai thumkü hoilut.

¹³APAOU khaiuniahoi nouko mong- matkü noiküla, naiuso apaüh ngüso liutsa nai apa tsümonglingitsün vetao athum moeankhemkün lektso ngüso liutsa nai tsakei-i.

¹⁴Naiuso lo asamüh asam poso noithang lo-iu, nung angei khaiuniahoi nouso vetao ayan nou loüh Israel khako APAOU mongmat sungtsün kanjikanao khemkü noin.

¹⁵Asam Reuben naiuso Gad kau nouso, asamüh lo apako hoilutao tsümongchiokü naito, apaüh lojam nung khaiuniahoi nouso apem liutsa nai leane, küta ngüso mowan- tsün thaiutha asam thsale noi-e.”

¹⁶Ngüsoüh Mosa dongai shimkü shikü ngiom, “Tsam thainian thaiutha samüh nungko tsam tsak lah-e, naiuso ehenhoi thaiutha nok- song nouso shanao sam hau ayam asopkiu.

¹⁷Lüko ngüso meshen kih- thang ai nialokü moshikün lektso, sam chija Israelhai thso khaai khuau sahsingio khemlokü noi-e, naiuso nung goumchi khaiuniahoi ainou kipsankü noiau sam thsoso samüh noksong pemongko noi-i-e.

¹⁸Samüh sam tsamai amao Israel thsosoüh ngüso haoson goumchi tengkam nai monoilokün lektso laokü tsükhu-e.

¹⁹Yordan etsai samüh ngüso ongko tengkam titso tsüloha-e, tiautenai samüh nungai Yordan ajepek nai sam haoson lowaniu.”

²⁰Mosaüh thalakü ngiom, “Asamüh ti ngioji nung atsüoting ngioji tünaito, nungko APAOU khako ehli nai khuau lükhemlo.

²¹Asam ehli khaiuniahoi apemüh Yordan yanao noin naiuso APAOU ngiokhem khemko ngüsoüh sam ehoiso APAOU nou moshiolokün lektso lihe ao noin

²²küta goumchi tengkam nou loau noin.Nungphiai asam laokü khuau shio-e, tiautenai asamüh APAOU nouko asam chhisiya thawao-iao naiuso meshen Israel khaiunia khako thawao-iao. Naito, APAOU nou nung Yordan ajepek goumchi nou asam haoson ta mitha kiu-e.

²³Lüko asamüh athaloutsün tsükankeikü naito, Ngo asam tü ngiotsün mongko asamüh APAOU thako angei sunheji ta lütsüolo. Nung thaiutha ti phiokü lathe, asam meshen angei thaiutha angja-e.

²⁴Nungtiphe asamüh asam noksong nouso naiuso asam onnemok thaiutha tsam nou lülahlo, nung asamüh ti thalotaim nung lüchhi!”

²⁵Gad naiuso Reuben khaiuniasoüh ngiom, “APAOU, sam ni yathsüotsünsoüh ni thoiluttsünli chhi-e.

²⁶Sam tsammongnyiuso, methsoso, naiuso sam thainianso, naiuso sam onnemokso, nung Gilead noksong nai noi-e.

²⁷Lüko sam apem APAOU ngiokhem khemko ehli nai khuau khemlokü noin. Sam Yordan yankü khuküta ni ngiotsünli sam ehli lihe-e.”

²⁸Nungtiphe Mosaüh Eleazar si Yihusua naiuso Israelhai aheihoi nouso tü nung thoilutkü kiu:

²⁹“Reuben naiuso Gad khaiuniasoüh APAOU nou thoiluttsün nai ehli-ao Yordan yan naito, naiuso asamüh lüko ngüso ahachu tsangkü nai goumchi nou shiolo naito, Gilead goumchi ngüso tengkamao ngüso hau lükiu.

³⁰Lüko ngüsoüh Yordan tsüyankü naiuso asamko ehli nai tsükhukü naito, ngüsoüh ngüso haoson asam lilu Kanan goumchi nai tengkam kame.”

³¹Gad naiuso Reuben khaiunia- soüh thalakü ngiom, “APAOU, samüh APAOU nou thoiluttsünli chhi-e.

³²Apa ngiokhem khemko samüh Kanan goumchi mongai yanküta ehli nai khu-e, nungaito samüh sam tengkam Yordan ajepek nai lu noi-e.”

³³Nungtiphe Mosaüh Gad naiuso Reuben kau naiuso Manase kau apaitso nouso hau Amorhai nokpao Sihon nokshing apem naiuso Bashan nokpao Og goumchi noksong nouso, naiuso nung lemkü noitsün goumchi nou kium.

³⁴Gad kau nou alengmei noksong Dihon, Atarot, Aroer,

³⁵Atrot, Shofan, Jazer, Jogbehal,

³⁶Bet, Nimra, naiuso Bet Haran nouso shanshi.

³⁷Reuben kau nou Hesbon, Eleale, Kiriataim,

³⁸Nebo, Baal Meon, (nung nian leanio) naiuso Sibma noksong nouso shanshi. Ngüsoüh shanshitsün noksong nouso nian ngüsoüh ayan niankiushi.

³⁹Manase thso Makir kau nou Gilead goumchi shiolo, küta nungko noitsün khaiunia nouso komankü nung thangko kihlo.

⁴⁰Nungtiphe Mosaüh Gilead goumchi nung Makir kau hau kiuwan, küta ngüso nungai kih.

⁴¹Manase thso Jairüh nok ajantso komankü thalo, naiuso nungso tü “Jair nokso ta nian.”

⁴²Nobaüh nok ajantso koman küta Kenat naiuso nung nok nouso thalo, naiuso apaüh nung nok nian nou apa nianphi Noba ta nian.