Read Khiamniungan Naga Haove 34 Bible Online

Haove 34 - Khiamniungan Naga bible

Haove 34

¹APAOU nou Mosa hau

²Israelhai thaiutha ayamhan nouso kium, “Ngo asam hau kiutsün Kanan goumchi nai tilai asam nappe, asam goumchi elung nouso nungti noi-e:

³Ajepekki elung nou Zin liutsa tü yalo nou Edom elung yangkü. Nung ajepek nai Ee Khiamnok nou ta tsalo-e.

⁴Nung ainou ajepekki dongai sheikü Akrabim ai sunghkü Zin yankü khuküta Kades Barnea tü yangkü. Küta ajenapki nai khunai Hazar Adar naiuso Azmon yangkü,

⁵nung ainou Ijip elung tsamei nai shiküta Mediteranean ko laokü noi-e.

⁶Ajenap elung nou Mediteranean Khiamnok noi-e.

⁷“Ajenapki nai elung Mediteranean Khiamnok ainou Hor King tü yangkü lukü noi-e

⁸naiuso nung ainou Harnat Aoyan tü yangkü. Nung ainou Zedad saokü

⁹naiuso Zefron saokü khoküta Hazar Enan nai laokü.”

¹⁰Ajepek nai elung Hazar Enan ainou Shefam tü yangkü lukü noi-e.

¹¹Nungthankü Harbel ajepekki naiuso Ain ajepek nai khukü, naiuso King nou tü thankü Galil shekok nai khukü,

¹²küta ajepekki nai Yordan Haiu sai ainou Ee Khiamnok tü yangkü noi-e. “Nungti asam goumchi elung püle nouso noi-e.”

¹³Nungtiphe Mosaüh Israelhai tü ngiom, “Nung goumchi nou asamüh phongde tsangkü eppe, goumchi sübao APAOU nou kau lükao naiuso apaitso hau kiutsün nung noi-e.

¹⁴Reuben, Gad, naiuso Manase kau apaitso nou ngüso haoson epiu, kau lingkü janthat lo-iu,

¹⁵Ngüsoüh nung Yeriko tü lalutkü, Yordan Haiu ajepek etsai epiu.”

¹⁶APAOU nou Mosa tü ngiom,

¹⁷“Meson Eleazar naiuso Nun thso Yihusua neüh khaiuniahoi hau goh nou janthat kiu-e.

¹⁸Ngüne tü goh janthat nai hachuau kau pungkü ainou ahei tsak tsak lülo.”

¹⁹APAOU nou chosantsün khaiunia nungso noiküla: [Kau] — [Ahei] Yihuda — Zefune thso Kaleb Simeon — Amihud thso Shelumiel Benjamin — Kislon thso Elidad Dan — Jogli thso Bukki Manase — Efod thso Hanniel Efraim — Shiptan thso Kemuel Zebulun — Parnak thso Alizafan Isakar — Azzan thso Paltiel Asher — Shelomi thso Ahihud Napthali — Amihud thso Pedahel

²⁹Nungso Kanan goumchi nai Israelhai ongko goh janthat au APAOU nou chosantsün khaiuniahoi noin.