Read Khiamniungan Naga Haove 35 Bible Online

Haove 35 - Khiamniungan Naga bible

Haove 35

¹Yeriko nai Yordan Haiu yankü Moab tsamei nai APAOU nou Mosa tü ngiom,

²“Israelhai tü ngüsoüh eptaiu nou goumchi ainou noknio ajantso naiuso nung lemkü noitsün thsanyan goumchi Levihai kih ao lükiu ta lüchite.

³Nung noknio nouso Levihai thaiutha noi-e, naiuso ngüso nungko kih-e. Nung thsanyan goumchi nou ngüso janghoi thaiutha, naiuso amao thainian apem thaiutha noi-e.

⁴Nung thsanyan goh nou noknio pe nouso ainou phayam 450 aniokun pungkü nai noi-e,

⁵nungtiphe ano pungkü nai phayam 900 noknio awem nouko wekü noi-e.

⁶Asamüh Levihai hau ajantsoüh tsüngeankü khaiunia ajantso loatan nai soloau asolotsün noknio louk kiuao noin. Nungko hakü ngüso hau thsanyan goh süonkü amao noknio aopülekü nime,

⁷apem kamko noknio aopülekü petjei lükiu.

⁸Kau pungkü nai Levihoi noksong haove nouso goumchi atheng atham asong ehen yangkü noi-e.”

⁹Israelhai tü ngioau,

¹⁰APAOU nou Mosa hau chiten: “Tilai asam Yordan Haiu yankü Kanan goumchi nai nappe,

¹¹Khaiunia tsaküh khaiunia ajantso mongdem tsüdekü loatan nai kiploau asamüh akiplotsün noknio nouso lücholo.

¹²Nungai eantsün tsammonghoi sauhaiüh apa tü thamshiao yame nung ainou solo-e. Khaiunia loattsün khaiunia tsak nyung khako tsüthelukü loatkü tsüwane.

¹³Noknio apem louk lücholo,

¹⁴noknio süme nouso Yordan ajepek nai naiuso süme nouso Kanan goumchi nai ta lücholo.

¹⁵Nung noknio nouso Israelhai thaiutha naiuso melemaohai sauhai asaita hau tsüdekünai lohautso kihakü noin nungso soloau the-e. Sauhaiüh mongdem tsüdekü khaiunia ajantso loate, nung noknio nouso tsak ko soloau shio-e.

¹⁶“Ti taoko khaiunia tsaküh son dun, lung dun, tsüdekünai pai kankeikü khaiunia ajantso loate, apa to mongdem loat ta aphio noin naiuso loatkü wane.

¹⁹Mongdem loattsün loatshiao eantsün khaiunia tsam- mong ashimting nou thsale noi-e. Tilai apa eppe, apa to loatkü wane.”

²⁰“Khaiunia tsaküh ajantso chin- yanküta jin nai thoi-ikü tsüdekünai apa tü tso tsak yaklutkü,

²¹tsüdekünai athip thipatkü loatan nai, apaüh mongdem loattsün aphio sunlo-iu, naiuso apa loatkü wanao noin. Mongdem loattsün loatshiao eantsün khaiunia tsammong ashim- ting nou thsale noi-e. Tilai apa eppe apa to loatkü wane.”

²²“Lüko athatlu nai khaiunia tsaküh apaüh tsüchinyankü nou mongdem asaoai thoi-itsün tsangkü, tsüdekünai apa tü tso tsak yaklutkü loatan,

²³tsüdekünai tsüthaplukü, khaiunia tsaküh lung tsak yaklut küta, aloatao to tsüyang naiuso apako tsaotsün tsüdekü loatan,

²⁴nungtin aküo nouko nai: eantsün khaiunia tsammongsoüh thamshiao yamtsün tü tsüdekü sauüh apa loatan nung khaiunia tü jungkü hoikam khako mi nou kheme.

²⁵Hoikam nou khaiunia loattsün aphio khaiunia nou eantsün tsammongso ainou kipsanao noin, küta ngüsoüh apa asolotsün noknio tiai apa soloau noin nungai hongane. Apa nungai nung taoko Akhengting meson sau noin apa mo-ekün lektso kih ao noin.

²⁶Khaiunia loatkü phiotsün nou tiai apa soloau noin nung asolotsün noknio wankü khukü

²⁷ta eantsün khaiunia tsammongsoüh apa epküta apa loatan nai, nung chhisiya nou to aloatan thaiutha phaosan tsüde.

²⁸Khaiunia loattsün ko aphio suntsün khaiunia Akhengting meson mo-ekün lektso nung asolotsün noknio nai kih ao noin, nungphiai apa tsamai laokü shi ao shio-e.

²⁹Nung ngiokhem yam nouso asam naiuso asam thsaosithsoso tilüsong ai kihe, wekülu kankei-e.”

³⁰“Khaiunia loattsün tsak aphio nai thalonai, mitha nime tsüdekünai nung khengai mitha noi nailu apa eao shio-e; mitha tsaklu nou to khaiunia tsak eao saiukü ahachu tsünoi-e.

³¹Khaiunia loattsün khaiunia to loatkülu wanshiao noin. Apa nung angja ainou chai tsangkü tuhsanao tsüshio-e.

³²Khaiunia tsak asolotsün noknio tsak tü khulutnai, Akhengting meson mo-ekün khako tsamai laokü shiao thaiutha amai lakiu;

³³Asamüh nung chhi naito, asam kihtsün goumchi asamüh longeiji, mongdem loattsün nou goumchi longeiji, naiuso khaiunia tsak ti ai e-kü noin nung goumchi thaiutha aloattsün khaiunia pem nou e-tsün tsangkü tsüdekünaito, goum- chi thaiutha alosio amkham amao yam tsünoi.

³⁴Asam kihtsün goum- chi lalongei, tiautenai Ngo, APAOU, nou noin, naiuso Ngo Israel ongko kihji.”