Read Khiamniungan Naga Haove 36 Bible Online

Haove 36 - Khiamniungan Naga bible

Haove 36

¹Gilead kau aheihoi, Makir thso, naiuso Yosep thso nou Manase thsaoso, Mosa naiuso amao aheihoi nouso dongai khukü chite.

²Ngüsoüh ngiom, “APAOU nou asam Israel khaiuniahoi hau phongde tsangkü goh nou janthat kiuao thoilut. Loüh apaüh sam deisinio Zelofehat menyiuthsoso hau lüko deisiniohai goh jankiu haau thoilut.

³Lüko lüyangshi, ngüso amao mele haiko tsamsigoh yangkü khuwan nai, ngüso tengkam haoson nung mele thaiutha iula-e, küta sam hau sonkiutsün apem thsaokü shiane.

⁴Alaokiushitsün pon nouko, tilai janankü noitsün jengtsaiu apem aya pao hau laokü kiushi-e, Zelofehat menyiuthso nouso jengtsaiu haoson ngüso sau mele ko tsamsigoh yangkü noin nung mele hau asaichi tengkamao hoilutkü theane, naiuso sam mele tengkam thsao wane.”

⁵Nungtiphe Mosaüh Israelhai hau APAOU ainou athoiluttsünso kiu kü apaüh ngiom, “Manase kau nou ti ngioji nung thakü noin,

⁶nungtiphe APAOU nou ngioji, Zelofehad menyiu- thsoso ngüsoüh mongchio naito, sau- ko lünou tsamsigoh yangau shio-e, lüko ngüso kau mongkolu tsamsigoh yangau shio-e.

⁷Israelhai thso pungkü tengkam apem apa kau ko thsanekü noi-e.

⁸Menyiu pungkü sauhaiüh tengkam Israel kau mong- ko kame apaüh nung kau mongko noulu melo ko tsamsigoh yangau shio-e. Nungli Israelhai pungkü nou apa paosiposo tengkam haoson kamao noin.

⁹Naiuso tengkam nou kau tsaküh nou kau tsakai ta tsüli-e-e. Kau pungkü nou momo tengkam tsülaokü kankeikü noi-e.”

¹⁰Nungtiphe Zelofehad menyiu- thsoso: Mahla, Tirza, Hogla, Milka, naiuso Noah, ngüsoüh APAOU nou Mosa tü thoiluttsünli chhin, küta ngüso po thansithong thsoso ko ngüso tsamsigoh yang.

¹²Ngüso Yosep thso Manase kau mongko tsamsigoh yang, naiuso ngüso tengkam ngüso po kau mongai noi.

¹³Yordan Haiu yankü Yeriko nai Moab tsamei ko APAOU nou Israelhai hau Mosa tsangkü kiutsün ngio- khem naiuso don yam nouso nungso noin.