Read Khiamniungan Naga Haove 4 Bible Online

Haove 4 - Khiamniungan Naga bible

Haove 4

¹APAOU nou Mosa tü ngiom,

²Levi kau nouso ongko Kohat thsoso, kau kau si pothso pothso,

³pon aosam ainou aopungo saokü, APAOU noitsün Nejenkhio nai chhi chhiao omkü nouso apem lüwelo.

⁴Asioting jengtsaiu nouso thaiutha, Nejenkhio nai Kohat thsoso chhisiya nung noin.

⁵APAOU nou Mosa hau ayam nungso han: Tilai asaothang nou soiane, Aron naiuso apa thsoso Nejenkhio mongai nappe, naiuso akhongjeitsün ne Athalou-e Paidan khako sa-iküta nungüh Paidan nou sajeikü taiu-e.

⁶Nung chiai ngüsoüh nyikhun amei nou lolutkü, nung ne asangnya nou chiekü, küta api-ao thetsün pai chinthioao noin.

⁷Ngüsoüh puo chinai asangnya nepat nou APAOU hau themtsai chaithio kiutsün thaiutha satlute, küta nung chiai chiosilak, angan- nyam jahtsün chio nouso, chaishi chio nouso, naiuso khiam meng sübao theng chaithio thioau theji nungso ataiu.Nung puo nai themtsai asaita taiuao noin.

⁸Nung chikü chiai ngüsoüh ne aseng nou satlut ao noin, küta nung nyikhon amei tsak nou kapjeikü ataiu, naiuso api-ao thetsün pai chinthio-e.

⁹Tson taiutsün, tson nouso, nyikhun amatchai nouso, chio nouso, naiuso olip khaiutsom meng apem ngüsoüh ne asangnya nou patpokkü taiuao noin.

¹⁰Nungso jengtsaiu nouso ngüsoüh nyikhon amei nouko tsanshiküta patpokkü apitsün chiai taiukiu-ela.

¹¹Nungthan ko chaiou lakkeng amthang chiai ngüsoüh ne asangnya leng nou satlut ao noin, küta nung nyikhun amei nou kapjei-e, naiuso nung chiai apitsün pai thiokü wanao noin.

¹²Ngüsoüh AsioThang nai kankeitsün chiosilak apem loküta ne asangnya nou tsanshikü, kappokau nyikhun amei tsak nung chiai lolut küta nungso apitsün pai chiai taiukiu-ela.

¹³Ngüsoüh amthang ainou apaichao luo nou wanküta ashethop ne nou nung chiai salutela.

¹⁴Ngüsoüh nung chiai amthang chhisiya nai kankeitsün jengtsaiu nouso apem, sonlak, akhojeitsün, chappun, naiuso chiokaoh, naiuso amthang nai chiosilak apem, naiuso nung chiai ngüsoüh nyikhun nou sapokkü ta apitsün pai chinthio-e.

¹⁵Tilai ngüso saothang wankü khuau atao shi-e, naiuso Aron si apa thsosoüh amthang sapoktsün khemsane naiuso amthang nai jengtsaiu apem khemsan kiu-e, nungai Kohat thsosoüh nung tinao shioau noin: Lüko ngüso eanao noin ta amkham Nejenkhio nou tü ngüsoüh tsüthantanela. Nungso jengtsaiu nouso amkham Nejenkhio nai Kohat thsoso thsale noin:

¹⁶Amkham Nejenkhio nai kankei- tsün tson thaiutha inkhiam, ajah- tsün, chih chaithio, atsomkiutsün khaiutsom, naiuso Amkham Ne- jenkhio nai kankeitsün alum APAOU tü losiokü taiutsün nung chhisiya apem thaiutha meson Aron thso Eleazar thsale noi-e.

¹⁷APAOU nou Mosa si Aron netü ngiom,

¹⁸“Kohat kau nung amkham asioting Nejenkhio dongai shimkü shitsün tsangkü la ean-i.

¹⁹Nung thawaoau noitsün loyangau Aron naiuso apa thsoso khukü khaiunia pungkü hau apa chhisiya kiuküta apaüh ti chhilükhune nung apa hau chite-e.

²⁰Lüko Kohat kau nung amkham Nejenkhio nai napkü mesonhoi nou Asio jengtsaiu khemlotsün epnai ngüso eane.”

²¹APAOU nou Mosa ko chitekü ngiom,

²²Gershon kau mongko kau kau, naiuso pothso pothso,

²³am- kham Nejenkhio nai chhi chhiao tsalokü naptsünso pon aosam ainou aopungo saokü ashe, ni ngüso lüvelo.

²⁴Nungso jengtsaiu nouso kankeiao thaiutha ngüso thsale noin.

²⁵Ne- jenkhio nou among nai lopoktsün, naiuso achiai lopoktsün, nung achei khating nou lojei ao nyikhun amei nou, koukhan thaiutha nekhong,

²⁶Nejenkhio naiuso amthang lemkü thaiutha akhongjeitsün ne, naiuso aochan nung kam thaiutha, kam nai naptsün koukhan nouko akhong- jeitsün ne, naiuso nung jengtsaiu shanao ajipetsün apem. Ngüsoüh nung jengtsaiu chhisiya nou potsün alum shanao noin.

²⁷Aron naiuso apa thsosoüh ngüso hau chhisiya alum chhiao thoilutkü taiutsün Gershon haiüh chhi si tsüchhi nungtü thapao Mosa naiuso Aron noiküla.

²⁸Ne- jenkhio nai Gershon kau chhisiya kiutsün nungso noiküla: Ngüsoüh nungso meson Aron thso Itamar ayamhan khemko chhikü noiküla.

²⁹APAOU nou Mosa ko chitekü Merari kau vetaoling haove kau kau naiuso pothso pothso,

³⁰pon aosam ainou pon aopungo jetko nouso pohai chikü sauhai APAOU noitsün Nejenkhio nai chhisiya ao omkü noin nungso lüsatlo ta ngiom.

³¹Ngüso chhisiya kengchek nouso kankü, suon naiuso kheam nouso, naiuso Nejen- khio noiluttsün,

³²naiuso kheam nouso, nung noiluttsünso, pai ehen nouso, kam thaiutha aochan nouso Nejenkhio lemkü sübao waokü jipeküta ngüsoüh lekthsa nungso noi-e. Khaiunia pungkü jengtsaiu in tsak tsak kanao thsale noiküla.

³³Nejenkhio nai Merari kau nou chhiao ayathsüotsün chhi thsale nungso noin: Ngüsoüh nungso meson Aron thso Itamar ayamhan khemko chhikü noiküla.

³⁴APAOU athoiluttsün tsangkü, Mosa, Aron, naiuso hoikam ahei hoi nou Levi kau süme nouso: Kohat Gershon naiuso Merari kau nouso vetaoling haove loum.Ngüsoüh nung kau kau, pothso pothso, khaiunia pon aosam ainou aopungo sauhai APAOU Noitsün Nejenkhio chhiao omkü noiküla nungso satlotsün nungti noi-e: [Kau] — [Haove] Kohat — 2, 750 Gershon — 2, 630 Merari — 3, 200 — Apem kamko — 8, 580

⁴⁹Khaiunia pungkü Mosaüh APAOU nou thoiluttsünli satthio, naiuso APAOU nou Mosa tsangkü athoilut kiutsün nung: Khaiunia pungkü apa chhisiya thsale aya- thsüotsün tsüdekünai akanlükhunao chhi haoson kium.