Read Khiamniungan Naga Haove 5 Bible Online

Haove 5 - Khiamniungan Naga bible

Haove 5

¹APAOU nou Mosa tü ngiom,

²“Jee suntsün khaiunia tsüdekünai pem ainou nyih chankü khutsün naiuso mea nou tü thantanküta tsüyanthsüokü iulatsün khaiuniahoi asaothang ainou lükoman ta Israel thsoso tü ngiokhem lükiu.

³Jü khaiuniaso ongko Ngo noitsün tsülongei au thaiutha, nung amkham khako tsüyanthsüokün khaiuniahoi apem lükoman.”

⁴Israel haiüh angiotsün angkü nung tsüyanthsüokün khaiunia apem ngüso saothang ainou pechiai koman.

⁵APAOU nou Mosa hau

⁶Israelhai thaiutha ayamhan nungso kium: Tilai khaiunia ajantso APAOU ko thakü tsünoikünai naiuso khaiunia ajantso thako aphio sunlo nai,

⁷apaüh meshen angei pheksanao noin naiuso aphopthio tsom tsak nou ko haoson eknime hakü apaüh phiotsün khaiunia hau asaotsün apem thamshiao noin.

⁸Lüko nung khaiunia eankü, athamshitsün kiuao thaiutha apa ashimting tsammong- hai sau tsünoikünai, nung APAOU hau meson thaiutha kiuwanao noin.Nung amai nou aphiowantsün khaiunia thaiutha alosiotsün amkham shanao onnemoktso kiutsün ko hakü noi-e.

⁹Loüh Israel haiüh amothi oukong chaithio APAOU hau thiotsün nung ngüsoüh kiutsün meson haoson nou noi-e.

¹⁰Meson pungkü nou apa hau kiutsün chaithio nouso taiuao noin.

¹¹APAOU nou Mosa tü ngiom

¹²Israelhai hau nung ayamhannouso kiuao thoilutkü ngiom, tsammongnyiuajantso amao khaiuniakoajisiwop chhikü meshen tsammongpokomong tsükiushikü khuküapa longei-iu ta khaiunia ajantsoühyangkiukü thawaoau shiom, lükomitha tsünoi, naiuso apa ajisiwopchhi chhikü tsüthalo, tititenai tsammongnyiunou nung tsammongpokhako phi-ankü tha au shiom. Tsüdekünai tsammongnyiu nou totsammongpoko mongkiukü noi lüko, tsammongpo nou apa tsammongnyiukotsümongtsamkü thawao au shiom.

¹⁵Nungtin aküo sübao lünou tsammongpo nou apa tsam- mongnyiu meson hai dongai nialokü khu-e.Nungko apaüh jinyak wonne tsoi tsak nung chaithio au kankü khu-e, tiautenai nung pokü noin, lüko nungtü olip khaiutsom tsüdekünai angannyamkü jahtsün titso tsülolut au noin, tiautenai nung chaithio nou tsümongtsamkün tsammongpo ainou ngiotsüo nou awon nai tsangsheikü sungiao thaiutha chhitsün noin.

¹⁶Meson nou nyiuhai nou kha ai nialokü shiküta apa amthang nou khako tsakü noi-iao noin.

¹⁷Apaüh pulak tsakko asio khiam intso thiokü naiuso APAOU Nejenkhio ainou pu intso loküta khiam nai thiokü nungüh khiam khosakkü iula-i-e.

¹⁸Nungai meson nou nyiuhai nou khaiuke soktham küta nung jinyak wonne chaithio kantsün apa phamongai lethiokü taiu-e.Meson nou apa phamongai akhosak khiam naptsün lakthso sübao nou athesan kanjikanji nung seme.

¹⁹Nungai meson nou nyiuhai nou tü apa tsangkü ngiomong shinge shantsün ko mongchio ha au ngio-e. “Ni ajisiwop tsüchhikü naito, nung khiam kankü shitsün athesan nou ni tsütawai-e.

²⁰Lüko ni ajisiwop nou chhiankü noi naito,

²¹APAOU nou akhaiuniaso ongko anian athesan lünoi! Apaüh atsashe nouso henkü lüiula-i! naiuso athai pekkü lüiula-i!”

²²Nung athesan khiam athai ai nap- küta nungüh athaimongai methso kantsün ayam tsüthakü noi-e küta achettao mosaokü nai methso nou chette. Nungai nyiuhai nou, “Ngo mong- chioji; APAOU nou nungti lüchhi,” ta thala-e.

²³Nungai meson nou nung athesan nou satlo küta akhosak khiam thengkam nouko tsaothiokü wane.

²⁴Nyiuhai nou thsüokü kiakü iula-itsün khako apaüh nung nyiuhai hau khiam moshenkü nai,

²⁵meson nou nung nyiuhai nou phamongai nou wonne chaithio nou lo küta, nung semlokü APAOU tü amthang nai alosio chaithio kiu-e.

²⁶Nungthanko apaüh nung chaithio ainou phalam tsak loküta ajahtsün chaithio yang- sanao amthang nai jahkü chaithio kiu-e. Athon nai apaüh menyiu hau nung khiam shiuao kiu-e.

²⁷Nung nyiuhai nou ajisiwop chhikü noi naito, nung khiam nou akia thsüokü sungi-e, küta apa thai pekkü iula-e naiuso apa tsashe henkü shi-e.Apa nian apa khaiuniahoi ongko athesan tsak iula-e.

²⁸Lüko apa aphio tsünoikünaito, apa tü ti tsütawai-e, loüh apaüh methso chetau shiokü iula-e.

²⁹Khaiunia tsak apa tsammongnyiuühajisiwop chhi-iu ta intsoikü tsümongtsamkü nioveikia iulataoko nung ngiokhem nouso noin.Nung nyiuhai nou amthang khakoshiküta tsakü noi-e, naiuso nungsasa ao meson nou amkhamkü shane.

³¹Nyiuhai nou aphio nai noikü thalo naito, apaüh nung aphio mai thsa nou kane, lüko pohai nou to nung aphio ainou thakhu-e.