Read Khiamniungan Naga Haove 8 Bible Online

Haove 8 - Khiamniungan Naga bible

Haove 8

¹APAOU nou Mosa tü ngiom,

²“Aron tü tilai apaüh tson chinyat nouso tson taiuthang nai taiu-e, awon nou kha ai awon kiuao lümeikü lütaiu ta lüchite.”

³Aronüh angiotsün angkü tson taiutsün kha nai sheilutkü tson nouso taiu.

⁴Atsokting ainou asaothunting saokü tson taiutsün nung chaiou lakkeng nou meikü langkü APAOU nou Mosa hau ayam hantsün tsangkü nai shan.

⁵APAOU nou Mosa tü ngiom,

⁶“Israel khaiunia kau nouso ainou Levi kau mothikü ataiu küta ngüso

⁷nung saisile nousoli alosio: alosiotsün khiam nou ngüso tü lüsatlut küta ngüso tü tsopem thumkü lüiuwan naiuso ngüso neshe lüphetan ta lüchite.Nungai ngüso amkham tsangkü nai yanthsüokü noi-e.

⁸Küta ngüsoüh jangtso tsak naiuso apotsün chihsikhiam chaithio olip khaiutsom nouko wonne nou laowekü, alo, naiuso loüh angei chaithio thaiutha jangtsopong tsak alo.

⁹Küta Israel hoithum Ngü noitsün Nejenkhio khako kamshi- iküta Levi hai chongai tsakü noi-ikü ataiu.

¹⁰Israel hai apemüh ngüso pha Levi hai khaiu ai thanglut,

¹¹küta ngüso jüchhi chhiao Aronüh ngüso mothikü paopei tsakli Israel hai ong ainou losio.

¹²Levi haiüh jangtsopong nime, angei chaithio thaiutha tsak, naiuso amao tsak nou ajahtsün chaithio au taiutsün khaiu nai ngüso pha thanglute, nung Levi hai losioau thaiutha amkham tsak shantsün noin.”

¹³Ngü tü amothi paopei tsakli Levihai mothikü alosio; küta Aron naiuso apa thsoso ngüso khako apaotsangao taiukiu.

¹⁴Levi hai Israel hoi ong ainou nungti mothikü ataiu, nungaito ngüso jü haoson noi-e.

¹⁵Ni Levi hai losiokü naiuso thumkü kiukütün phiai, ngüso Nejenkhio nai chhisiya au maikü iula-e.

¹⁶Ngo ngüso Israel hai thsoyamchong nouso thangko theau shanlo, naiuso ngüso Ngü nou noin.

¹⁷Tilai Ngo Ijip nai thsoyamchong nouso apem loatan, Ngo jühaoson theao kau pungkü thsoyamchong nouso naiuso thainian kau pungkü chongting puntsün losiokü taiu.

¹⁸Israel hai thsoyam- chong apem liko Ngo lo Levi hai loji,

¹⁹naiuso Ngo Levi hai Aron naiuso apa thsoso tü Israel hai ainou paopei tsakli, Israel hai thaiutha Nejenkhio nai chhisiya ao naiuso Israel hai dongai aküothe shitsün ainou kipsanao thoilutji.

²⁰APAOU nou Mosa tü thoiluttsünli, Mosa si Aron naiuso Israel hai apemüh Levi hai losiokiu.

²¹Levi haiüh ngüso chija losiokü naiuso neshe phetan küta Aronüh APAOU tü ngüso amothi paopei tsakli losiokü kiu.Apaüh ngüso thaiutha alosio amkham shankiu.

²²Levi hai thaiutha APAOU nou Mosa tü thoiluttsün alum khaiuniahoi nou chhikü noiküla.Nungtiphe Levi hai Aron naiuso apa thsoso ayamhan khemko Nejenkhio nai chhisiya ao maikü iula.

²³APAOU nou Mosa tü ngiom,

²⁴“Pon eknimekü pungo ko yakü Levi hai pungkü nou Ngo noitsün Nejenkhio nai chhisiya nouso tsaloau noin.

²⁵Küta pon aopungo ngoi nai apa chhisiya ainou laowanao noin.

²⁶Nungphiai apaüh Nejenkhio nai meshen Levihoi chhisiya nai hachu au noin, lüko apa chija nou ti amkham chhi tsüchhiao noin. Nungti ni Levi hai chhisiya asaita hau iulakü shanao noin.”