Read Khiamniungan Naga Mika 1 Bible Online

Mika 1 - Khiamniungan Naga bible

Mika 1

¹Yihudahai nokpaohoi: Jotham, Ahaz, naiuso Hezekia so taoko nai Moreshet hai noksong ainou Mika hau APAOU nou nung ngiongem kiu. Nung chikü APAOU nou Samaria naiuso Yirusalem thaiutha atsangshei kiukü noiküla.

²Asam mele nouso chikü nou nung alula; goumchi nai kihtsün asam chikü nou nungtü anglu! Akhengting APAOU nou asam thako mitha kiu-e. Anglu! apaüh aün amkham tsam ainou ngioji.

³APAOU apa asiothang ainou shiji; apa saokü king atsokting nouso chiai tsakei-e.

⁴Nungaih king nouso apa khako yaptson khekkü khiamane; king ainou khiam tsangitsün khekkü tsamei nouso ai tsangthio-e.

⁵Israel haiüh APAOU khengshikü angei sun nou shioko nung chikü thawao-e. Israel ün akhengshi thaiutha sau thsale? Nung Samaria noknio ateng nou thsale! Yihuda nai sotsom kankeitsün sau aphio? Nung Yirusalem aphio!

⁶Nungtiphe APAOU nou ngioji, “Ngo Samaria nung sainaoshep pai thomau beisikin kamsan taiutsün khengtaiu tsak hau shane. Ngo noknio beisikin nouso nung tsamei nai khepthio-e, naiuso nungko noknio athanya noulu taiukiu-e.

⁷Chaiou nou shantsün sotsom nouso nelangkü thiopekke, naiuso sotsom amkham tsam ajisiwop nousoüh chhitsün alum in nai jahwane, naiuso nungko sotsom nouso atheau tsümeishikü ongkü wane. Tiautenai ajisiwop nou chenji- kantsün ainou Samariaüh nung so kamsan, naiuso lo apa ehsoüh amao ai amkham tsam ajisiwop thaiutha kankü khuwane.”

⁸Nungaih Mikaüh ngiom, “Nung shioko ngo mongsaiukü shape. Jü amongsaiu hanau ngo hokje naiuso tsosa tsakei-e. Chiu nouli ngo oung-e, naiuso Ostrik waio mong- saiukü shitsünli noi-e.

⁹Samaria ün mou ameila au tsüshio-e, naiuso Yihuda lüko nung khekkü lu angja au noin, alothe nou jü khaiunia kihtsün Yirusaalem bekhan lüko saowaniu.”

¹⁰Sam shioheantsün thaiutha Gat nai sam ehso hau lachite; asam shaptsün ngüso hau la-epi. Bet Leafra hai, asam mongkiatsün pukhao ongnai chinkeikü ahan!

¹¹Asam Safir hai, tsosa naiuso miamkü asam goumchi wankü lükhu wan. Zanan nai kihtsünso, ngüso noknio ainou shikhuau tsüsom. Tilai asamüh Bethezel hai mongsaiutsün lula-e, nungaih asamüh nungko asolouau tsünoi ta ngela-e.

¹²Marot khaiunia hoi nousoüh aalou thaiutha mongchetkü taiuji, tiautenai APAOU nou nung aküothe Yirusalem shimkü kankü shikü noiküla.

¹³Asam Lakis nai kihtsünso akaolao, mokthso nouso ehli tsamkei nouso tü lüphanlut. Asamüh Israel hai angei nouso saihlou, naiuso Yirusalem hau angei sunhe-in.

¹⁴Lo, Yihuda khaiunia hoiso, asamüh Moreshet Gat hai noksong tü athon salam ta lüngio. Israel hai nokpao nousoüh Akzib noksong ainou ahalou titso tsüeppe.

¹⁵Maresha khaiuniaso, asam noksong thalouwanau noitsün ehoi hau APAOU nou asam lethiowane. Israelhai ahei hoi nouso khuküta Adullam lungken nai pamkü noian-e.

¹⁶Yihuda khaiuniaso, asamüh tsüojintsün methsoso thaiutha asam khaiusoi iuwankü lümongsaiu. Meahe letchehoi nouso khaio phoili, asam chija khaiosoi lüiuwanlou, tiautenai asam thsoso thaloukü khuwane!