Read Khiamniungan Naga Mika 2 Bible Online

Mika 2 - Khiamniungan Naga bible

Mika 2

¹Sauhaiüh tsüsailakü noikü tsümeikün mongthat thatji ngüso thaiutha inyate! Tilai ah-nou ngeji, ngüsoüh atao nou tsüwanan kü nung tsümeikün mongthat nou chhiji.

²Tilai ngüsoüh eiu nouso chinekji, ngüsoüh nung juolouji, naiuso tilai ngüsoüh tsam nouso chinekji, ngü- soüh nungso lowankiuji. Nungtiphe sau tsamkhaiu tsüdekünai jengtsaiu nungko thakhukü tsünoi.

³Nungtiphe APAOU nou ngioji, “Ngo asam khaiuko aküothe kankü shiau thatji, naiuso nung aküo ainou asam thakhuao tsüshio-e. Asamüh asam chija angja nai napankü ngesane, naiuso loto asam bülomkü tsakei-au tsüshio shi-e.

⁴Tilai nung atao shi-e khaiuniahoi nousoüh asam aküothe thawaotsün ngiolat kankei-e, naiuso asamüh yankü shitsün amongkia thaiutha ngüsoüh nung jih nou hange: Sam moisemkü mowaniu! Tiautenai APAOU nou sam goh lowan, küta sam thalouwantsünso hau kiuwaniu.”

⁵Nungtiphe tilai APAOU khaiuniahoi hau goh nou laokiuwan shiau atao shi-e, nung taoko to asam thaiutha haoson ti tsüha-e.

⁶Khaiuniahoi nousoüh ngü tü chimkü ngioji, “Sam tü nungso thaiutha ti lachim. Goa nou sam tsü- lomiame.

⁷Asamüh Israel khaiunia nouso athesan khemai noin ta yangji süne? APAOU mongaulaiu thonaniu süne? Apaüh nungtin atsüoting chhi- e süne? Ayamtha nou chhitsünso tü apa atsüojinyangkiutsün tsünoi-e süne?”

⁸APAOU nou thalakü ngioji, “Asamüh jü khaiuniaso tü ehoili pha pokü noiküla. Tsamai to aalou noin ta yangkü, khaiuniahoi nouso ehlithang ainou laokü shiji, lüko ngüso phakhut nouso kauatao taiukü noitsün asam noin.

⁹Asamüh jü khaiunia menyiuhoi nouso ngüsoüh tsüojintsün tsam nouso ainou komshi-an, naiuso ngo athon tsüyangkü ngüso thsoso ouk kiutsün kaulouwan.

¹⁰Tsalokü lükhu, tiautenai loto nungko aalou tsünoishi. Asam angei aküo tsangkü nung athang lomowan-e.

¹¹“Asam thaiutha ‘theng naiuso phop khiam tsangi-e ta khapiam ngio ngiokü yaang ngio nou miankü tsakeitsün e-po nung khaiunia nousoüh aiuji.’

¹²“Lüko asam Israel khaiunia hoi poikü noi nouso chikü ngo jon kame. Onnemok nou ahoi dongai laokü shitsün khekkü ngo asam niakame. Onnemok hoi nou meankü thsanyan noitsün athang tsak khekkü, jü khaiuniasoüh asam goumchi loüh jam miane.”

¹³Akhothiotsün ainou niashiau Goa nou ngüso thaiutha yam tsak sopkiu-e. Nungko ngüsoüh noknio bekhan nouso thuksatkü shikhu-e. Ngüso nokpao, APAOU, apa pemüh ngüso niashi-e.