Read Khiamniungan Naga Mika 3 Bible Online

Mika 3 - Khiamniungan Naga bible

Mika 3

¹Anglu, asam Israel nokpao nouso! Asamüh ngiotsüo thaiutha yang luao noiküla,

²külüko asamüh ti amei noin nung chinyan naiuso ti tsümei nung tü tsüojinji. Asamüh jü khaiuniaso aa khun noikü nou phe-an, naiuso ngüso nyih outü jingkü chi-an.

³Asamüh jü khaiuniaso he-an, naiuso ngüso khun ji-an, ngüso ou thiopek naiuso lak nai thengau nyih khekkü tapne.

⁴Asamüh APAOU tü we-au nou atao shiji, lüko apaüh asam tü tsüthala-e. Apaüh asam misao tü tsü-ange, tititenai asamüh tsümeikü chhin.

⁵Jü khaiuniaso, e-po hoi nouso tsangkü kausaiat, tititenai ngüso hau amai kiutsünso tü nokmei ta punglut, lüko amai tsükiukünso tü to ehli au punglut. Nung e-po nouso tü APAOU nou ngioji,

⁶“E-po hoiso, asam ajekhaiu yananau shimanji, asam chiai aje nou saowanji. Tiautenai asamüh jü khaiuniaso ayam tsüthakünai nialükhunphe, asamüh loto e-po atsangshei nouso tsüepshi-e, naiuso asamüh khapiam ngio titso ngiokiu shiau tsüshio-e.”

⁷Sauhaiüh ashiau thaiutha khapiam ngiokiuji ngüsoüh ashio tsüepkün shioko amiam eppe. Goa nou ngüso tü tsüthalaphe, ngüso apemüh amiam eppe.

⁸Lüko jü thaiutha auto, APAOU nou apa Onthso naiuso oukong nou ngü meaniji, naiuso ngü ngiotsüo nou ila au, naiuso Israel hai angei ti in nung pheksankü chite au ngü hau mongsong nou kiuji.

⁹Asam Israel hai nokpao nouso, ngü tü anglu, asamüh ngiotsüo chinyanji naiuso ayam atha nou tsüthakü hau phokleji.

¹⁰Asamüh aloat naiuso ngiotsüo tsüdekün athanya thekü Goa ün noknio Yirusalem lahsanji.

¹¹Noknio ün nokshing nousoüh nekhem paopei thaiutha shingji, meson hoi nousoüh Ngiokhem nou amai thaiutha thunshiji, e-po nousoüh atsangshei nou chaihe tsangshei kiuji, naiuso Goa nou ngüso ko hakü noin ta ngüso penji. Ngüsoüh ngioji, “Sam dongai angja ti tsüshi-e, APAOU nou samko hakü noin.”

¹²Nungtiphe asam thaiutha ko, Zion nung eiu khekkü a-pekke, Yirusalem nung alothean nou kamsantaiutsün tsak noi-e, naiuso Amkham Tsam king nung liutsa tsak hau iula-e.