Read Khiamniungan Naga Mika 4 Bible Online

Mika 4 - Khiamniungan Naga bible

Mika 4

¹Ashiau noitsün ajekhaiu nouso ko, Amkham Tsam noitsün king nung, choi nouso chikü khaiuko atsoktingau tsak the-e. Mele piakü nung dongai she-ekü kamshi-e,

²naiuso ngüso khaiuniasoüh ngio-e, “Sam APAOU king nai sungkü Israel hai Goa amkham tsamai khuko. Tititenai apaüh nungko sam hau chhi-iau mongchiotsün tsande-e, naiuso apaüh chosantsün yam nouko sam tsakei-i-e. Tititenai APAOU ün atsandetsün nung Yirusalem ainou shiji. Apa khaiuniaso tü apa Zion ainou chiteji.”

³Shimkü naiuso laiukü ai noitsün oukong asong nouso mongko, naiuso mele nouso mongko tsüjeiaikün mi apaüh lotsamkiu-e. Ngüsoüh sah nouso ken au lang-e, naiuso laih nouso paithsom sah au lang-e. Mele nouso ehli au tilaitso khemloukü tsü-iushi-e.

⁴Meshen sainaoshep eiu naiuso phiushep eiu mongko, sauühtso tsülohatkü khaiunia pungkü aalou nai kih-e, ta APAOU Akongting nou thalouwaniu.

⁵Mele pungkü nou meshen goa amkhamji naiuso angio angji, lüko samüh to APAOU sam Goa asaita amkhame naiuso angio ang-e.

⁶Ngo angja kiukü komankü noitsün khaiuniahoi nouso lokamshiau “atao nou shiji” ta APAOU nou ngioji.

⁷“Tsam ainou ngüso laiukü pungekü khukü ngüso phathe hokthe iulawaniu, lüko nungso apoitaiu nouso da ngo chhi ayan tsak chhiau yalou-e, naiuso ngüso mele asong tsak iula-e. Ngo nung atao ainou athon tsüyangkü ngüso khaiuko Zion king ainou nokshing-e.”

⁸Yirusalem, Goa nou ni, onnemok jimtsün khaiuniali apa khaiuniaso chiai ataojam anokshing mongko ni noknio ateng tsak noikü shitsünli loüh noi-ishi-e.

⁹Lo ni, sang asong nou wekü tiauta shapji? Menyiu tsak methso chet taoko omhetsünli ni tiauta omheji? Nung asam nokpao tsüha naiuso alotsüotsünso ean nou shioko süne?

¹⁰Yirusalem khaiuniaso, methso chet taoko menyiu tsakli thsathsakü lünget, tititenai ni lo noknio nou leankü kengpun nai kih au khuwane. Asam Babilon nai khuaulu noin, lüko nungko APAOU nou ni a-ehso ainou kipsane.

¹¹Mele piakü ni tü pha po-au kamshikü noin. Ngüsoüh ngioji, “Yirusalem lotheanau noin! Samüh nung noknio lotheankü eppe!”

¹²Lüko nung mele nousoüh APAOU mongyang ti noin tsünge. Tsonyak nou anya au kankü shitsün khekkü ngüso lüko angja au jonkamkü taim ta ngüsoüh tsüngela.

¹³“Yirusalem khaiuniaso, khuküta asam ehso hau angja lükiu! ta APAOU nou ngioji. Ngo ni son ong naiuso daoson thsan pokü noitsün jangtso- pong tsakli shankiu-e. Ni mele piakü ngampekke, naiuso ni, ngüsoüh kojakü kamhetsün jengtsaiu nouso ngo goumchi apem APAOU hau thumkü kiuwane.”