Read Khiamniungan Naga Mika 5 Bible Online

Mika 5 - Khiamniungan Naga bible

Mika 5

¹Yirusalem khaiuniaso, asam süpaiso akamshi-an! Sam lem- louwaniu! Ngüsoüh Israel ahei hoi nouso tü pha poji!

²APAOU nou ngioji, “Betlehem, Efrata, ni Yihuda nai noksong nouso ongko ehenting tsak noin, lüko ni ainou Israel thaiutha nokpao tsak akhengting tsamkhaiuling ainou sungi-e.”

³Nungtiphe menyiu nou apa thso melothso tsak nou mochetkiukün lektso APAOU nou apa khaiuniaso ngüso ehso hau le-ane. Nungphiai apa khaiuniaso sauhai thaloukü khuwantsün nai noin ngüso meshen khaiuniaso ko jeiai shi-e.

⁴Apa tilai shi-e, apaüh APAOU nou kiutsün oukong naiuso Goa ajinka nou meshen khaiunia nokshinge. Apa khaiuniaso aalou nai kih-e tiautenai goumchi khaiunia chiküüh apa asong thaiutha wesane,

⁵naiuso apaüh nokmei nou kankü shi-e. Tilai Asiria hai sam goumchi komau ehüthang lothekü shinape, nungaih ngüso ko lih-au samüh akongting ahei nouso honge.

⁶Chon- siyam oukong tsangkü ngüsoüh Nimrod hai goh Asiria shiolou-e, naiuso tilai ngüsoüh sam goumchi kome, ngüsoüh sam Asiria hai ainou kipsane.

⁷Thaloukü khuwantsün Israel hai ongko aa poi nouso mele piakü thaiutha paisam aosam chiai APAOU nou hongtsün ah-ou khiamle khekkü noi-e. Ngüsoüh khaiunia da tsüdekü Goa da amonglam taiu-e.

⁸Sauhai mele nouso ongko poian, ngüso to-Thsanyan noitsün athang tsak tsüdekünai liutsa tsak nai chong- khao tsak eheshiu humkü tsakeitsün khekkü noi-e, apa onnemok hoi ongai napkü ngüso tü poji küta aa shiau ayang tsünoikü ngüso chipekkü he-anji.

⁹Israelüh apa ehoi apem thamokü shiolou-e.

¹⁰APAOU nou ngioji, “Nung taoko ngo asam mokthso naiuso ehli tsam- kei nouso kankü khukü lotheane.

¹¹Naiuso ngo asam goumchi nai noknio nouso lomokü naiuso ehüthang nouso lothekü wane.

¹²Naiuso asamüh kankeitsün alonga oukong nouso ngo lomowane küta asam aküo ngiokiutsün tsünoishikü le-ane.

¹³Ngo asam sotsom goa naiuso asiolung kheam nouso lotheane naiuso loto asamüh shan- tsün jengtsaiu nou da tsüamshi-e.

¹⁴Ngo asam goumchi nai Ashera menyiu sotsom goa nou lopengane, naiuso asam noknio nouso lomokü wane.

¹⁵Jüngio tsü-angkün mele nouso da ngü amongmat asongting nou phao shane.”