Read Khiamniungan Naga Mika 6 Bible Online

Mika 6 - Khiamniungan Naga bible

Mika 6

¹APAOU nou Israel tü khengshi- tsün mi ta anglu: Atsalou, küta king nouso khako ami lüchite; ni ngioau noitsün choi nouso hau lüngela-i.

²Asam king nouso, athon tsüyangkün goumchi athanya nouso, APAOU mi tü anglu! APAOU nou apa khaiuniaso tü khengshikü mi tsak taim. Apaüh Israel hai thako nung mi welut-e.

³APAOU nou ngioji, “Jü khaiuniaso, ngo asam tü ti chhin? Ngo ni titi thsale iula-i? Ngü tü athashi.

⁴Ngo ni Ijip goumchi ainou niasan, ngo ni sua ainou kipsan; ngo asam niakeiau Mosa, Aron, naiuso Miriam so hong.

⁵Jü khaiuniaso, Moab hai nokpao Balaküh asam tü ti chhiau that taiukü noiküla naiuso Beor thso Balamüh apa tü titi thalashin nung lüyangsan. Akacia saothang ainou Gilgal ai khutsün yamko thawaotsün chhisiya nouso lüyangsan. Nung chhisiya nouso yangsan nai ngo asam kipsanau ti chhikü noiküla nung thaiutha asamüh ila-e.”

⁶APAOU aün Goa amkhamau shinai ngo ti kane? Ngo apa hau jangtso ameiting ajah chaithio kiuao kankü shi-e süne?

⁷Ngo onnemok hengsiheng tsüdekünai olip-khiam alao tsüyangkü tsangtsün chaithio kan nai APAOU monglinge süne? Jü angei thaiutha ngo jüthso nioyamchung nou apa hau chaithio kiu-e süne?

⁸Tsüde, APAOU nou ti amei noin nung sam hau chiten. Apaüh sam ainou potsün to nung noin: Ngiotsüo ti noin nung chhiau, tsü laokü atsüojin hanau, naiuso sam Goa ko jeiaikü naiuso nyaploukü kih-au.

⁹APAOU lon hat au ayam noin. “Asam noknio nai kamshikü noitsün khaiuniahoi anglu, ta APAOU nou noknio tü jonji.

¹⁰Tsümeikün khaiu- niahoi tsamai ngüsoüh ngiotsüo tsangkü tsüdekü eptsün jengtsaiu nouso taiuji. Ngüsoüh ngo chinyan- tsün yaang tsoithat kankeiji.

¹¹Yaang tsoithat kankeitsün khaiu- niahoi hau ngo titi wankiu-au shio-e?

¹²Asam memei khaiunia nousoüh tsosilu hai thangmangji, naiuso asam apem mepumhoi noin.

¹³Nungtiphe asam angei shioko asam lothekü lomowanau ngo tsalouwaniu.

¹⁴Asamüh he-e lüko tsüdokke- asam naiulutkülu noi-e. Asamüh jengtsaiu nouso lüko nungso taiulouau tsüshio-e; asamüh tso tsak taiulou nai ngo ehli nai lomowane.

¹⁵Asamüh lelo nou lethio-e, lüko be-eiuyam tsüyame. Asamüh olip khiam thipsane lüko nung tilaitso tsükankei-e. Asamüh theng shane lüko nung tilaitso tsüshiu-e.

¹⁶Asamüh Omri nokpao naiuso apa thso Ahab neüh tsümeikü chhitsün yam tü hoilut nou thaiuthako nung thawao-e. Asamüh ngüso ayang nai tsülaokü hoilutphe, ngo asam lomowane, naiuso khaiunia pungkü nou asam tü chinyane. Khaiuniahoi nousoüh alumai asam lochikü kankei-e.”