Read Khiamniungan Naga Mika 7 Bible Online

Mika 7 - Khiamniungan Naga bible

Mika 7

¹Jü thaiutha inyate! Shep-pai nouso da shep tsaktso eiukü tsüep naiuso sainaoshep auo nouso da shep eiukü tsüeptsün naiusile khaiunia tsak khekkü ngo noin. Sainaoshep nouso apem naiuso phiu shep nouso chikü panlouwaniu.

²Goumchi nai saitha khaiunia tsaktso tsüpoishi, Goa ko ngiotsüo tsünoi. Khaiunia pungkü nou she loshiau thaiuthalu aküo nou tü taiuji. Khaiunia pungkü nou meshen paiusihai tü lu humkeiji.

³Tsümeikü chhitsün nai ngüso thatü khaolaoji. Asonghoi naiuso mikhem hoi nousoüh nekhem paopei ta saoji. Asong khaiunia nou ngüso tü apaüh aiutsün chiteji, naiuso nungti ngüsoüh aikü kamshikü dunsanji.

⁴Ngüso ameiting naiuso thatü saithating nouso lüko tiau tsüthekün chih ai nouso khekkü noin. Ngüso ehü au thetsün e-po nouso tsangkü apaüh ngüso lotsüo kü shitsünli Goa nou khaiuniahoi nouso angja kiuao ajekhaiu shikü noin. Lo ngüso apülai nai noin.

⁵Aphaosipo da lamonglam tsüdekünai ahai da amonglam lataiu. Atsammongnyiu tü lüko ni ti ngioji tsüokü lüthe.

⁶Nung tao nouko thsohaiüh meshen poso tü mainga khekkü kankeiji, menyiuthso nousoüh ngüso nyiuso tü khengshiji, naiuso thsoso tsammong- nyiu nousoüh meshen nyaiko liheji; khaiunia tsak ün eh nouso meshen tsamkhaiu mongkolu noin.

⁷Lüko ngo to APAOU tü jime; Ngü kipsanau noitsün jü Goa tü ngo mongsongkü taiu-e. Jü Goaüh ngü jontsün lula-e.

⁸Sam ehso sam chiai bülomat au ti ayam tsünoi. Sam loianiu, lüko sam loüh tsashi-e. Sam lo anyakhem nai noin, lüko APAOU nou sam hau awon nou kiu-e.

⁹Samüh APAOU thako angei sunlou-iu, nungtiphe lo samüh atao letletkü thaiutha apa amongmat jeilouau noin. Lüko athon nai apaüh sam kiplou-e naiuso sam tü tsüthakü chhitaiu nou lothakü taiukiu-e. Apaüh sam awon nai niashi-e. Apaüh sam kipsantsün samüh epau lümeikü sam kih-e.

¹⁰Nungaih “asam ün APAOU Goa tiai noin?” ta lochikü sangtsün sam ehso üh epkü miammat-e. Samüh ngüso yamkheng nouso ko puchet khekkü ngamthiowankü naiuso shioheankü eppe.

¹¹Yirusalem khaiuniaso, noknio lungpe nouso shanshiau atao nou shiji. Nungh taoko nai asam goh elung nouso losungshi-e.

¹²Ajepek Asiria ainou, ajepekki Ijip ainou, Eufrat khiamkhan ainou, khiamnok naiuso king alaiuting nouso ainou, alumai nou akhaiuniaso adongai laokü shi-e.

¹³Lüko goumchi nou singtso goh au iula-e, tiautenai nungko kihtsünsoüh chhi tsümeikün chhiji.

¹⁴APAOU, ni chosantsün akhaiuniaso chiai ni ajimtsün athe. Ngüso pungekü liutsa goh nai kih lüko, ngüso lemkü gohtsa goh nouso noin. Kümei taoko ngüsoüh chhi- tsünli, ngüso khukü Bashan naiuso Gilead Tsamei thsanyan saiukü noitsün nai lütsad.

¹⁵APAOU, ni sam Ijip goumchi ainou niasantsün ajekhaiu nouso ko chhitsünli sam thaiutha athanga chhisiya nouso achhi.

¹⁶Mele nousoüh nung epkü ngüso oukongkü noilüko, ngüso ouchankü iula-e. Alekkat nou ngüso sonkou memshi-e, naiuso ngüso noukhan thajei-e.

¹⁷Ngüso pukhao nai paohoi khekkü chinkei-e; ngüso ehüthang ainou hatkü naiuso ngaongaokü saowane. Ngüso ahat nai sam APAOU Goa dongai phokle-e.

¹⁸O APAOU, ni khekkü amao goa tsünoi, ni akhaiunia apoi nouso angei wankiuji. Ni asaita mongmatlutkü tsünoiji, lüko ni nou atsüojinyang sam hau hanau ni amongchiotsün noin.

¹⁹Ni sam da loühjam atsüojinyang noishi-e. Ni sam angei so ahok üh ngamthio-e, küta nungso khiamnok athanting nai hongthio- wane!

²⁰Ni peh nai sam paosiposo tü thaloukü taiutsünli, Abraham naiuso Yakob thsaosithso akhaiuniaso tü ni mongkiutsün naiuso asai atsüojin hane.