Read Khiamniungan Naga Nahum 1 Bible Online

Nahum 1 - Khiamniungan Naga bible

Nahum 1

¹Nineve thaiutha ngiongem nung, Elkos hai nou Nahum tsangkü atsangshei eptsün noin.

²APAOU Goa nou akhengshitsün tsüjeitaiuji; apa tü khengshitsünso hau apaüh angja kiuji. Apa mongmat nai ngüso tü phao sanji.

³APAOU liukü mongmat tsüsungji, lüko apa to oukongting noin, naiuso aphio nouso hau tilaitso angja tsükiukü tsüle-anji. Tilai APAOU nou tsakeiji nungaih ah-ou-ahsheih nou sunghji; naiuso thengmia nouso apa hoküh losantsün pukhao nouso noin!

⁴Apaüh khiamnok nou tü ngiokhem kiuji, naiuso nung apkü shi-anji! Apaüh haiu nouso apan-iji, Bashan khengliu nouso wonanji, Karmel king po-ikü khuwanji, naiuso Lebanon nai taopon nouso shei-anji.

⁵APAOU khako king nouso ngao ngaoji; apa dongko king nouso mowanji. APAOU epnai goumchi nou haiu haiuji; naiuso nungko noitsün khaiunia chikü ngao ngaoji.

⁶Apa mongmat nai sauüh jeilouau shio-e? Apa thsüokü mongmat nai sauüh jeilouau shio-e? Apa amongmat in nyaili thukshiji; apa khako lung nouso pu-ao iulaji.

⁷APAOU to amei noin; angja taoko apa khaiunia apaüh kiplouji, apa dongai shitsünso apaüh paotsangji.

⁸Khiampek athsüoting tsangtsün khekkü apa ehoi apaüh moisemkü lomowanji; naiuso apa tü khengshitsünso apaüh loatji.

⁹APAOU khengshikü asamüh ti tsümeikün mongthat thatji? Apaüh asam lomo-e. Jam nou chiai to sauüh apa tü khengshiau tsüshio.

¹⁰Tsaosiang naiuso tsokapwonli asam jimtuk nouso chethe-ane!

¹¹Nineve, APAOU, khengshikü thattsün, akausai mongthat nou miankü noitsün khaiunia tsak ni ainou sungkü noin.

¹²Israel hai tü APAOU nou nung ngioji, “Asiria hai khaiuniahoi oukongkü naiuso piakü noilüko ngüso tsüepshikü lomo-e. Jü khaiuniaso, ngo asam angja-in, lüko ngo nung müjam tsüchhishi-e.

¹³Ngo lo asam chiai Asiria hai oukong noitsün lomowane, naiuso asam ketsün sonkhiang lothatkü wane.”

¹⁴APAOU nou Asiria hai thaiutha nung ngiokhem kiu-iu: “Ngüso nian thonlükhunshiau ngüso thsaosi- thsoso tsünoishi-e. Ngüso goa amkham tsamai sotsom nouso ngo lothean-e. Asiria hai aa noiau tsümai, nungtiphe ngüso thaiutha ngo meakhanthang tsak khemlouji!”

¹⁵Athaplu, king nouso chiai ngem amei kankü ngiongem kantsün tsak shiji! Apa ashioloutsün ngiongem welutau shiji! Yihuda khaiuniaso asam sümai lüsaohe naiuso asamüh mongkü thaloutaiutsün Goa hau lükiu. Tsümeikünsoüh tilaitso agoumchi tsüyamshi-e. Ngüso thumkü mowaniu!