Read Khiamniungan Naga Habakuk 1 Bible Online

Habakuk 1 - Khiamniungan Naga bible

Habakuk 1

¹Nung E-po Habakuk hau APAOU nou atsangshei kiukü hantsün ngiongem noin.

²Oh APAOU, ni mo-anglukün khako, naiuso sam hau angja kiutsün ainou mokipsankün khako, ahalouau thaiutha ngo tilektso jone noi-e?

³Ni ngü hau nungtin omhe angja tiauta epiji? Ni aphio chhitsünso tü tilektso jeiloukü thapkü noi-e? Ngü lemkü alothe naiuso pha po-etsün nou miankü noin, naiuso alumai ali-e naiuso akhengelu noin.

⁴Ngiokhem nou tsükongshi naiuso yaang naiuso ngiotsüo nou tilaitso tsüchhishi. Tsümeikün khaiunia nousoüh asiohoi nouso khengiji, naiuso nungti ngiotsüo nou kheple-anji.

⁵Nungaih APAOU nou apa khaiuniaso tü ngiom, “Asam lemkü noitsün mele nouso tü thapkü lünoi, nungko asamüh eptsün tü asam lekkate. Asamüh nung thaiutha lulanai, asamüh mong tsülamkü hau lümeikü ngo tso tsak chhiau noin.

⁶Ngo ahating, tsüsangkün khaiuniahoi noksang nai shi-iau noin. Ngüsoüh amao goumchi nouso shiolouau tsalouwanji.

⁷Ngüsoüh ahat naiuso alekkat nou mian-iji, naiuso ngüso bülomtsün nai ngüso chija ngiokhem shanlouji.

⁸“Ngüso mokthso nouso king khao nou tü khaolaokü, naiuso naiukü noitsün chiu nouso tü hah jengkü noin. Ngüso mokthso chiai noikü athang laiukü ainou shiji, ngüso mokthso soüh goh nou da chanji. Letche nousoüh eheau epnai langthiokü nappotsünli ngüso noin.

⁹“Ngüso süpaisoüh thatü jeekü pokü shiolouji, naiuso ngüso shisao- nai khaiunia chikü lekkü hattatji. Ngüsoüh thaloutsün sua nouso singtsoli aweau tsüshiokü apiating noin.

¹⁰Ngüsoüh nokpao nouso tsü- wesankü kankeiji naiuso asonghoi nouso tü nyailutji. Ti ehjiothangüh ngüso loyangau tsüshioji, ngüsoüh goh nou hongsankü saisanji küta nungtü sungkü shiolouji.

¹¹Naiuso ngüso ahsheih khekkü khaolaokü shiküta khuwanji, nung khaiunia nouso goa to ngüso oukong noin.”

¹²APAOU, ayating nai yakü nito Goa noin. Ni asio naiuso athon tsüyang jü Goa noin. APAOU jü Goa naiuso asoloutsün, sam angja-iau ni Babilon hai chosan küta oukongkü shankiu.

¹³Lüko akausai tsümeikün khaiuniahoi khako ni titi mongau laiuji? Tsümeikün tü thapau to aniovei thatü asio noin, naiuso tsüthakü chhitsün khaiunia nou tü thapau ni tsüshioji. Nungaito ngüso chiai tekkü siokü noitsün khaiuniahoi ngüsoüh angja-i nai, ni tiauta tsüsingiokü noianji?

¹⁴Ngou tsüdekünai paosung hoi nou ngüso yam hanau nokpao tsünoikün khekkü to nung khaiunia nouso tü ni titi kankeiau shioji?

¹⁵Babilon haiüh chonshang nou khaiunia nouso ngou khekkü thalouji. Ngüsoüh khaiuniahoi nouso ngüso nyao mongai tenlükhunji naiuso nung thaloutsün thaiutha naiuso ngüso sangh asong nou wekü koiheji!

¹⁶Ngüsoüh nyao nouso tü lüko aloat chaithio kiukü amkhamji, tiautenai ngüso hau ameiting nou alum ngüso nyao tsangkü chhikiuji.

¹⁷Ngüsoüh ngüso sahsingio asaita kankeikü mele nouso tü atsüojinyang tsühankü angja ani-e süne?