Read Khiamniungan Naga Habakuk 2 Bible Online

Habakuk 2 - Khiamniungan Naga bible

Habakuk 2

¹Ngo jü ehü tsamthong nai sungkü APAOU nou tü ngü namnamtsün thaiutha ti thala-e naiuso ngü tü ti lüchite ta ngio-e, nungtü thapkü taiukü noi-e.

²Nungaih APAOU nou ngütü nung thashin: “Jam thapnai sasakü wesanau shiokü hau, ngo ni tü atsangshei hantsün lungkhio nou tü tsangsheikü lüsatlut.

³Nung lüsat- taiu, tiautenai nung atsüo thawao au thaiutha atao noishin. Nung atao nou liukü shiji, naiuso ngo ni hau ti hanji nung atsüo thawao-e. Nung yamlukü shijili yange, lüko nungtü taiukü lünoi, nung tsütsangkü atsüoting thawaokü shi-e.

⁴Nung ngiongem nungti noiküla: ‘Sauhai tsümeikü noin nungso tsü-asane, lüko sauhai asio noin ngüso asane, tiautenai ngüso Goa da mong kiukü noin.’”

⁵Atsüomei memei nou to asap- thiotsün noin. Pumsiwom khaiunia nouso to bülomji naiuso sangkü tsünoiji- eantsün laitso mongtsam tsüthasangtsün khekkü ngüso noin. Nungti ngüsoüh mele tsak jam tsak jam shiolouji.

⁶Tsüshiohekün khaiunia nousoüh ngüso shiohe- antsünso tü thatü lochi lotsaokü ngio-e, “Asam thaiutsüdekü nou asamüh lowanji, asam inyate! Asam chailaiutaiutsünso tü kojakü saohetsün tsangkü asam tilektso memei lükhune?”

⁷Lüko asamüh tsünge-ankü asam amaohai shioloutsünbao aphop hakü kiu-au chailaiu iula-e. Ehoi nouso shikü asam ngao ngao-i-e, ngüsoüh asam kamhe-ane!

⁸Asamüh mele piakü kamhe-ankü noin, tiautenai nung asamüh goumchi khaiunia nouso tü naiuso noknio nouso tü she loshikü tsümeitingkü chhitsün thaiutha ko lo sauhai aasankü noin nungso hau asam kamhe-ani-shi-e.

⁹Asam inyate! tiautenai asamüh ayam tsüthakü loutsün tsangkü asam tsammong memei shanlou-iu, naiuso asam tsamkhaiu atawai si ahat ainou kipsankü taiulou-iu!

¹⁰Lüko asamüh thattaiutsünso tsangkü asam tsamkhaiu ai amiam kankü shi-iu; mele piakü lomowan- tsün tsangkü asam chija asamüh asam lothelowaniu.

¹¹Lungpe nousoüh lüko asam tü khengshikü weji, naiuso uolosat nousoüh alangtha nai thashiji.

¹²Asam inyate! asamüh noknio tsak athanya nung ngiokhem lothetsün tsangkü shanji, naiuso she loshitsün nou nung lahsanji.

¹³Asamüh shiolouwantsün mele nouso yaangtingkü jei-elat-in, naiuso ngüsoüh shantaiutsün apem inmut au iulawan. Nung APAOU Akongting nou chhin.

¹⁴Lüko khiamnok nou khiam nou miankü noitsünli goumchi nou APAOU ajinka nou miane.

¹⁵Asam inyate! asam amongmat nouko asamüh asam phaosiposo tsüwesankü lomiam, ngüso thengtuk haili ki-e ki-e khukü tsakei-e.

¹⁶Asuhat liko phokleshikü asam amiam nou louji-e. Asamüh shiuküta asam ki-e ki-e khukhukü tsakei-e. APAOU nou asam angja thengkam asam hau shiu-i-e, naiuso asam wesankü noitsün asuhat amiam au phokle-e.

¹⁷Asamüh Lebanon liutsa lang sathiowantsünli lo asam sathiowane. Asamüh nungso thainianso loat, lo thainian nousoüh asam loat shi-e. Asamüh goumchi khaiunia nouso tü naiuso noknio nouso tü she loshikü tsümeitingkü chhitsün thaiutha ko asam tü nung thawao-e.

¹⁸Sotsom tsak nung ti alesan noin? Nungto khaiunia nou shantsün jengtsaiu tsaklu noin, nungüh asam hau yaang nou tü simkü titso tsüchite-e. Nung sotsom shanpao nou achiteau tsüshiokün goa da tiautabao monglamjiya!?

¹⁹Asam inyate! asamüh paiyan tsak tü, “Achu!” tsüdekünai lungpun tsak tü, “Atsa!” ta ngioji. Sotsom goa tsaküh ni hau tso tsak atsangshei hanau shio-e süne? Apa to tangkason naiuso chaiou lakkeng nou shantaiu lüko nungda aa nou tsünoi.

²⁰APAOU, apa asio Amkham Tsamai noin, goumchi khaiunia pungkü nou apa khako ti tsüsingiokü anoi-i.