Read Khiamniungan Naga Habakuk 3 Bible Online

Habakuk 3 - Khiamniungan Naga bible

Habakuk 3

¹Nung E-po Habakuk misao noin:

²Oh APAOU, achhi thaiutha ngo lula-iu, naiuso ngo ahat nou miankü noin. Ni chhikü shitsün chhi asong nouso, lo sam taoko lüko achhishi. Ni mongmattsün tao lüko atsüojinyang ahan.

³Goa nou loüh Edom ainou shiji; Paran choi nouso ainou asio Goa shiji. Apa ajinka nou aün nouso kapjeiji; naiuso goumchi nou apa lomsantsün nou miankü noin.

⁴Ahsalap ou nouko apa shiji; Awon nou apa pha ainou jeeji, nungko apa oukong tsangpokkü noiküla.

⁵Apaüh apa khako imkia nou hongji, naiuso nungtü ee nou hoilutau thoilutji.

⁶Tilai apa laoloji nungaih goh nou saiusaiuji, apaüh thapnai mele nouso ngaongaoji. Pe taoko apa tsakeitsün athontsüyang choi nouso, asaita noikü shitsün king nouso paipek kü thamthiowan.

⁷Ngo Kushan khaiuniahoi nouso hatkü, naiuso Midian khaiuniahoi ngao ngaokü ep.

⁸APAOU, ni shantaiutsün haiu nousoüh mongmat-i süne? Ni shantaiutsün khiamnok nou ni mongsongiji süne? Ni akhaiuniaso dongai ashiolou nou kankü shinai, ni thengmia nouso chiai moknoi; nungko ah-ou-ahsheih thengmia nou ni nou ehli tsamkei noiküla.

⁹Ni chon nouso kopau a-uokop pai khemloukü noiküla. Ni da sungtsün ahsalap nou goh paipek.

¹⁰Tilai king nousoüh ni ep, ngüso ngaongao naiuso maou ainou khiam tsangi. Goh kheiai noitsün khiam nouso ngao, naiuso nungh peksantsün tsokkü sungh.

¹¹A-uokop chon khaolaokü khutsün ko uotsün nou, naiuso alaih ajinka uotsün nou, aje naiuso alei tsülemlemkü noin.

¹²Ni amongmat nai goum nou yankü tsakei, ni amongsungh nai ni mele nouso ngamthio.

¹³Akhaiuniaso naiuso ni chosantsün nokpao kipsanau ni khu. Tsümeikün ahei ni shiothiowan, naiuso apa sahoiso moisemkü lomowan.

¹⁴Apa süpai ahei nou tü achonüh thsatkü pep, sam pengpun-iau ngüso jüdongai goa ah-ou-ahsheihli shin, tsosilu hai tü akau ai thangmangtsünko ngüso bülomji.

¹⁵Amokthso soüh khiamnok nou da ngamkei, naiuso khiampek akongting nouso chiukü sungh.

¹⁶Ngo nungso lulanai ngao ngaokü, ahat nou jüsonkou lemlem. Jüpem uochankü iula, naiuso jühokngam tsümongshi. Goa nou sam hau angja kiutsünso tü thamshitsün, atao shiao nou tü ngo nyankü taiu-e.

¹⁷Phiushep pai nou tü phiushep tsü eiu lüko, naiuso sainao nou tü sainaoshep tsü eiu lüko, olip shep tsü eiukü sapat lüko, naiuso eiu nai chih titso tsüsungh lüko, onnemok chikü ean lüko, thainian tsam nouso kengsanan lüko,

¹⁸ngo loüh monglingkü naiuso koikülu noi-e, tiautenai APAOU Goa Jü Akipsantsün noin.

¹⁹Akhengting APAOU nou ngü hau oukong kiuji. Apaüh jühok jinchai hokngam thangtsünli thangkü iula-iji, naiuso king nouso chiai ngü aaloukü taiukiuji.