Read Khiamniungan Naga Zephania 3 Bible Online

Zephania 3 - Khiamniungan Naga bible

Zephania 3

¹Yirusalem inyate! tiautenai nung alothe nou miankü, meshen khaiunia thangmangkü akhengshi noknio noin.

²Nung noknioüh APAOU tü tsü-ang tsüdekünai apa athatsam ayam hantsün tsülou. Nungüh APAOU da amonglam tsütaiu tsüdekünai apa ahachu thaiutha tsüsang.

³Mikhem hoi nouso achinek müjei nou asoh ainou ahom saokü nyi-ou tsak tso tsületaiukü hetsün thatü naiukü noitsün chiuhoi khekkü noin.

⁴E-pohoi nouso monglamau lümeikü tsüde, ngüso atsüo tsüdekün asapthiotsün jije, meson nousoüh asiothang nou lochinyanji, ngüsoüh Goa ngiokhem nou ngüso alesan epau kankeiji.

⁵Lo saokü APAOU nou noknio nai noin, apaüh ayamtha nou chhiji, naiuso tsüthakün tilaitso tsüchhiji. Ahom tsütokü, apaüh meshen khaiuniaso hau ngiotsüo nou kankü shiji. Külüko nungko noitsün tsüsiokünsoüh tsüthakünlu chhiji naiuso tsümiam.

⁶APAOU nou ngioji, “Mele nouso athum ngü moisemkü lomowaniu; ngo ngüso noknio lothean küta lungpe naiuso tsamthong nouso lothekü wanan. Noknio nouso aodangkü le-aniu, yamkheng nouso sau tsütsakeikü akeng wanan.

⁷Jü khaiuniasoüh ngü tü asuhat kiukü naiuso jü chhisathi loküta ngo ngüso hau ayam hantsün tilaitso tsüpe-e ta yangküla. Lüko ngüsoüh chhi tsümeikü chhiau shakta tsaloushi. Lüko ngo tilai ngüso saisile naiuso mele nouso aphio kiuao tsa-e, nungh ajekhaiu tü ataiu.

⁸Jü amongmat oukong ngüso hau hanau, si mele nouso, nokshing nouso, lokamau ngo jümongai thatsananiu. Jü amongmat in tsangkü nung goumchi athum lomowane.

⁹“Nungaih ngo mele nouso khaiu- niahoi li-eshi-e, naiuso ngüsoüh amao goa nouso tü tsüdekü Ngü tü lu misao sao-e. Ngüso chikü nou jüngio ang-e.

¹⁰Pengpunkü noitsün jü khaiuniaso Sudan saokü ainou soüh lüko ngü hau chaithio kankü shi-e.

¹¹Nungh taokoto asam jü khaiuniaso ngü tü khengshitsün thaiutha amiamau tsünoi-e. Tsüwesankü bülomtsün khaiunia pungkü ngo wanane, naiuso jü asio king nai ngü tü asamüh tilaitso tsükhengshi-e.

¹²Jüdongai nyaplokü naiuso shitsamkü ahachu thaiutha shitsünso khaiunia ngo nungko taiu-e.

¹³Israel khaiunia sauhai poisankü noin, ngüsoüh sau tütso tsüthakü tsüchhi-e, sauhau yaang tsüchite-e, tsüdekünai akausai au tsükowe-e. Ngüso tsüomeikü, aaloukü, naiuso saulon tsühatkü noi-e.”

¹⁴Israel khaiuniaso amongling nou wekü jih lühang! Yirusalem, amongpem thumkü nou lümongling!

¹⁵APAOU nou ni hau angja kiutsün laolouwaniu; apaüh a-ehso chikü komaniu. APAOU, Israel hai Nokpao niko hakü noin; loto ni ti thaiutha hat au tsünoi.

¹⁶“Zion noknio hatkü lanoi! Asam pha ouchankü lanoi! ta ngüsoüh Yirusalem tü ngioau atao nou shiji.

¹⁷APAOU a- Goa niko noin, apa oukongüh ni hau ashioloutsün kiuji. APAOU nou ni da mong lengkü noi-e, naiuso apa atsüojin nou apaüh ni hau aa ayan kiu-e.”

¹⁸Sümai taoko khaiuniahoi monglingetsünli, athaiuthako apaüh amongling nou jih hange. APAOU nou ngioji, “Asam aküothe epao noitsün ngo lothonaniu, naiuso ni nou amiam kankü khuwaniu.

¹⁹Atao nou shiji! Asam thangmangtsünso hau ngo angja kiu-e; Ngo chiune ehoi chikü kipsane, naiuso akoman nouso niakame. Ngo ngüso amiam nou awesantsün hau iula-i-e, naiuso goumchi apemüh ngüso lomsane.

²⁰Atao nou shiji! Ngo akhaiunia pengpunkü noitsünso niakame; Ngo goumchi ko asam aa sungkü iula-i-e, naiuso loühjam asam alum tsükhemkü shanshi-e,” ta APAOU nou ngiowaniu.