Read Khiamniungan Naga Hagai 1 Bible Online

Hagai 1 - Khiamniungan Naga bible

Hagai 1

¹Persia hai nokpao Darius nokshing nepon nouko, alei luok nou da chongting ajekhaiu nai APAOU ngio E-po Hagai tsangkü shin. Nung ngiongem nou Yihuda hai nokshing- paou Shealtheil thso Zerubabel, naiuso Akhengting meson, Jehozadak thso Yihusua thaiutha shikü noiküla.

²APAOU Apemshiotsün nou Hagai tü ngiom, “Nung khaiunia nousoüh APAOU Amkham Tsam lahshiau sam thaiutha loüh atao mosao ta ngioji.”

³Nungaih APAOU nou khaiuniahoi nouso hau nung ngiongem Hagai E-po tsangkü kium:

⁴“Jü khaiuniaso, Jü Tsam loiankü taiukü, tsam ameiting nai asam tiauta kihnoi-e?

⁵Asam tü ti thawaoji nung asamüh tsüepso?

⁶Asamüh chihle piakü siupeng lüko be-eiuyam thatü thsaokü yamhe-iu. Asamüh heshiuau chih taim, lüko nungüh asam thai tsümianji. Asamüh shiuau theng taim, lüko nungüh ale tsüthasangji! Asamüh neshe taim, lüko nungüh tsülamji. Naiuso chhi chhitsün khaiunia nou aa kih au saiukü tsüchensanji.

⁷Nungh tiauta tha- waoji asamüh tsüngeso?

⁸Lo, king nouso ai sungküta sat nou yamloukü aya, küta nungüh Amkham Tsam nou lülahshi, nungaito ngo mong- linge naiuso ngo da titi amkhamau noin nungti amkhami-e.

⁹“Asamüh be-eiuyam meikü yam- heau yang lüko nungso thsaothsaokü lu yamhen. Naiuso tilai asamüh be-eiuyam nou tsamai yamkan, nungh lüko ngo yaang soman-in. Ngo nung tiauta chhin ta yangji? Tiautenai jütsam to alothe nai taiukü asam khaiunia pungkü meshen tsam thaiutha chhitsün tsükengtingkü noin.

¹⁰Nungshioko ah- nou tsü-ou naiuso titso samsanau tsüshio.

¹¹King nouso, eiu nouso, sainaoshep eiu nouso, naiuso olip paidam nouso, goh ai eiusantsün chihle khiamle in diodio chiai, khaiunia naiuso thainian chiai, naiuso asamüh samsani-au lelo alum chiai, ah-tsü ou-au aküo nou ngo kankü shin.”

¹²Nungaih Zerubabel si Yihusua ne naiuso Babilon nai thaloukü khuwantsün ainou laokü yashitsün khaiunia chiküüh ngüso Goa APAOU nou ngüso tü ti chhiau ngiom nung chhin. Ngüsoüh APAOU ün ngiongem kantsün E-po Hagai lon hatkü angio angkü noiküla.

¹³Nungaih Hagaiüh APAOU ün ngiongem: “Ngo asam ko hakü noi-e, ta nung jü athalou noin” tü ngiotsün khaiunia nouso hau kiu.

¹⁴Amkham Tsam lahshiau APAOU nou Yihuda hai nokshingpaou Zerubabel, Akhengting meson nou Yihusua, naiuso thaloukü khuwan- tsün ainou laokü yashitsün khaiunia pungkü lothsümon. Ngüsoüh ngüso Goa APAOU Akongting tü amtsün Amkham Tsamlah chhi nung,

¹⁵Darius nokpaoüh nokshingtsün nepon nouko alei luok nou da ajekhaiu kheikü pülenyi nai tsalou.