Read Khiamniungan Naga Zekaria 1 Bible Online

Zekaria 1 - Khiamniungan Naga bible

Zekaria 1

¹Persia hai nokpao Darius nokshing nepon nou da alei petjei nouko nai, Iddo thsao nou Berekia thso E-po Zekaria dongai nung APAOU ngiongem shin.

²Akongting APAOU nou khaiuniahoi nouso tü ngioau Zekaria tü ngiom, “Ngü, APAOU nou apaosipo ko thatü mongmatkü noiküla,

³lüko lo ngü nitü ngioji, ‘Jüdongai laokü ashi naiuso Ngü asam dongai laokü shi-e.

⁴Asam paosiposo lito lathe. Pe nai e-po nousoüh, lito tsümeikün angei aakih nai lakihshi ta ngiokü ngüso hau jü ngiongem kiu. Lüko ngüsoüh nung tü tsü-ang naiuso jüngio tsüthe.

⁵Asam paosiposo naiuso nung taoko e-po nouso loto aah tsünoishi.

⁶Ngü yathsüotsün e-po nouso tsangkü ngü asam paosiposo tü thoilut naiuso lotsüokiu, lüko ngüsoüh nungso tsüwesan shioko ngüso nung angja chhi mai ep. Küta ngüsoüh APAOU ainou angja epau maikü noitsün ep naiuso nungh Ngü chhiau thattaiutsün chhin ta ngesankü mitha kiu.’”

⁷Nokpao Darius nokshing nepon nouko, alei chekü tsak küta kheikü pülenyi, (Shebat alei nouda) APAOU nou ngü hau asoh atsangshei ngiongem tsak kiu.

⁸Nungko ngü APAOU hong tsak mokthso aseng tsak chiai moknoikü ep. Apa tsamei tsak ko mirt-pai ajantso ongai laokü, loüh apa phiai mokthso alengsat aseng si athaiu pokü, noiküla.

⁹Ngü apa tü sangkü ngiom, “APAOU, nung mokthso nouso ti athat?” Apaüh thalan, “Nungso ti athat nung ngü ni hau han-e.

¹⁰Nungso APAOU nou goumchi apemai sailu au hongtsünso noin.”

¹¹Ngüsoüh hong tsakü noitsün hau chiten: “Sam goumchi apemai khulu nai, goumchi athum atsüojinau lümeikü shiohe-ankü epsan.”

¹²Nungaih hong nou ngiom, “Akongting APAOU, ni Yirusalem naiuso Yihuda hai noknio nouso tü losaokü nouko pon aochinyat mongmatkü shi-iu. Ni ngüso hau atsüojinyang mohankün khako nung tilektso noi-e?”

¹³APAOU nou hong nou tü monglolam ngio nou thashin,

¹⁴naiuso hong nou ngü tü Akongting APAOU nou ngiotsün ngio wepengau ngiom: “Ngü jü asio noknio Yirusalem thaiutha thatü aokü tsüojinkü yangkiuji,

¹⁵naiuso tsamkü aalou nai monglingtsün mele nouso ko ngü thatü mongmatji. Jü khaiunia khengshikü jü amongmat atao intso thaiutha laolokü noi taoko, nung mele nousoüh jü khaiuniaso loüh thsüokü omhe-in.

¹⁶Nungtiphe ngü Yirusalem ai noknio nou tü atsüojinyang hanau thaiutha laokü shin. Jü Amkham Tsam lahsanshi-e, naiuso noknio nou shanshi-e.”

¹⁷Hong nou ngü tü nung lüko lüwelut ta ngiom: “Akongting APAOU nou apa ün noknio nouso loühjam tsüomeikü iula-ishi-e, naiuso apaüh Yirusalem loühjam hachu shikü apa ün noknio ta ngioshi-e.”

¹⁸Amao atsangshei tsak ko ngü loüh jangtsopong ong püle ep.

¹⁹Ngü ko chitekü shitsün hong nou tü ngü sangh, “Nung jangong nouso ti athat?” Apaüh thalan, “Nungso goumchi oukong sübao nou Yihuda hai, Israel hai, naiuso Yirusalem hai, pengpun-in, nungliko tsatsün noin.”

²⁰Nungaih APAOU nou ngü hau chhi chhitsün khaiunia püle senkhaiuhop nouso hakü han.

²¹Ngü sangh, “Nung khaiuniahoi nouso ti chhiau shikü noin?” Apaüh thalan, “Ngüso Yihuda hai goumchi moisemkü lothean küta nungh khaiunia nouso pengpunitsün mele nouso lekkatikü shiolouwanau thaiutha shikü noin.”