Read Khiamniungan Naga Zekaria 10 Bible Online

Zekaria 10 - Khiamniungan Naga bible

Zekaria 10

¹Pon nouko thsanyan nyim taonai ah ou thaiutha APAOU tü lüsang. Khaiunia pungkü hau eiu sangnyakü noi-iau ah ou naiuso thengmia hongtsün nung APAOU nou noin.

²Khaiuniahoi nou sotsom naiuso aküo ngiokiutsünso tü sangji, lüko ngüsoüh thashitsün nungso yaang naiuso atsüotsüde. Ajantsoüh miamian nou lothatkiuji, lüko nungüh asam atsüotsüdekünai nialükhunji; ngüsoüh mongloutsam kiutsün nung ti atheau tsünoi. Nungtiphe khaiuniahoi nou iantsün onnemok hoili yam tsüngeloukü tsakeiji. Ngüso angja nai noin tiautenai ngüso ün ahei tsünoi.

³“Jü khaiuniaso tü nokshingtsün gohmao khaiunia nouso tü ngo mongmatji, naiuso ngo ngüso hau angja kiu-au noin, ta APAOU nou ngioji. Yihuda khaiuniahoi nouso ngü nou noin, naiuso ngo, APAOU Apemshiotsün nou ngüso paotsange. Ngüso ngü nou ehli mokthso akongting noi-e.

⁴Ngüso ong ainou jü khaiunia niakei-au nokshinghoi, aheihoi, naiuso süpai aniakeihoi sunge.

⁵Yihuda khaiuniahoi nung süpaihoi sübao nou ngüso ehoi yamkheng temchei nai ngamthio- wantsünli akongting tsak noi-e. APAOU nou ngüso ko hakü noiphe ngüsoüh mokthso chiai noitsün ehoi shiolou-e.

⁶“Ngo Yihuda khaiuniahoi oukongkü shan-e; Ngo Israel khaiuniahoi kipsan-e. Ngo ngüso tü atsüojinyang noikü ngüso nialoukü shishi-e. Ngo ngüso tilaitso tsüwananli ngüso noishi-e. Ngo ngüso ün APAOU Goa noin; ngo ngüso misao thala-e.

⁷Yihuda khaiuniahoi nouso süpaihoili kongkü noi-e, theng shiukü monglingtsün khaiuniahoili ngüso noi-e. Nung ashioloutsün ngüso thsaosithsosoüh yangshi-e küta APAOU nou ti chhin nung thaiutha ngüso monglingat-e.

⁸“Ngo jü khaiuniaso jonkü ngüso lokam-e. Ngo ngüso kipsan-e naiuso ngüso noikü shitsünli aweau tsüshiokü shan-e.

⁹Ngo ngüso mele nouso ongai pengpunan-i lüko, külüko laiukü ainou lüko ngüsoüh ngo yangshi-e. Ngüso si ngüso thsoso aasan-e naiuso aikü laokü shishi-e.

¹⁰Ijip naiuso Asiria ainou ngo ngüso nialoukü shi-e küta ngüso meshen shingkhannio nai kihloushi-e. Ngo ngüso Gilead naiuso Libanon ai lüko noilou-i-e; goumchi athum nung khaiuniahoi nou mian-e.

¹¹Ngüso tilai angja khiamnok nou yan-e, Ngo, APAOU nou nung khiampek nou tü shiuh-e, naiuso Nail Haiu akheiting saokü wailakü khu-e. Abülom Asiria nung lonyappe, naiuso akongting Ijip ün apa oukong mowan-e.

¹²Ngo jü khaiunia oukongkü shan-e; ngüsoüh jü ngio angkü ngo amkham-e.” Nung APAOU nou ngiowaniu.