Read Khiamniungan Naga Zekaria 12 Bible Online

Zekaria 12 - Khiamniungan Naga bible

Zekaria 12

¹Nung Israel thaiutha ngiongem noin. Apaüh ngioji, APAOU sauüh maou nouso sapengkü, goumchi nou sai, küta khaiunia hau aa nou kium, apaüh ngioji,

²“Ngü Yirusalem theng thengkam tsak khekkü shane, apa lemkü noitsün mele nousoüh nung shiu küta thengtuk khaiunia haili ngaongaokü tsakei-e. Naiuso tilai ngüsoüh Yirusalem lemlouwane, nungko Yihuda hai noknio apoi nouso lüko lemlouwane.

³Lüko tilai nung atao shi-e, ngü Yirusalem nung lung alethsang tsak khekkü shane, mele sauüh nung lung lokkanau kowe-e nungüh ngüso tawai-e. Goumchi mele oukong nouso chikü nung komhe-au kamsane.

⁴Nungtaoko ngü ngüso mokthsoso apem lekkati küta nungso chiai moknoitsün khaiu- niahoi mainga iula-i-e. Ngü Yihuda khaiunia nouso chiai jiokü thape, lüko ngüso tü khengshitsün ehoi ün mokthsoso apem niopek iula-i-e.

⁵Nungaih Yihuda kau nousoüh ngüso ongko ngio-e, ‘Apa khaiuniaso sauhai Yirusalem nai kihkü noin nungso hau APAOU Goa Akongting nou oukong kiuji.’

⁶“Nungh taoko ngü Yihuda kau nouso liutsa tsüdekünai chih nyankü noitsün eiu nouso jekthiowantsün in nyai tsak khekkü shane, ngüsoüh chenpa mele nouso apem lothean-e. Lüko Yirusalem khaiuniahoi to noknio nai aaloukü noi-e.

⁷“Ngü APAOU nou chongting nai Yihuda süpaihoi hau ashiolou nou kiu-e, nungtiphe David thsaosithsoso naiuso Yirusalem haiüh eptsün nianlom nung Yihuda hai apoi nouso chiai songkü tsüde-e.

⁸Nungh taoko APAOU nou Yirusalem nai sauhai kihkü noin, nungso solou-e, naiuso ngüso ongko tsaosilaoting nou David ko wekü oukongkü iula-e. David thsaosithsosoüh APAOU ün hong, naiuso APAOU pemühli ngüso niakei-e.

⁹Nungtaoko Yirusalem komau kowetsün mele pungkü ngü lomowane.

¹⁰“Ngü David thsaosithsoso naiuso Yirusalem hai amao nouso atsüojinyang naiuso misaotsün onthso nou miankiu-e. Ngüsoüh chiat taiutsün tsak nou tü ngüsoüh thape, naiuso khaiunia tsak meshen thsosa mowan nai mongsaiutsün khekkü apa thaiutha ngüso mongsaiu-e. Melothso yamchong mowan nai mongsaiutsün khekkü ngüso thsüokü mongsaiu-e.

¹¹Nungtaoko Yirusalem nai mongsaiutsün nung Megido hai tsamei ai Hadadrimon thaiutha mongsaiutsün tü songkü noi-e.

¹²Tsammonghoi pungkü amomo ta mongsaiu-e: David thsaosithsoso tsammongso, Nathan thsaosithsoso tsammongso, Levi thsaosithsoso tsammongso, Shimei thsaosithsoso tsammongso, naiuso amao tsammong chikü, pungkü nou momo ta mongsaiu-e. Naiuso tsammong nouko pohai pungkü nyiuhai ainou mothikü noikü mongsaiu-e.