Read Khiamniungan Naga Zekaria 13 Bible Online

Zekaria 13 - Khiamniungan Naga bible

Zekaria 13

¹“Tilai nungh atao nou shi-e,” “David thsaosithsoso naiuso Yirusalem khaiunia nouso ngüso angei naiuso sotsom nouso ainou losioau haiungan tsak sopkiu-e, ta APAOU Akongting nou ngioji.

²Nungh taoko nung gohthang ainou sotsom nian nouso ngü moiane, naiuso loto nungso sauüh tsüyangsanshi-e. E-po tsak ta ngiotsün saulünou ngü wanane naiuso sotsom nouso tü amkhamau amongchio nou lowankiu-e.

³Naiuso ajantsoüh loüh tsülaokülu khapiam ngionai, apa posinyiuüh apa loatkü wanau apa hau chite-e, tiautenai apaüh APAOU ngio chiteji, lüko yaang chiteji.

⁴Tilai nungh atao nouso shi-e, e-po sauühtso apa atsangshei thaiutha tsübülome, tsüdekünai e-po tsakli tsüchhi-e, tsüdekünai khaiuniahoi kausaiat au e-po tsak ün sheitho tsütho-e.

⁵Nungliko apaüh, ‘Ngü e-po tsak tsüde ta ngio-e. Ngü eiu-a khaiunia tsak noin- ngü jü aakihlaiu chikü eiu-akü shin.’

⁶Nungaih ajantsoüh, ‘A-onthong nai mou nouso nung ti in?’ ta apa tü sang naito, apaüh thala-e, ‘Ngü nung mou nouso paiuhai tsamai nai eplou.’”

⁷APAOU Akongting nou ngioji, “Oh salaiu, atsa, küta jü thaiutha chhikiutsün onnemok jimtsün tü lühe! Apa lüloat, naiuso onnemok hoi nouso pengpune, Ngü jü khaiunia tü pha poh-e,

⁸naiuso goumchi chikü nai khaiunia haoson süme nouko haoson nime loatkü wane.

⁹Naiuso haoson süme apoi nou tü ngü thelu-e, naiuso in tsangkü tangkason losangtsünli ngüso losange. Ngü ngüso tü chaiou lakkeng nou ta thelutsün khekkü thelu-e. Nungaih ngüsoüh ngütü misao-e, naiuso ngü ngüso tü thala-e. Ngüso jü khaiunia noin ta ngü ngüso hau chite-e, naiuso ngüsoüh Ngü ngüso Goa ta thalou-e.”