Read Khiamniungan Naga Zekaria 14 Bible Online

Zekaria 14 - Khiamniungan Naga bible

Zekaria 14

¹APAOU nou mikhem noikham nai noiau ajekhaiu nou shimkü noin. Nungaih Yirusalem kamhean-e, naiuso nungh akamhetsün jengtsaiu nouso asamüh epkü janthat-e.

²APAOU nou Yirusalem ko ehli au mele apem aikü kamshi-i-e, Noknio nou thalouwane, tsam nouso kamhean-e, naiuso menyiu hoi nouso tü mongdem ajisiwop chhi-e. Nung noknio khaiuniahoi haowe awewe thaloukü khuwane, lüko apoi nouso to noknio ainou kankü tsükhu-e.

³Nungaih ayanan taoko ehlikü shitsünli, nung mele nouso tü khengshikü ehli au APAOU nou tsalou-e.

⁴Nung taoko nai apa Yirusalem tü ajepek nai noitsün Olip King chiai tsa-e. Nungaih Olip King ajepek ainou ajenap ta tsamei asong tsak nou nime hau thekü paipekke. Nung King apai tsak nou ajenapki dongai naiuso apai tsak nou ajepekki dongai ta soikü khuwane.

⁵Nung King nime hau thekü janthattsün tsamei tsangkü ni kholou-e. Yihuda hai nokpao Uzzia tao gohhaiu nai asam paosiposo khothiowantsünli asam khothiowane. Nungaih APAOU jü Goa apa ko aün honghoi nouso chikü hakü shi-e.

⁶Tilai nung atao shi-e, nungaito achong, tsüdekünai nyin lungshikü iulatsün,

⁷tsüdekünai anyakhem tsünoishi-e, nungko asaita asoh taoko saokü anyi awon noi-e. Tilai nung atao thawao-e, nungto APAOU noulu ngeji.

⁸Tilai nungh ajekhaiu shi-e, Yirusalem ainou asangling khiam tsange, nung khiam haoson tsak Ee Khiamnok nai naiuso haoson tsak nou Mediteranian Khiamnok ai tsang- thio-e. Nungh ah-uo ah-saiu tsüwekü pon thathonkü tsangkü noi-e.

⁹Nungaih goumchi apem khaiuko APAOU nou nokpao noi-e, khaiunia pungkü nou apa Goa naiuso apa nian APAOU nou ngekü amkhame.

¹⁰Ajenapki Geba ainou ajepekki Rimon saokü khiamkhan athum nung suo-aikü noi-e. Nung lemkü noitsün goumchi khaiuko Yirusalem atsokting noi-e, Noknio nou aya nai bekhan noitsün Benjamin Bekhan ainou Aniokun Bekhan ta saokü, naiuso Hananel Tsamthong ainou nokpao ün sainaoshep noipektsün ta thasaokü noi-e.

¹¹Loto alothe alohat titso tsünoikü, nungko khaiuniahoi nouso aalou nai kih-e.

¹²Yirusalem khaiuko ehlitsün mele apem dongai APAOU nou akiathe tsak kankü shi-e. Nung akia nou: ngüso aa noikü nouko ngüso nyih, niovei, naiuso lei nouso choikü khuwane.

¹³Nung taoko APAOU nou ngüso pülai-ikü khaiunia pungkü nou me- shen dongko noitsün tü pha pohkü, ngüso thalouwanli hat-e.

¹⁴Yihuda haiüh Yirusalem kipsanau ehli-e. Ngüsoüh mele chikü ün jengtsaiu- chaiou lakkeng, tangkason, naiuso neshe thatü piakü kamhean-e.

¹⁵Akiathe nou mokthso, apong naiuso anyiu nouso, ut naiuso gado nouso, ehoi saothang nai noitsün thainian apem khaio ai shi-e.

¹⁶Nungaih Yirusalem tü khengshikü shitsün poikü noitsün mele nouso apemüh APAOU Akongting nung nokpao noin ta amkhamau naiuso Asoloutsün Sümai saohe au pon pungkü amkhamau khu-e.

¹⁷Mele ajantsoüh APAOU Akongting nung nokpao noin ta amkhamkiu khuau nan naito, ngüso goh ai ah-nou tsü-uo-e.

¹⁸Ijip haiüh nung Asoloutsün Sümai saohe au nan naito, ngüso tü lüko anantsün mele pungkü dongai APAOU nou hongtsün akiathe noulu shiuh-e.

¹⁹Ngüsoüh nung Asoloutsün Sümai tsüsaohekü naito, Ijip hai naiuso amao goumchi mele nouso khaiuko lüko nung angja nou noi-e.

²⁰Nungh taoko mokthso naiuso tsamkei jippetsün tü lüko “APAOU thaiutha losiokü taim” ta satlutkü noi-e. Amkham Tsam nai atheng- hetsün lak nouso asio amthang nai chiutso nouso lilu noi-e.

²¹Yirusalem naiuso Yihuda apem nai noitsün athenghetsün lak nouso APAOU Akongting tü amkham nai kankei au mothikü taiu-e. Khaiunia sauhaiüh aloat chaithio kiuji ngüsoüh nungso chaithio nyih thengau kankei-e. Tilai nungh atao shi-e, nungko APAOU Akongting Amkham Tsam nai loto chaile oule tsünoishi-e.