Read Khiamniungan Naga Zekaria 3 Bible Online

Zekaria 3 - Khiamniungan Naga bible

Zekaria 3

¹Amao atsangshei tsak ko APAOU nou ngü hau Akhengting meson Yihusua, APAOU hong khako tsanoikü han. Naiuso Yihusua dongko apa tü khengshikü mi kiuau Biya khemloukü tsakü noiküla.

²Nungaih APAOU hong nou Biya tü ngiom, “Biya, APAOU nou ni lochikü aphio nai lüwanan! APAOU, sauüh Yirusalem tsüojinji, apaüh ni lochikü aphio nai lüwanan. Nung khaiunia in ainou jüosantsün pailai tsak khekkü noin.”

³Nungko Yihusua, achinyan neshe sheitho thokü tsakü noiküla.

⁴Nung hong nou aün nai atuntsünso tü ngiom, “Nung khaiunia nou achinyan neshe sheithokü noitsün lülouwan.” Nungaih apaüh Yihusua tü ngiom, “Ni aphio suntsün ngü ni ainou lowaniu, naiuso ngü ni hau neshe ayan thoau kiu-e.”

⁵Apaüh atuntsün tü Yihusua khaiu ai kandio ayanthsüo tsak keilut au thoilutkü ngiom. APAOU hong nungko tsanoikünai ngüsoüh apa hau neshe ayan thokiu.

⁶Nungaih hong nou Yihusua hau,

⁷APAOU Akongting nou apa tü ngiotsün chiten: “Ni jü ngiokhem nouso angkü ni hau kiutaiutsün chhisiya nouso chhi naito, ni Jü Amkham Tsam naiuso mikhem tsam nouso khako ahei nai tsülaokü noi-e, naiuso jüdongko noitsün hong nouso misao ngü thalatsünli, ni misaotsünso ngü thala-e.

⁸Yihusua anglu, ni Akhengting Meson noin, naiuso paiusihai meson nouso anglu, asam nung ashiau tao thaiutha ii amei tsak noin. Asun Tsak ta jontsün ngü yathsüotsün nou tsangsheikü sungi-e!

⁹Ngü Yihusua khako lung tsak tü khasinio chinyat sunkü taiukiuji. Ngü nung lung chiai thsamsat nou laolute, naiuso ngü nung goumchi angei jamaolu kankü khuwane.

¹⁰Tilai nungh atao shi-e, asam sainaoshep eiu naiuso phiushep pai nousoüh lemjeikü, khaiunia pungkü nou meshen phaosipo tü nyongkü nokmei nai aaloukü monglinge-e.”