Read Khiamniungan Naga Zekaria 6 Bible Online

Zekaria 6 - Khiamniungan Naga bible

Zekaria 6

¹Ngü amao atsangshei tsak epshin. Nungtaoko nai daoson king nime jet ainou mokthso tsamkei püle sungtsün ngü ep.

²Nung chongting tsamkei nou mokthso aseng nousoüh tenkü, naiuso müjam nou mokthso anyaching nousoüh tenkü,

³süme nou mokthso athaiu nousoüh tenkü, naiuso püle nou alengsat pokü noitsün mokthso nousoüh tenkü noiküla.

⁴Nungaih ngü hong tü sangkü ngiom, “APAOU, nung mokthso tsamkei nouso ti athat noin?”

⁵Apaüh thalakü ngiom, “Nungso ahsheih püle nouso noin; nungso goumchi apem khaiuko APAOU noitsün ainou loting shikü noin.”

⁶Mokthso anyaching nousoüh tenkeitsün tsamkei nou Babilon ajepekki nai khu, mokthso athaiu nou tenkeitsün tsamkei nouso ajenap nai, naiuso alengsat pokü noitsün mokthso nousoüh tenkeitsün ehli tsamkei nouso ajepekki shingkhan- nio nouso dongai khukü noiküla.

⁷Alengsat potsün mokthso nouso sungkhunai, ngüso goumchi tü sailu au sangkü noiau tsüshiokü tsakei. Hong nou ngiom, “Khukü goumchi thapekkü lüsailu!”- nai ngüsoüh nungh sailu.

⁸Nungaih hong nou ngü wekü ngiom, “Ajenapki Babilon ai khutsün mokthso nousoüh APAOU amongmat lotsamiu.”

⁹APAOU nou ngü hau nung ngiongem kiukü,

¹⁰Apaüh ngiom, “Thaloukü khuwantsün ainou laokü yashitsün Heldai, Tobija, naiuso Jedaia soüh kiutsün paopei nouso lülou, küta Zephania thso nou Josia tsamai liuliukü lükhu. Nung khaiunia nouso chikü Babilon akho- thiotsün ainou laokü yashitsünso jije noin.

¹¹Ngüsoüh kiutsün tangkason naiuso chaiou lakkeng paopei nousoüh kandio tsak lüshan, küta Jehozadak thso Yihusua, Akhengting meson khaiu nai lükeilut.

¹²APAOU Akongting nou ngioji ta apa hau lüchite: ‘Khaiunia Tsak sau tü Asun ta Jonji apa meshen noitsün ko samsane, naiuso apaüh APAOU ün Amkham Tsam lahshi-e,

¹³naiuso nokpao tsaküh epau noitsün asuhat maikü eppe, naiuso apaüh meshen khaiunia chiai nokshing shinge. Apa nokpao noikham dongko meson tsak tsa-e, nungko ngüso aikü aaloukü ajeiai nai chhisiya-e.’

¹⁴APAOU Amkham Tsam nai Heldai, Tobija, Jedaia, naiuso Josia so asuhat kiukü ayangshiau tsak nung kandio nou noi-e.”

¹⁵Laiukü nai noitsün khaiuniahoi nouso shikü APAOU ün Amkham Tsam lahshitsün ko halou-e. Tilai nung lahkheme, nungaih asam dongai APAOU Akongting nou Ngü hongkü noin ta asamüh nge-e. Asamüh APAOU asam Goa athoilut nouso apem ang naito nung apem thawao-e.