Read Khiamniungan Naga Zekaria 8 Bible Online

Zekaria 8 - Khiamniungan Naga bible

Zekaria 8

¹APAOU Akongting nou Zekaria hau nung ngiongem kiu:

²“Jü atsüojin a-aouting nou jü khaiunia tü tsüojin tiautenai ngü Yirusalem tü hachu au mongchetkü noiküla, nungh atsüojin nou ngü apa ehso ko mongmatkü iula-i.

³Ngü jü asio noknio Yirusalem ai laokü shi-e naiuso nungko kih-e. Nungh tü mongkiutsün noknio ta jone, naiuso APAOU Akongting king nou tü asio king ta jone.

⁴Loühjam atsakei taoko pailai ahachu loukü thatü sonankü noitsün paohai si jiihai nouso nung noknio kengpun nai moknoi shi-e.

⁵Naiuso sonyam nouso loühjam melothso naiuso menyiuthsohoi lomhetsün nou mian-e.”

⁶“Sauhai mele lo poikü noian nungso tü nung ashio au tsüdekütso noi-e, lüko jü thaiutha to nung tsüshiokü hau ti tsünoi-e.

⁷Ngü jü khaiuniaso ngüso tilüsong goumchi ai kanlükhunkü noin nung ainou kipsane,

⁸küta ngüso ajepek si ajenap ainou nialoukü shikü Yirusalem nai kih-e. Nungaih ngüso jü khaiuniaso noi-e, naiuso Ngü ngüso Goa au noi-e, naiuso ngüso khaiuko mongkiukü ngiotsüo nai nokshing shinge.

⁹“Mong lünyan! Jü Amkham Tsam lahshiau thaiutha athanyaloutsün taoko e-po nousoüh chitetsün nung ngio noulu asamüh lo lulaji.

¹⁰Nung khako nai sauühtso khaiunia tsüdekünai chhimai laitsün thainian lüko lai au tsüshio, naiuso khaiunia sautso meshen eh ko kipsankü tsünoiküla. Ngü khaiunia nouso tsaküh tsak tü khengshikü tsa-i.

¹¹Lüko ngü lo nung mele apoitaiu nouso tü ayam amomo nai pao- tsangji.

¹²Ngüsoüh chihle khiamle aaloukü siu-e. Ngüso hau sainaoshep eiuwao-e, goh nou chihsam khiamsam sungi-e, naiuso ah-uo nou saiukü noi-e. Sauhai aasankü noin nung jümele khaiuniaso hau ngü nung ouk nouso kiu-e.

¹³Yihuda naiuso Israel khaiuniaso! Ayanan taoko gohmao khaiunia nousoüh ‘Yihuda naiuso Israel khako shitsün aküothe noulu asam tü lünoi,! ‘ta ngiokü tsaküh tsak thako athesan kiuküla. Lüko ngü asam kipsane, nungaih gohmao khaiunia nousoüh tsaküh tsak tü nungti ngio-e, Yihuda naiuso Israel khako shitsün ouk wekü nou asamüh lülou! Nungtiphe mong lünyan naiuso hatkü lanoi.”

¹⁴APAOU Akongting nou ngioji, “Tilai asam paosiposoüh ngü mongmat-i, ngü ngüso thaiutha aküothe kiu-au yangtaiutsün nung kiukü shin.

¹⁵Lüko lo ngü Yirusalem naiuso Yihuda khaiuniahoi ouk kiu au thatsanji. Nungtiphe hatkü lanoi.

¹⁶Asamüh nung chhisiya nouso chhi au noin: Tsak si tsak jetko ngiotsüo lüchite. Mikhemthang nai nokmei kanjikantsün ngiotsüoting nou lükiu.

¹⁷Tsaküh tsak tawaitsün mongthat lathat, ngiomong shingekü atsüo- tsüdekü mitha lakiu, Ngo yaang chitetsün, phaphi phamong, naiuso alothe misingem chhisiya nouso chinyanji.”

¹⁸APAOU Akongting nou nung ngiongem Zekaria hau kiu:

¹⁹“Alei püle, pungo, chinyat, naiuso che nouko keithontsün nungso Yihuda khaiuniahoi thaiutha amongling naiuso amongchio akoihetsün sümai au iula-e. Asamüh ngiotsüo naiuso nokmei tsüojinau noin.”

²⁰APAOU Akongting nou ngioji, “Tilai khaiuniahoi noknio piakü ainou Yirusalemai shi-e nung atao nou shiji.

²¹Noknio tsak ainou shitsün nou noknio tsak ainou shitsün tü ngio-e, ‘Sam APAOU Akongting tü amkhamau naiuso apa ouk thaiutha misao au khuji. Sam ko hakü ashi!’

²²Khaiunia piakü naiuso akongting mele nouso APAOU Akongting nou amkhamau Yirusalem ai shi-e, naiuso apa ouk thaiutha misao sao-e.

²³Nungsoh ajekhaiu ko nai gohmao khaiunia che Yihuda hai tsak dongai shiküta ngio-e, ‘Samüh asam aküo nai haoson loha au aiuji, tiautenai Goa nou asam ko hakü noin ta samüh lula-iu.’”