Read Khiamniungan Naga Malaki 2 Bible Online

Malaki 2 - Khiamniungan Naga bible

Malaki 2

¹Akongting APAOU nou mesonhoi nouso tü ngioji, “Nung athoilut nou asam thaiutha noin:

²Asamüh chhi tsangkü ngü asuhat au noin. Ngo ti ngioji nungtü tsü angkü naito, ngo asam hau athesan tsak kankü shi-e. Asamüh eptsün apem ko ngo athesan kiu-e. Tongtü naito, ngo nungso khako athesan kiuwankü noin, tiautenai asamüh jü athoilut nouso da mong tsükiu.

³Ngo asam thsoso hau angja kiu-e, naiuso asamüh shii chaithio thiotsün thainian nouso shii nou asam kha ai tsom-e, küta asam shii nyithang nai nialoukü khu-e.

⁴Nungaih jü athalou-etsün Levi thsaosithsoso mesonhoi ko shantaiu tsün tsülothekü hau ngo asam hau nung athoiluttsün kiutaim ta asamüh nge-e.

⁵“Jü athalou-e nouko ngo ngüso tü aa nou naiuso ameilei nou shanloh, naiuso ngüsoüh ngü tü asuhati-au thaiutha ngo nungso ngüso hau kiu.

⁶Ngüsoüh ayam tsüthakü nou tsüdekü ayam thanou tsande. Ngüso ngüko ngio jeiaikü kihkü shin, ngüsoüh ayam thakü chhitsünlu tsüde, lüko amaohai piakü tsümeikü chhitsün ainou laolouau hachu.

⁷Goa atsüo ngeloutsün yam tsandeau mesonhoi nouso thsale noin. Jü amongchio nou ngelouau khaiu- niahoi nouso ngüso dongai khuau noin. Tiautenai ngüso to Akongting APAOU ün ngiongem kantsünso noin.

⁸“Lüko lo asam mesonhoi nouso ayam atha ainou phoklekü khuwan. Asamüh tsandetsün nou piakü aphio chhi nai nialoukü khuwan. Ngo asamko shanetaiutsün athalou asamüh lotheaniu.

⁹Nungtiphe ngo lüko Israel khaiuniahoi hau asam lochilotsao-i-e, tiautenai asamüh ngü mongchiotsün tü angio tsü-ang, naiuso tilai asamüh jü khaiuniaso hau tsande, asamüh khaiuniahoi nouso tü wekü tsüpaotsang.”

¹⁰Sam chikü ün po tsaklu tsüdeso? Goa tsaklu nou sam chikü tsü shanso? Naito tiauta sam tsak si tsak ko thalou-etsün lotheji, naiuso Goa nou sam paosiposo ko athalou-e shantaiutsün samüh tiau ta lochilotsaoji?

¹¹Yihuda hai ngüso athalou-e Goa ko noitsün lothean küta Yirusalem nai naiuso shing- khannio apemai chhi tsümeitingkü chhi-iu. Ngüsoüh APAOU nou tsüojintsün Amkham Tsam lochi- nyaniu. Pohaiüh gohmao hai goa amtsün menyiu nouso tsamsigoh yangiu.

¹²Sauhaiüh nungtin chhisiyakü noin, ngüso to APAOU nou Israel hoikam ainou laha-ishi, naiuso loto tilaitso sam meleüh Akongting APAOU dongai kankü shitsün chaithio kiutsün chhisiya nouko haoson lalouha-ishi.

¹³Loüh asamüh amao chhi tsak chhishiji. Asamüh APAOU ün am- thang nou mongsaiukü shaptsünso niochekhiam nou thapenanji, tiautenai loto apaüh asam chaithio nouso kankü shitsün tsüloushiji.

¹⁴Apaüh tiauta nung chaithio nouso tsüloushi ta asamüh lüsang. Nung tiautenai asam oum taoko tsamsigoh yangtsün tsammongnyiuso ko asam athaloutaiutsün lothean. Apa ahaimei noiküla, naiuso apa ko mongkiukü noi-e ta Goa khako thalou lüko ni apako thalou-e taiutsün lothean.

¹⁵Goa nou ni apa ko pem tsak naiuso onthso tsak nai tsüshanso? Nungko apa watthat ti noiküla? Nungko asam tü chetsinyimtsün thsoso Goa iula au khaiuniathso ayang noiküla. Nungtiphe asam saulünou meshen tsammongnyiu ko athalou-e lotheanau tsünoiting ta lüyang.

¹⁶“Tsamsigoh shanküta pungean- tsün ngo chinyanji,” ta APAOU, Israel hai Goa nou ngioji. “Tilai asam ajantsoüh nung tsümeitingkün chhi meshen tsammongnyiu tü chhi-e ngo nung khaiunia tü chinyanji. Atsam- mongnyiu ko mongkiukü noiau athalou-e taiutsün tsülouthekü taiuau ayang lünoi.”

¹⁷Asam ngemtsün ngio nou tü APAOU oukia-i-iu. Lüko asamüh sangji, “Samüh apa titi oukia-in?” Nung ngiotsün tsangkü “APAOU Akongting nou tsümeikü chhitsünso chikü amei jije ta yangji; atsüoting to apaüh ngüso tü tsüyang” ta ngiotsün tsangkü tsüdekünai “Ngiotsüo Goa nou tiai noin?” ta sangtsün tsangkü APAOU nou oukiaji.