Read Khiamniungan Naga Mat 10 Bible Online

Mat 10 - Khiamniungan Naga bible

Mat 10

¹Yisuüh apa sahoi chekü nime nouso jonshikü angei onthso komanao naiuso akiasiya in amomo apem lomeikiuao oukong kiu.

²Sahoi chekü nime nouso: (Peter ta jontsün) Simon, naiuso anio nou Andria; Zebedi thso Yakob naiuso anio nou Yohan;

³Philip; Bartholoma; Toma; naiuso liukim shitsün Mathi; Alfia thso Yakob; Thadia;

⁴meshen shingkhan ta tsüojintsün Simon; naiuso Apa janheantsün Yihuda Iskariot; nungso noiküla.

⁵Sahoi chekü nime nouso Yisuüh nung ayamhan kiukü hongpengji, “Melemaohai goumchi naiuso Samariahai noksong tiaitso lanap.

⁶Lüko mowankü noitsün onnemok Israel khaiunia dongai lükhu.

⁷Asam khukü, ‘Aün Nokshing shimkü noin ta lüchim!’

⁸Akia nouso lülomeikiu, ee nouso ahkü ashi-i, Jee nou lülomeikiu, naiuso angei onthso nouso lükoman. Asamüh amai tsüyangkü ep, amai tsüyangkü lükiushi.

⁹Asam nekong ai chaiou, tangkason, tsüdekünai taoson nou langtsün chai lakan.

¹⁰Asam khunai asaohetsün nekong, nehong, hokkhut, naiuso pailai apoi lakan. Tiautenai achhitsünso haoto ngüsoüh poutsün kiuao noin.

¹¹“Ti noksong tsüdekünai nokai asam nappe, nungai asam louao sau mongchiokü noin, lüyam naiuso asam mokhukün lektso nungai lünoi.

¹²Tilai asam tsamai nappe, ‘Asam ko aalo lünoi ta lüngio.’

¹³Nung tsamai kihtsünsoüh ni monglengkü lounai, asam nokmei salam ngio nouko lünoi-i, lüko ngüsoüh monglengkü tsülounai asam salam ngio laokü lülowan.

¹⁴Ajantsoüh asam tsülounai, tsüdekünai asam ngio tsü-angnai, asamüh nung tsam tsüdekünai nok ainou shikhunai, asam hok ainou pu pattanküta lükhuwan.

¹⁵Atsüoting ngo asam tü ngioji, Mikhem Ajekhaiu nai Goa nou nung nok nouko naito Sodom naiuso Gomora khaiuniaso tü atsüojinyang intso piatsokü han-e!

¹⁶“Anglu! ngü asam chiuhoi ongko onnemok hoi khekkü hongji, nungtiphe asam paoli thsümonkü lüthe naiuso mükhamli saitha lünoi.

¹⁷Lüko khaiunia thaiutha lütsüolu; tititenai ngüsoüh asam nyung hao mikhem nai thumkü kiuwane, naiuso Yihuda kamthang nai asam tü shiuh-e.

¹⁸Asam Jü thaiutha nokpao nokshinghoi naiuso Melemaohoi khako Ngem Amei mitha theao niakü khu-e.

¹⁹Lüko tilai ngüsoüh asam theluao niakü shi-e, asamüh titi ngio-e, tsüdekünai ti in chite-e ta layangelat, nung taokolu asamüh ti ngio-e nung asam hao kiu-e.

²⁰Tititenai ni ngioau nou angio tsüde, lüko asam Po Onthsoüh asam tsangkü chite-e.

²¹Deisinio nou deisinio naiuso po nou meshen thso, eaniao thümkü kiu-e, naiuso thsohaiüh posinyiu thako tsa-e, naiuso ngüso luat-e.

²²Jü thaiuthako khaiunia apemüh asam tü chinyane; lüko sauüh athon saokü jeilo-e apa kipsane.

²³Tilai ngüsoüh noksong tsakko asam omhe-i-e asam noksong amao tsakai lükhu. Ngü asam tü atsüoting ngioji, Khaiunia Thso moshikün khako asamüh Israel noksong nouso ai chhi mothakhemkü noi-e.

²⁴“Atsandetsün konai sahoi song tsüde, tsampao konai tsamki song tsüde,

²⁵Nungtiphe sahoi nou meshen hau tsandetsün khekkü iulanai naiuso tsamki nou apa tsampao khekkü iulanai nungüh saiu-iu. Tsampao tü Belzebub ta jon naito, apa tsammongso tü tekkü tsaokü jon-e!

²⁶“Nungtiphe khaiunia lon lahat, tilüsong lo tsangtaiukü noin, nung tsütsangshi-e, naiuso akaosikaokhan alum ngekü iula-e.

²⁷Anyakhem nai ngü asam tü ti ngioji, nung asamüh awon nai lüchite, naiuso asamüh nyankü ti lula, nung tsamkhaiu nai lüve.

²⁸Sauhaiüh pem luatji, lüko onthso luatao tsüshio ngüso lon lahat; lüko Goa sauüh onthso naiuso pem nemtso inheeng nai mowaniao shio, apabao lühat.

²⁹Ni müthsat nime tangka tsak nou tuh ao shiom, külüko nung müthsat tsaktso asam Poüh tsüngekü goh ai tsüsa-i-e.

³⁰Asam khaiu nai khaiuou lüko apem vesankü noin.

³¹Nungtiphe lahat, müthsat piakü nouko naito asam tekkü chenthso!

³²“Sauüh khaiunia khako ngü thalu-e, aün nai noitsün Jüpo khako ngü lüko apa thalu-e.

³³Lüko sauüh khaiunia khako ngü tsüthalu-e, aün nai noitsün Jüpo khako ngü lüko apa tsüthalu-e.

³⁴“Goumchi ko nokmei sungiao ngo shin ta layang; nokmei tsüde, lüko sah sungiao shin.

³⁵Thso tsaküh meshen po thako, naiuso menyiuthso nou meshen nyiu thako ahle nou meshen nyai thako tsalo-iao ngü shin.

³⁶Khaiunia tsak ün atsaoting eh nou apa tsammongso mepemhoilu noi-e.

³⁷“Sauüh ngüko nai meshen po tsüdekünai nyiu tekkü tsüojine; apa jü sahoi au tsümai; naiuso sauüh ngüko nai meshen thso melo naiuso menyiuthso tekkü tsüojine; apa jü sahoi au tsümai.

³⁸Naiuso sauüh meshen paiphu pikü jü phiai tsühoilut, apa jü sahoi au tsümai.

³⁹Sauüh meshen aa kipsanau aiu-e, nung mowane; lüko sauüh jü thaiutha meshen aa mowan-e nung epshi-e.

⁴⁰“Sauüh asam louji apaüh ngo louji, naiuso sauüh ngo louji, apaüh ngo hongtsün louji.

⁴¹Sauüh Goa hongthon apa Goa hongphe ta nialouji, nung khaiunia nou hongthon mai nouko haoson epha-e. Naiuso sauüh asio khaiunia tsak asio khaiunia nianko louji, apaüh asio khaiunia eptsün amai nouko haoson epha-e.

⁴²Asamüh nung ehenthsoting tsak hau apa to jü sahoiphe ta khiamsang lüko shenhanai, apaüh atüoting amai eppe ta lümonglam.”