Read Khiamniungan Naga Mat 11 Bible Online

Mat 11 - Khiamniungan Naga bible

Mat 11

¹Yisuüh apa sahoi chekü nime nouso tü nungso ayamhan kiutsün thonnai, apa nung athang letaiukü ngüso shimkü noitsün noksong nouso ai chimkü naiuso tsandekü khu.

²Alimkiutsün Yohan akho tsamai noikünai, apaüh Khrista chhi thaiutha lulakü, apa sahoiso ajantso Yisu dongai hongkü

³apa tü sang, “Ashiao noi nou ta Yohanüh ngiotsün ni süne, tsüdekünai samüh amao tsak tü taiushi-e?”

⁴Yisuüh ngüso tü ngiom, “asam khuküta, asamüh ti in thapji, naiuso epji nung Yohan hau lüchite:

⁵niopek nousoüh epji, naiuso chiune nouso tsakeiji, Jee kia nouso lusiokiuji, naiuso noukek haiüh lulaji, naiuso ee nouso ahkü shi-iji, naiuso tsosiluhai tü Ngem Amei nou chimji.

⁶Sauüh ngü da tsühenyikü monglamji apa thaiumei!”

⁷Yohan sahoiso khutsün taoko Yisuüh hoi nouso tü Yohan thaiutha ngioao yachu: “Asamüh liutsa nai Yohan ko eppeau thaiutha khunai ti eppe ta yangji? Ahsheih nou paithsam lemlemtsün süne? Ti ta thapau asam khuji?

⁸Ne ashethop thotsün khaiunia tsak thapau süne? Nungli thokü noitsün khaiunia nouso Nokpao tsamai noin.

⁹Naito ti thapau asam khun? E-po tsak thapau süne? Ah, atsüoting asamüh E-po tsak nou tü songkü epiu.

¹⁰Tititenai Asiongio nou ngiotsün nung Yohan thaiutha noin: ‘Goa nou ngiom, asam khako yam losatau ngo jü hongthon honge.’

¹¹Atsüoting ngü asam tü ngioji, Nyiuhaiüh chettsün ongko Alimkiutsün Yohan tü songkü monoi. Nungti lüko sau aün nokshing nai ehenting noin apa Yohan tü songthso.

¹²Yohanüh apa ngiongem chimtsün ainou lonyi saokü aün nokshing tü thsüokü tsüoweji, naiuso ajeteng nousoüh tsüolokü khuwanji.

¹³Yohan tao saokü E-po nouso naiuso Mosa Ngiokhemüh Aün Nokshing thaiutha chitekü shin.

¹⁴Asamüh ngüso ngiongem da monglamau mongchiokü naito, ashiao noi nou Elijah nung Yohan noin.

¹⁵Sau noukhan poukü noin apaüh lü-anglu!

¹⁶“Ti inko ngü nung vetao welu-e? Nung chaikam nai kamtsün methsohoi nousoüh meshen haiso tü vetsün khekkü.

¹⁷‘Samüh asam thaiutha tsamsigoh shan kokiang nou khong, lüko asamüh tsühang! Samüh miawan jih nou jih, lüko asamüh tsümongsaiu!’

¹⁸Yohan keithon loukü naiuso theng tsüshiukü shin, naiuso khaiunia pungkü nou ngiom, ‘Apa da angei onthso noin!’

¹⁹Tilai Khaiunia Thso shin, nai khaiunia pungkü nou ngiom, Apa hekü naiuso shiukü shin. ‘Nung khaiunia tü Athaplu! apato ehethaikan naiuso thengshiu, liukim shitsünso naiuso angeihoi haimei, Goa mongyang amei meshen chhi nou penloji.’”

²⁰Nungai sübao noksongso ai Yisuüh athanga chhi chhin, nungsoüh mong tsüphoklephe, apaüh ngüso tü thut.

²¹“Inyate Korasin! Inyate Betsaida! Sübao chhi asong asam ongko chhin nung Tair naiuso Sidon nai chhitünto, ngüsoüh nethe tenkü pukhao tsomlutkü kümita mong phokleiu-ela!

²²Ngü asam tü ngioji, Mikhem Ajekhaiu nai asamko naito Goa nou Tair naiuso Sidon hau atsüojin phopkü hanela!

²³Naiuso Kapernaum! ni, aün nai sungngoikü achija loksane ta aiukülü süne! Ni inheeng nai saowane! Sübao chhi asong ni da chhin nung Sidon nai chhitünto nung lonyi saokü noi-ela!

²⁴Ngo ni tü ngioji, Mikhem Ajekhaiu nai niko naito Sidon goumchi thaiutha atsüojin phopkü han-e!”

²⁵“Nung taoko Yisuüh ngiom, “Jüpo, aün naiuso goum APAOU! tiautenai mongsai pungtsün naiuso ah-nge khaiunia khako tsangtaiutsün tsüngekünso hau achiai sungkü haniu, nungshioko ni tü monglingji.

²⁶Ah, Jüpo, ni nung thawao-ao mongchiotsün noiküla.

²⁷“Jüpoüh ngühao apem thümkü kiu-iu. Po nou chiai Thso nou lüko sauüh tsünge Thso nou apaüh tsangshei-iau mongchiotsün tsüdekünaito ngüso ta simkü sauühtso Po nou tsünge.

²⁸“Asam thsale kankü tanattsünso chikü jü dongai ashi, naiuso ngü asam hao shioalu nou kiu-e.

²⁹Asamüh jü khe nai lüpi, naiuso ngü ainou angelo; tiautenai ngü onthso nai shitsam naiuso mongmei; naiuso asamüh asam onthso thaiutha shioalo nou eppe.

³⁰Tititenai jü khe thatü siu, naiuso jü thsa thatü lohek.”