Read Khiamniungan Naga Mat 12 Bible Online

Mat 12 - Khiamniungan Naga bible

Mat 12

¹Laiukü mokhukü Yisuüh Yihuda Anounyi eiu yankü khu; naiuso apa sahoiso naiujikan küta, chonglam ngaoloukü heao yachu.

²Farisihoi nou nung epkü Yisu tü ngiom, “Athaplu, Yihuda Anounyi asahoisoüh chhitsün nung sam ngiokhem ta khengshitsün noin!”

³Yisuüh ngüso tü thalan, “David naiuso apako haanso naiunai apaüh ti chhin nung asamüh tilaitso tsüveluso?

⁴Apa Amkham tsamai napnai Goa hau taiutsün themtsai hen, tongtü nai mesonhoi tsüdekünsoüh to nung heao ayam tsünoiküla?

⁵Tsüdekünai Yihuda Anounyi nai Amkham tsamai noinso mesonhoi nou Yihuda Anounyi to lotheanji, külüko ngüso to aphio tsüsun, nung asamüh Mosa Ngiokhem nai tsüvelu süne?

⁶Ngü asam tü ngioji, Amkham tsam nou tü songkü tsak nungai noin.

⁷Asiongio nou, ‘Thainian aloat chaithio tsüde, ngü atsüojinyang aiuji’ ta ngioji. Asamüh nung atsüo ngetünto, asamüh aphio khaiunia da tsülotsao-ela.

⁸Tititenai Khaiunia Thso, Yihuda Anounyi APAOU noin.”

⁹Yisu nung athang ainou pungekü khuküta, Yihuda kamthang nai nap.

¹⁰Athaplu, nungai pha-e khaiunia tsak noiküla, naiuso nungko ngüso ajantso Yisu aphio thaloau yangkü apa tü sangkü ngiom, “Yihuda Anounyi nai alomei kiuao shio süne?”

¹¹Yisuüh ngüso tü thalan, “Sauüh onnemok tsak taim, nung Yihuda Anounyi khan nai sathiowan nai, nung tsütensanao asam ongko sau noin? Asamüh nung thaloküta tsüniasane süne?

¹²Naito onnemok tsak nouko khaiunia tsak nou titi chentso! Nungti Yihuda Anounyi amei chhiao ayam noin.”

¹³Nungai apaüh pha-e khaiunia tü ngiom, “Apha atsatshi” Apaüh tsatshi, naiuso nung tsakai nouli meian.

¹⁴Nai Farisihoi nou kingchiai sungkü, apa titi mowan-i-e ta apa thako mongkhem.

¹⁵Tilai Yisuüh apa thako mongkhemtsün thaiutha lula, apa nung ainou khuwan; naiuso hoi piakü apa phiai hoilut. Apaüh akia nouso chikü lomeikiu,

¹⁶naiuso ngüso tü apa thaiutha sau hau lachite ta jenkü ngiom.

¹⁷Nung E-po Isaia tsangkü Goa nou ngiotaiutsün shithawaoau apaüh chhin:

¹⁸“Nung ngü shingsantsün ngo yathsüotsün, ngü tsüojintsün sau tü ngo monglingji. Ngü apa da jü Onthso hong-e, naiuso apaüh mele nouso tü mikhem nou velut-e.

¹⁹Apaüh tsüli-e-e, tsüwe-e tsüdekünai sonkeng nai sang songkü tsüvekü chite-e.

²⁰Ngiotsüo ainou ashio moepkün lektso apaüh outsükongkü tsaosilao nouso tü atsüojin yangkiu-e.

²¹Naiuso Melemao haiüh apa nianko ayanglu nou taiu-e.”

²²Nungai Yisu dongai angei onthso nou thaloutsün niopek naiuso asingioau tsüshiokün khaiunia tsak niakü shin; nai Yisuüh nung khaiunia lomeikiu, küta singiojikan naiuso ep.

²³Naiuso hoi apemüh ngakü, “Nung David thso süne?” ta ngiom.

²⁴Farisihoi nou nung lulanai ngiom, “Nung khaiunia nou angei onthso nouso komanji, tiautenai ngüso nokpao Belzebubüh apa hau nung chhiao oukong nou kiuji.”

²⁵Yisuüh ngüso mongyang ngekü, ngüso tü ngiom, “Sübao nokshing meshen chija janpekji, aluthe iulaji, naiuso sübao nok tsüdekünai tsamkhaiu meshen chija janpekji tsakü noiau tsüshio-e.

²⁶Naiuso Biya nou biya koman naito, apaüh meshen chija janpekji: naito apa nokshing titi tsa-e?

²⁷Naiuso asamüh ngü hau Belzebubüh oukong kiutsün tsangkü angei onthso komanji ta ngionai, asam sahoisoüh asam aphio ta thasanji. Naito asam tü hoiluttsünso nungso komanau oukong sau kiuji?

²⁸Belzebubüh tsüde, lüko Goa Onthso nou ngüso hau angei onthso komanau oukong kiu, nung tsangkü Goa nokshing asam ongko noin ta mitha hanji.

²⁹“Khaiunia tsaküh aya nai oukong khaiunia keshikü tsütaiunai apaüh titi thekü oukong khaiunia tsamai napkü apa jengtsaiu lowanao tsüshio. Apa keshikü wan nailu apaüh apa tsamai napao shio-e.

³⁰“Sau ngüko tsünoi apa jü thako noin naiuso sauüh ngüko aikü tsükamshiji apaüh lupengji.

³¹Nungtiphe ngü asam tü ngioji, tsümei naiuso alochi apem khaiuniahoi hao wankiu-e; lüko sauüh Asio Onthso thako tsümeikü ngio-e nung tsüwankiu-e.

³²Ajantsoüh Khaiunia Thso thako ngio chitenai nung apa hao wankiu-e; lüko sauüh Asio Onthso thako chite-e, nung goumchiko lüko tsüdekünai ashiao taoko lüko tsüwankiu-e.

³³“Pai eiu amei eiusanau pai amei theau noin; pai tsümeikün da pai eiu tsümeikü eiu-e. Tiautenai pai nou meshen eiu tsangkü ngeji.

³⁴Asam paohoi asam tsümeikü noikü titi amei sunge? Tititenai ti in nou mongpem miankü noin, nung son nai cheteji.

³⁵Khaiunia amei nou meshenüh taiutsün amei ainou jengtsaiu amei losanji; naiuso khaiunia tsümeikü nou meshenüh taiutsün tsümeikü ainou jengtsaiu tsümeikü losanji.

³⁶“Naiuso ngü asam tü ngioji, khaiunia nou tilüsong yaang ngio chiteji, ngüsoüh nung ngio nou thaiutha Mikhem Ajekhaiu nai thashi-e.

³⁷Tititenai angio nou ni penkiu-e, naiuso angio nou ni tsüpenkiu-e.”

³⁸Nungai ngiokhem tsandetsünso naiuso Farisihoi ajantsoüh apa tü thalakü ngiom, “Atsandetsün,” “Samüh ni ainou ii tsak epao aiuji.”

³⁹Lüko Yisuüh ngüso tü thalakü ngiom, “Tsümeikün naiuso Goa tsüngekün vetao!” Asamüh ii nou tü yamjiso? E-po Yona ii chiai nung vetao hao ti ii tsükiu-e.

⁴⁰Tititenai Yona ajekhaiu samnyi naiuso samso ngou asong thai nai noitsünli, Khaiunia Thso lüko ajekhaiu samnyi naiuso samso goh kheiai noi-e.

⁴¹Ninevi haiüh Mikhem Ajekhaiu nai nung asam hao aphio kiu-e tititenai Yonaüh chimnai ngüsoüh mong phokle, naiuso athaplu, Yona tü songkü tsak nungai noin!

⁴²Mikhem Ajekhaiu nai Sheba hai Menyiu Nokpao nou asam hao aphio kiuao tsa-e, tiautenai apaüh goh athon tsak ainou Solomon ün mongsai ngio nouso tü angluao shin; naiuso athaplu, Solomon tü songkü tsak nungai noin!

⁴³“Tilai angei onthso nou khaiunia ainou sungkütün phiai shioalo yamkü goh wai thsatkü khuji, naiuso athang nou tsü epnai,

⁴⁴apaüh apa chija ngioji, ‘Jü tsam sübao ainou ngü shin nungailu ngü phoklekü khushi-e.’ Apa khushinai, apaüh nung kaiyankü akeng, naiuso aleng meikü iulakü epji.

⁴⁵Nungai apaüh khuküta apa chiai tsaokü noitsün amao onthso chinyat niakü napji, naiuso nungko kihji. Nungphiai to nung khaiunia nou aya ainou konaito lo aphi nai tekkü tsaokü iulaji. Lonyi nung tsümeikün vetao ko nungti thawao-e.”

⁴⁶Yisu khaiuniahoi nouko chitekü noinai, apa nyiu naiuso nioso apako chiteao aiukü, kingchiai shikü tsanoi.

⁴⁷Nai khaiunia tsaküh apa tü ngiom, “Athaplu, anyiu naiuso aniosoüh niko chiteao aiukü kingchiai tsakü noin.”

⁴⁸Lüko apaüh thalan, “Jü nyiu naiuso jü nioso sauhai?”

⁴⁹Nai Yisuüh apa sahoi tü pha nou chükü ngiom, “Athaplu! Jü nyiu naiuso jü nioso nungso noin!

⁵⁰Tiautenai sauüh Jü po aün ai noinou aiutsün chhi-e, nung jü deisinio naiuso jü nyiu.”