Read Khiamniungan Naga Mat 14 Bible Online

Mat 14 - Khiamniungan Naga bible

Mat 14

¹Nung taoko Galil nai noitsün nokpao Herodüh Yisu thaiutha lula.

²Apaüh apa asonghoi tü ngiom, “Nung Alimkiutsün Yohan, apa e ainou ahkü shikü noin. Nungshioko apaüh athanga chhi nouso chhiao shioji.”

³Tititenai Herodüh Yohan thaloukü kekü akhou tsamai wanau ngiokhem kiu. Apaüh nung apa nio Philip tsammongnyiu Herodia thaiuthako chhin.

⁴Tiautenai Yohanüh apa tü nungti ngiom, “Ni Herodia jonao ayam tsünoi!”

⁵Nai Herodüh apa loatao aiu, lüko Yihudahai lon hat, tiautenai ngüsoüh Yohan nung E-po tsak ta vesankü noiküla.

⁶Lüko tilai Herod chettsün ajekhaiu saujikan, Herodia thso menyiuthso nou hoi khako jih hangten, nungko Herod thatü monglingatkü

⁷“ni ti sao-e nung ngü ni hao kiu-e ta ngiomongshingkü apa tü thalo!”

⁸Apa nyiu alotsüo tsangkü menyiuthso nou ngiom, “Loteng ngü hao Alimkiutsün Yohan khaiu chio tsak ko akiu!”

⁹Nungai nokpao mongkia, lüko akamshihoi khako apaüh thalowanphe menyiuthso nou saotsünli kiuao ngiokhem kiu.

¹⁰Nungtiphe apaüh hongküta akhou tsamai noitsün Yohan khaiu taplo.

¹¹Nung Khaiu nou chio tsak ko kankü shikü menyiuthso hao kiu, naiuso apaüh nung apa nyiu dongai kankü khu.

¹²Yohan sahoiso shikü apa mia nou kankü khuküta khan; naiuso ngüsoüh khukü nung ngiongem Yisu hao chiten.

¹³Tilai Yisuüh Yohan thaiutha ngiongem nou lu, nungai apa kheng tsak ko naplokü aodangkü noitsün athang tsakai pemsa khuwan. Khaiuniahoi nou nung luloküta noksong nouso wankü apa tü hok ko thaiukü khu.

¹⁴Yisu nung kheng ainou sungnai khaiuniahoi piakü ep, naiuso apaüh ngüso thaiutha mongkiakü yangkiukü akiahoi lomeikiu.

¹⁵Ahsham taoko sahoi nou apa dongai shikü ngiom, “Aje nou saowaniu naiuso nung aodangkün athang noin. Khaiuniahoi nouso nokai napkü ngüso eheshiu tuhloau lüwonan-i.”

¹⁶Lüko Yisuüh thashin, “Ngüso khuaoto tsünoi, asamüh ngüso hao eheshiu lükiu!”

¹⁷Naiuso ngüsoüh thalan, “Samüh nungai themtsai pungo naiuso ngou nou nimelu taim,”

¹⁸Nai Yisuüh ngiom, “Nungso jü dongai kankü ashi.”

¹⁹Apaüh khaiuniahoi nou khengliu chiai moknoi-i, küta themtsai pungo naiuso ngou nime nou semkü, aün nai thapsankü Goa hau nianlom kiu. Apaüh themtsai nou lopekkü sahoi hao kiu, naiuso sahoi nou khaiuniahoi hao sonkiu.

²⁰Khaiunia pungkü nou mongtsamkü hekütün phiai sahoi nousoüh apoi anelangthso, nou kim chekü nime miankü lokamshin.

²¹Nung hetsünso nyiuhai si methsohai tsüvehakü, pohailu nai heng pungo noiküla.

²²Nungai Yisuüh sahoi nouso khengnai naplo-ikü apa khako khiamnok etsai hongan, naiuso hoi nouso wonan-in.

²³Apaüh khaiuniahoi nou wonan-iküta king nai misao ao pemsa sung. Ahsham saujikan nai, apa pemsa nungai noiküla.

²⁴Nung taoko to kheng nou khiamnok awem nai khiampek nou haiuhaiukeikü noiküla, tititenai ahsheih nou kha ainou shin.

²⁵Waio ko taonai Yisu apa sahoi dongai khiamnok chinai keikü shin.

²⁶Tilai sahoi nousoüh apa khiam chinai tsakeitsün ep, ngüso hatkü, “Nung eanhai onthso!” ta sang asong nou vekü ngiom.

²⁷Nungailu Yisuüh ngüsoko chitekü ngiom, “Mong songkü lüthe! Nung Ngo kha; Lahat!”

²⁸Nai Peterüh ngiom, “APAOU, nung atsüoting ni naito, ngü adongai khiam chiai shiao angio.”

²⁹Yisuüh thalan, “Ashi!” Nungtiphe Peter kheng ainou shikü, Yisu dongai khuao khiam chiai tsakeikü shin.

³⁰Lüko Peterüh asheih nou sheitsün epnai hatkü, apa khiam kheiai napao yachu, nai vekü ngiom, “APAOU, ngü akipsan!”

³¹Nungailu Yisuüh apa phaüh Peter thaloküta ngiom, “Oh intsülu monglamtsün khaiunia! tiauta ni henyinyiji?”

³²Ngüne kheng ai sungnai, asheih nou laowan.

³³Nungai Kheng nai noitsün sahoi nousoüh apa tü amkü, ngiom, “Atsüoting ni Goa Thso nou noin!”

³⁴Ngüso khiamnok yankü khukü, Genesaret goumchi ai shin.

³⁵Nungai ngüsoüh apa ngelo, nungtiphe ngüsoüh nung shingkhannio lemkü ainou akia khaiunia chikü apa dongai niajikan.

³⁶Ngüsoüh nepeng nailu lüko athantan-i ta apa tü koja; naiuso tititso nou thantan ngüso lomeikiu.