Read Khiamniungan Naga Mat 17 Bible Online

Mat 17 - Khiamniungan Naga bible

Mat 17

¹Louknyi noiküta Yisuüh Peter, Yakob, naiuso apa nio Yohan king atsok tsakai nialokü sung.

²Ngüsoüh thapkü noinai ngüso khako Yisu shisileng li-en, apa kha aje li ou, naiuso apa sheitho nyinli thaiukü iulan.

³Nai sahoi, süme nousoüh Mosa si Elija, ne Yisu ko chitekü ep.

⁴Nungai Peterüh Yisu tü ngiom, “APAOU, sam nungko noi nai titi mei! Ni mongchio naito, ngü nungko kamnoi süme: athaiutha tsak, Mosa thaiutha tsak, naiuso Elija thaiutha tsak ta shane.”

⁵Peterüh chitekü noinai, thengmia oukü tsak ngüso khütha ai shikü nung thengmia ainou sang tsaküh ngiom, “Nung Ngü tsüojintsün Thso, sau da ngü monglengji Asamüh apa tü lüang!”

⁶Tilai sahoi nou nung lula, ngüso thatü hatatkü ngüso kha thaothiokü kau.

⁷Yisu shikü ngüso tü thankü ngiom, “Achu, hatkü lanoi!”

⁸Nungko ngüsoüh thaplunai, Yisuko sau tsühakü pemsa ep.

⁹Ngüso king ainou saotsün taoko, Yisuüh ngüso tü ngiom, “Khaiunia Thso e ainou ahkü moshikün lektso, asamüh eptsün sauhau lachite.”

¹⁰Nai sahoi nousoüh apa tü sangkü ngiom, “Naito Ngiokhem tsandetsünsoüh tiauta Elija chong shiao noin ta ngioji?”

¹¹Apaüh thalakü ngiom, “Atsüoting Elija chong shiji,” naiuso “apaüh alum khemtaiu-e.

¹²Lüko ngü asam tü ngioji, Elija shi-aniu, naiuso ngüsoüh apa tsüseisan, lüko ngüsoüh mongchiotsünli apa da chhin. Nungti Khaiunia Thso nou tü lüko ngüsoüh chhi-e.”

¹³Nungai apaüh Alimkiutsün Yohan thaiutha ngüso tü chiteji ta sahoi nou ngela.

¹⁴Tilai ngüso hoi apiateng dongai laokü saom, khaiunia tsak Yisu dongai shikü kaukü ngiom,

¹⁵“APAOU, jü thso tü atsüojin! Tititenai apa tü waiochiokia sunkü angjaji, naiuso apa piakü jam innai, naiuso khiam nai loithioji.

¹⁶Ngü asahoi dongai nialükhunküla, lüko ngüsoüh apa lomeikiuao tsüshio.”

¹⁷Yisuüh thalakü ngiom, “Oh amonglam tsünoikün naiuso atsüotsüdekünai tsakeitsün vetao! Ngo asamko tilektso noi-e? Ngo asamko tilektso jeilu-e? Apa nungai jü dongai niakü ashi!”

¹⁸Yisuüh angei onthso tü thut, naiuso angei onthso apa ainou shikhuwan; naiuso methso nou nungailu meila.

¹⁹Nungai sahoi nou apa dongai nyankü shikü ngiom, “Samüh nung angei onthso komanao tiauta tsüshio?”

²⁰Nai Yisuüh ngüso tü ngiom, “Asam amonglam tsükong nou shioko,” “Atsüoting ngü asam tü ngioji, asam tü amonglam oukong nou kianjim ou chantso lüko noinaito, asamüh nung king tü, ‘Nung ainou lükhu ta ngionai nung khu-e!’ Naiuso asam thaiutha tsüshiokü ti tsünoi!”

²¹Apaüh ngüso tü ngiom, nungtin to misao naiuso keithon misao tü simkü ti in nou lüko tsüshio!

²²Tilai sahoi nouso apem Galil nai kamshin, Yisuüh ngüso tü ngiom, “Khaiunia Thso apa loatanao nouso phamongko janthiowan-e.

²³Ngüsoüh apa luate, lüko samnyi nouko apa ahkü shi-e.” Nai sahoi nouso thatü mongkiakü iula.

²⁴Tilai Yisu naiuso apa sahoiso Kapernaum ai shin. Amkham tsam thaiutha liukim shitsünso Peter dongai shikü sang, “Asam tü tsandetsün nou Amkham tsam thaiutha liukim kiujimo?”

²⁵Peterüh thalan, “Kiuji.” Tilai Peter tsamai nap Yisuüh chong apa tü chitekü ngiom, “Simon, ni ti yangji? Goumchi nokpaohoi nou liukim nou sauhai ainou louji? Gohpao nouso ainou süne, gohmao khaiunia hai ainou?”

²⁶“Gohmao khaiunia hai ainou” ta Peterüh thala. Yisuüh apa tü ngiom, Naito, “gohpao nousoüh akiuao tsünoi.

²⁷Lüko asamüh nung khaiuniahoi mongmat-iao tsü-aiu. Nungtiphe ni khiamnok nai lükhu, küta ngou tai aou nou lüyakthio. Ngou taison nou aya nai ti ngou ni taisan-e ni apa son longek nai tangka tsak eppe; nung Jü Amkham tsam thaiutha naiuso athaiutha saiu-e. Nung je nemtso thaiutha ngüso hao liukim lükiu.”