Read Khiamniungan Naga Mat 18 Bible Online

Mat 18 - Khiamniungan Naga bible

Mat 18

¹Nung taoko sahoi nou Yisu dongai shikü, “Aün nokshing nai sau asongting?” ta sang.

²Nai Yisuüh methso tsak apa dongai jonshiküta ngüso khako taiu,

³kü ngiom, “Ngü asam tü atsüoting ngioji, asam phoklekü methso khekkü tsüiulakü naito, asam aün nokai tilaitso tsünappe.

⁴Nung methso khekkü sau chija henlushikü iula-e, apa aün nokai asongting.

⁵Naiuso jü nian thaiutha sauüh nungtin methso tsak lou-e apaüh ngo louji.

⁶“Ajantsoüh ngo da monglamtsünso ehenting ongko tsak lüko amonglam mowanikü iula-inai, nung khaiunia thaiutha to sang nai lungpon tsak phankü khiamnok nai sathiowan chen.

⁷Khaiuniahoi amonglam mowaniao chhitsünso thaiutha inyate! Nungtin chhi asaita thawao-e lüko nungtin chhi losantsün khaiuniahoi thaiutha inyate!

⁸Apha tsüdekünai ohok nou ni amonglam lothenai, nung ni ainou hesanküta lüwan! Pha nime tsüdekünai hok nime pokü inheeng nai nappantsün koto, pha tsüpungkü tsüdekünai hok tsüpungkü aa nai khunaibao chen.

⁹Naiuso aniovei nou ni amonglam lothenai, nung kunsankü lüwan! Niovei nime pokü inheeng nai nappantsün koto, niovei tsaklu pokü aa nai khunaibao chen.

¹⁰“Asamüh nung ehentsohoi lüko tsüvesankü tsükankeiao lütsüolo. Ngü asam tü ngioji, ngüso hongthonhoi asaichi aün nai Jüpo dongko noiji.

¹¹Tititenai Khaiunia Thso amowan nou yamao shin.

¹²Asamüh titi yangji? “Khaiunia tsaküh onnemok tsom tsak taiukü, nung ongko tsak ian nai, asamüh ti yangji? Apaüh aolükaokü lükao nou taiukü a-iantsün tü yamao king nai khuji.

¹³Tilai apaüh nung eplouji, ngü asam tü atsüoting ngioji, aolükaokü lükao nouko naito nung i-an eploshitsün tü tekkü monglingji.

¹⁴Nung khekkü ngüso ehen nouso ongko tsaklu lüko mowan-iao aün nai noitsün asam Poüh tsüaiu.

¹⁵“Adeisianioüh athako angei sunnai, lükhu naiuso aje jetko apa tü aphio lühan. Lüko nung aje jetko tengkhaiu lüchhi. Apaüh angio angnaito ni apa shiolo-iu.

¹⁶Lüko apaüh ni tü tsüang naito niko khaiunia tsak si nime lüha-i, ‘nungtiphe mi apem mitha nime süme nou lothame’ ta asiongio nou ngioji.

¹⁷Apaüh ngüso tü tsü-ang naito, nung apem donthehoi hao lüchite, naiuso athon nai apaüh donthe hai ngio tsü-ang naito, apa akhako thengshiu haili tsüdekünai gohmai shitsünsoli lütaiuwan.

¹⁸“Ngü asam apem tü atsüoting ngioji: asamüh goumchiko tilüsong ke-e, nung aün nai lüko ke-e, naiuso asamüh goumchiko tilüsong sok-e, nung aün nai lüko sok-e.

¹⁹“Loüh ngü asam tü ngioji, goumchiko asamüh kojatsün nai nime lüko mongtsakli iula nai, nung aün nai noitsün Jüpoüh asam thaiutha chhi-e.

²⁰Tititenai nime tsüdekünai süme tiai jü nianko kamshikü noin, nungai ngo ngüso ongko noin.”

²¹Nungai Peterüh shikü Yisu tü ngiom, “APAOU, jü deisinioüh jü thako aphio sunnai, ngü apa hao titso jam wankiu-e? Chinyat jam süne?”

²²Yisuüh apa tü ngioji, “Chinyat jam ta ngü ni tü tsüngio-e; lüko aochinyatjam chinyat saokü.”

²³“Tiautenai aün nokshing nokpao tsaküh apa tsamki nouso chai veluao aiutsün khekkü noin.

²⁴Tilai apaüh veluao yachu, tangka süngan tsom che laiutsün khaiunia tsak apa dongai nialokü shin.

²⁵Lüko athamshiao ti tsütaiu shioko apa, tsammongnyiu, thsohai naiuso jengtsaiu apem jankü thamshiao apa tsampao nou ngiom.

²⁶Nungtiphe tsamki nou tsampao khako kaukü amkü ngiom, ‘APAOU, ngü tü lamongthonkü ataiu, ngü apem thame!’

²⁷Nungtiphe tsampao nou tsüojinkü yangkü ta, apa tü chailaiu nou wankiukü khu-i.

²⁸“Lüko nung tsamki nou kamai khukü, apaüh tangka apai tsom tsak thatso chailaiu laiutsün hai tsamki tsak phetekü, thaloküta sangnai thipkü ngiom, ‘Ni chailaiu noi nou akiu!’

²⁹Nungai apa hai tsamki nou kaukü ngiom, ‘Ngo tü lamongthonkü ataiu, naiuso ngü thamshi-e!’

³⁰Lüko apaüh tsüang; nungliko apaüh mothamshikün lektso apa akhou tsamai thiowan.

³¹Tilai apa hai tsamkihoi nou nung chhitsün lula, ngüso thatü mongmatkü, ngüso nokpao dongai khukü, apaüh chhitsün alum chiten.

³²Nungai tsampao nou apa jonthiokü ngiom, ‘Ni tsümeikün tsamki!’ Ni ngo ta kojaphe; athamshiao noitsün ngü apem wankium.

³³Naito ngü nita titi tsüojin, nungti ahai tü lüko ni tsüojinao noiküla’

³⁴Nungai nokpao thatü mongmat sungkü akiuao taiu nou apem mothamkün lektso akhou tsamai angja kiukü hao apa thumkü kiuwan.

³⁵“Nungti asam khaiunia pungkü nou meshen deisinio tü mongai aphio tsüwankiu naito, aün nai noitsün Jüpoüh lüko asam tü tsüwankiu-e” ta Yisuüh philo.