Read Khiamniungan Naga Mat 2 Bible Online

Mat 2 - Khiamniungan Naga bible

Mat 2

¹Nokpao Herod vetaoko Yihuda ai noi nou Betlehem nai tilai Yisu Khrista chet, ajepek ainou a-nge khaiuniahoi Yirusalemai shikü ngiom,

²“Yihudahai nokpao chetkü noi nou tai noin? Tititenai samüh ajepek nai apa kianthsüo ep, naiuso apatü amkhamao sam shin,”

³Nung luküta Herod naiuso apako hakü Yirusalem hai chikü lekkat.

⁴Apaüh Yihuda hai atengting meson nouso naiuso ngiokhemtsandetsünso chikü jonkamkü, “Khrista tiai chete” ta sang.

⁵Ngüsoüh apatü thalan, “Yihuda ai noi nou Betlehem nai chette, tititenai E-pohoi nou nungti satkü taim:

⁶‘Ni Yihuda goumchiko noi nou Betlehem, Yihuda nai noknio asonghoi ongko ni ehentingau to tsüthe-e; tititenai jü khaiunia Israel niaao, ni ainou nokpao tsak sunge.’”

⁷Nungai Herodüh a-nge khaiunia nouso akao ai jonlokü kianthsüo nou tilai sung nung tsangsheikü sanglo.

⁸Naiuso apaüh ngüso Betlehem ai nungti ngiokü hongan: “Lükhu naiuso Methso nou ta tsüokü lüyam; naiuso ngü lüko shikü apa da amkhamao thaiutha tilai asamüh apa eppe, jü dongai ngio nou kankü ashi.”

⁹Naiuso ngüso nung ainou pungekü khu, naiuso athaplu, ngüsoüh ajepekai eptsün kianthsüo nou methso noitsün dongai moshisaokün lektso ngüso khako khun.

¹⁰Naiuso ngüsoüh tilai kianthsüo nou ep, ngüso amongling asong nou mian.

¹¹Naiuso ngüsoüh lai tsamai napkü apa nyiu Mari ko methso nou ep, ngüsoüh kaukü apa tü amkham, naiuso jengtsaiu tsan nou soksankü ngüsoüh apa hao chaiou lakkeng, thangkoinek, naiuso anganyam nyamtsün paopei nouso kiu.

¹²Naiuso Herod dongai phoklekü tsükhukü hao miamian nai Goa nou lotsüophe ngüso yam amao ai meshen goumchi ai ya-an.

¹³Ngüso ya-an küta APAOU aünhong nou Yosep dongai miamian nai shikü ngiom, “Achu küta methso si nyiuhai nou nialoukü Ijip goumchi ai lükhuwan, naiuso ngo nitü lükhuwan ta mongiokün chikü nungai lünoi, tititenai Herodüh methso nou loatao yam-e.”

¹⁴Nungai apa chuküta methso si nyiuhai nou ahnya taoko nialokü Ijip ai khuwan.

¹⁵Nung E-po nou tsangkü “Ngo jü Thso Ijip goumchi ainou jon,” ta ngiotaiutsün shinapao thaiutha Herod mo-ekün chikü apa nungai noi.

¹⁶Tilai Herodüh a-nge khaiuniahoi nou apa khonatiu ta ngehen apa thatü mongmat, naiuso ngüsoüh kianthsüo eptsün atao chite taiutsün tü lilukü Betlehem naiuso nung lemkü noitsün chenpa nai melothso pon nime nai yakü nung khemai nouso apem loatao apaüh ngiokhem kiukü hong.

¹⁷Nungti E-po Yiremiaüh,

¹⁸“Rama ai miashap shaptsün sang tsak lula, Rachelüh meshen thsoso thaiutha shapji naiuso ngüso tsünoiphe apa adangao tsü aiu.” Ta ngiotaiutsün nung shinap.

¹⁹Herod eanküta aünhong nou Yosep dongai Ijip nai miamian nouko shikü ngiom,

²⁰“Achu küta methso si nyiuhai nou nialoukü Israel goumchiai lüya, tititenai sauhaiüh methso aa nou ta yamkü noila ngüso eaniu.”

²¹Nungai Yosepüh methso si nyiuhai nou nialoukü Israel goumchi ai tsaloukü yashin.

²²Lüko Yihuda ai Arkeleoüh meshen po liko nokshing shingji ta Yosepüh lulanai apa nungai khuao hatkü noiküla. Apa tü miamian nai Goa nou lotsüophe Galil ai phoklekü khukü

²³Nazaret ta jontsün noksong tsak nai kih. Nungti e-pohoi nou “Apa tü Nazarene ta jone” ta ngiotaiutsün shinap.