Read Khiamniungan Naga Mat 20 Bible Online

Mat 20 - Khiamniungan Naga bible

Mat 20

¹“Aün nokshing nou nung khekkü noin. Atao tsakko khaiunia tsak apa sainaoshep eiu-ai chhiau thaiutha ahom beta mephaiu yam khu.

²Apaüh achhitsünso hao ajekhaiu mephaiu mai son tangka tsak tsak kiuao ngemluküta, sainaoshep eiuai ngüso hong.

³Naiuso apaüh keidang thatsünai khukü amao ajantso ti chhiao tsünoikü chaikamthang nai tsakü ep;

⁴apaüh ngüso tü ngiom, ‘Asam lüko sainaoshep eiuai lükeiha, naiuso ngü asam hao amai nou kiu-e’ Nungtiphe ngüso kei.

⁵Loüh anyiwem naiuso intso shamküta khukü nungtilu apaüh chhin.

⁶Naiuso apaüh asham thatso khukü amao ajantso tsakü epkü, ngüso tü ngiom, ‘Asam nungai tiauta ajekhaiu thum titsüo tsüchhikü tsaji?’

⁷Ngüsoüh apa tü thalan, ‘Khaiunia sauüh sam tsütuh?’ Apaüh ngüso tü ngiom, ‘Naito, asam jü sainaoshep eiuai lükeiha.’

⁸“Asham shinai sainaoshep eiupao nou meshen akhemkhutsün tü ngiom, ‘Achhitsünso lüjon, naiuso ngüso aphi ainou chong noutü thonkü mephaiu mai nou lükiu.’

⁹Naiuso asham hongtsünso shinai, ngüso khaiunia pungkü son tangka tsak tsak ep.

¹⁰Nungtiphe aya hongtsünso shinai ngüsoüh apia eppe ta yang; lüko ngüso nungtilu khaiunia pungkü son tangka tsak tsak ep.

¹¹Tilai ngüsoüh mephaiu mai ep, ngüso APAOU thako namnamkü ngiom,

¹²‘Nung aphi nousoüh ghontao tsaklu chhin, naiuso sam sauhai ajekhaiu thum tankü aje nou jektsün jeiloukü chhin, ni ngüso hao mephaiu mai samko wekü sunkiu!’

¹³“Lüko apaüh thalakü ngüso tsak tü ngiom, ‘Jü hai, ngü ni tü ti alutsao tsüshan. Ni ngüko son tangka tsak thaiutha ngemkü shin.

¹⁴Ni nou mephaiu mai lülo küta tsamai lükhu. Nung aphi nouso hao lüko niko wekü kiuao jümong.

¹⁵Jü chai tü ngü aiutsünli chhiao ayam tsütha süne? Tsüdekünai ngü mongsakü chhitsün tü ni mongetji süne?’”

¹⁶“Nungti phi nouso chongao iula-e, naiuso chong nouso phiao iula-e.” Ta ngiokü Yisuüh philo.

¹⁷Yisu Yirusalemai sungnai, sahoi chekü nime nousolu apako nialo, küta yamai apaüh ngüso tü ngiom,

¹⁸“Anglu,” “Sam Yirusalemai sungji, nungko Khaiunia Thso atengteng mesonhoi naiuso Ngiokhemtsandetsünso phamongko thumkü kiuwan-e. Ngüsoüh apa tsütsüokü hao the-ikü ean-i-e.

¹⁹Naiuso apa lochi-e, naiuso shiuh-e, naiuso paiphu nai lalutao thaiutha ngüsoüh Melemaohai phamongai thumkü kiuwan-e; lüko samnyi shamküta apa ahkü shi-e.”

²⁰Nungai Zebedi tsammongnyiu apa thsone hakü Yisu dongai shiküta amkü, tso tsak sao.

²¹Yisuüh apa tü ngiom, “Ni ti aiuji?” Apaüh thashin, “Nung jü thso ne anokshing nai niko uai tsak naiuso tsatai tsak kü noiao angiokiu.”

²²Yisuüh thalakü ngiom, “Asamüh ti in thaiutha saoji nung asamüh tsünge. Ngü sübao angja thengkam shiuao noin nung asamüh shiuao shio-e süne?” Ngüsoüh apa tü thashin, “Samüh shio-e.”

²³Apaüh ngüso tü ngiom, “Atsüoting asamüh jü thengkam ainou shiu-e, lüko ngüko uai si tsatai noiao nou ngü chokiuao ayam tsüde, lüko Jüpoüh nung sauhai thaiutha khemtaim ngüso thaiutha noin.”

²⁴Tilai sahoi amao che nousoüh nung lula, ngüsoüh adeianio nime nouta mongmat.

²⁵Nungtiphe Yisuüh ngüso apem apa dongai jonkü ngiom, “Goa tsüngekün nokshing nouso ngüso khako APAOU iulaji, naiuso ngüso asonghoi nou oukong taim, nung asamüh ngen.

²⁶Asam ongkoto nungti tsüthe-e; asam ongko ajantso asong theao aiunai, ni amao nouso yathsüoao theau noin;

²⁷naiuso asam ongko ajantso chongao theao aiunai, ni amao nouso tsamkiau theao noin.

²⁸Khaiunia Thso lüko yathsüo-iao tsüde lüko yathsüoao naiuso khaiunia piakü thaiutha apa aa kiukü shiosanao shin.”

²⁹Yisu naiuso apa sahoiso Yeriko ainou sungnai hoi asong tsak ngüso phiai hoilut.

³⁰Yam etsai moknoitsün niopek khaiunia nime nou Yisu yanlükhunji ta lulakü vekü ngiom, “Oh APAOU David thso! Sam tü atsüojin!”

³¹Nai hoi nou ngüne nyankü anoi ta thutkü ngiom: lüko ngüneüh tekkü vekü, “Oh APAOU, David thso! Sam tü atsüojin!” ta ngiom.

³²Nungtiphe Yisu laoküta ngüne jonkü ngiom, “Ngü aje thaiutha ti chhi-iao aiuji?”

³³Ngüneüh apa tü ngioji, “APAOU, ni sam hao epiao akiu ta samüh aiuji!”

³⁴Nai Yisuüh mongkiakü yangkiukü ngüne niovei nai than; naiuso nungailu ngüneüh ep, küta ngüne apa phiai hoilut.