Read Khiamniungan Naga Mat 23 Bible Online

Mat 23 - Khiamniungan Naga bible

Mat 23

¹Nungai Yisuüh hoi asong naiuso apa sahoi tü ngiom,

²“Ngiokhem tsandetsünso naiuso Farisihoi noulu Mosa Ngiokhem phoklesanau shiokü noin.

³Nungtiphe ngüsoüh asam tü tilüsong ngio-e, nung lüchhi naiuso lükankei. Lüko asamüh ngüso sakshi to lasailo, tiautenai ngüsoüh ti chimji, nung ngüsoüh tsüchhiji.

⁴Ngüsoüh tsüjeiloau keshikü khaiuniahoi sangdongkhaiu nai kanlutji, külüko ngüsoüh ngüso phakha nou lüko tsüthanhaji.

⁵Ngüso chhi apem khaiunia nou epao thaiutha chhiji. Ngüsoüh asiongio ahoi nouso khakheng nai naiuso phemtso nai asat songsongkü satkü kelutji naiuso nepeng laiulaiukü taiuji!

⁶Ngüsoüh nyung kamnai noikham amei naiuso Yihuda kamthang nai asong noikham;

⁷naiuso chaikam nai salam, naiuso khaiunia hau ‘Atsandetsün’ ta jon-iao aiuji.

⁸Lüko asam tü ‘Atsandetsün’ ta lajon-i, tiautenai asam chikü deisiniolu naiuso Atsandetsün tsaklu noin.

⁹Naiuso goumchi ko sau tü lüko asamüh ‘Po’ ta lajonsai, tiautenai asam aniakeitsün Po tsaklu nung aün nai noin.

¹⁰Tsüdekünai asam ‘Aniakeitsün’ ta lajon sai, tiautenai asam aniakeitsün tsaklu nung Messiah nou noin.

¹¹Asam ongko asongting tsak nou nung asam yathsüotsün the-ao noin.

¹²Sau meshen chija asong iula-e, apa nyapjikane, naiuso sauüh meshen chija nyaplokü iula-e, apa losonge.

¹³Asam Ngiokhem tsandetsünso naiuso Farisi akaosai nouso inyate! Tititenai asamüh aün nokshing ai nappao khaiunia kiapji,

¹⁴lüko asam meshen chija lüko tsünap, tsüdekünai anapao kowetsünso lüko tsünapiji.

¹⁵“Asam Ngiokhem tsandetsünso naiuso Farisi akaosai nouso inyate! Asam akausai nouso! Asamüh khaiunia tsak nou Yihudahai iula-iao thaiutha khiamnok naiuso goumchi lemkü tsakeiji, naiuso tilai asamüh apa shioloji nai asamüh apa inheeng nai müjam nappao maikü asam khekkü shankiuji!

¹⁶“Asam niopek niakeitsünso inyate! Asamüh tsandeji, ‘Ajantsoüh Amkham Tsam tsangkü ngiomongshing shannai, nungüh apa tsükejei, lüko asamüh Amkham Tsam ainou chaiou thaiutha ngiomongshing naito, nung khaiunia kejeikü noin.’

¹⁷Asam niopek maingahoi! Chaiou süne chaiou chaithio siokü iula-itsün Amkham Tsam asongting?

¹⁸Loüh asamüh tsandeji, ‘Ajantsoüh amthang tsangkü ngiomongshing naito, nungüh apa kejeikü noin.’

¹⁹Asam titithatso niopek! Paopei süne paopei siokü iula-itsün amthang atengting?

²⁰Nungtiphe tilai khaiunia tsaküh amthang nianko ngiomongshing shanji, apaüh paopei tsangkü ngiomongshingji nungko noitsün paopei saokü shanji;

²¹naiuso tilai apaüh Amkham Tsam tsangkü ngiomongshingji, apaüh Amkham Tsam nai kihtsün Goa tsangkü ngiomongshing shanji.

²²Naiuso tilai ajantsoüh aün tsangkü ngiomongshing shanji, apaüh Goa noikham nai noitsün tsangkü ngiomongshing shanji.

²³Ngiokhem tsandetsünso, naiuso Farisi akaosai nouso inyate! Asamüh laosang, chong pühio naiuso angannyam ekve chaithio Goa hau kiuji, lüko Ngiokhem nai noitsün atengting chhi, apentsün ngio, atsüojinyang, naiuso saithamong, nung tsüchhikü wananji. Asamüh nungso chhiküta lüko amao nou tsüchhikü to tsüwanao noiküla.

²⁴Niopek niakeitsünso! Asamüh thengkam nai chinyi nou tensanji, lüko ut to mioli-anji!

²⁵Asam Ngiokhem tsandetsünso naiuso Farisi akaosai nouso inyate! Asamüh thengkam naiuso chiu achiai haiuwanji, lüko akheiai mewop naiuso thengtok nou miankü noin.

²⁶Niopek Farisihoi! Aya nai thengkam naiuso chiu akheiai lühaiuwan, nungüh achiai lüko yanthsüo-e!

²⁷Asam Ngiokhem tsandetsünso naiuso Farisi akaosai nouso inyate! Asam etam athaiu khekkü noin, achiai athapao aleng amei, lüko akheiai eanhai ou naiuso achinyan alumüh miankü noin.

²⁸Nungti acheiai asam lüko khaiunia pungkü khako asioli, lüko akheiai asam akaosai naiuso Ngiokhem lotheantsün nou miankü noin.

²⁹“Asam Ngiokhem tsandetsünso naiuso Farisi akaosai nouso inyate! Asamüh E-po nouso thaiutha etam aleng meikü shanji, naiuso sauhai aa amei nai kihkü shin nungso ii aleng meikü shanji;

³⁰küta ngioji, ‘Sam paosipo vetaoko sam kitünto, E-po luattsün nai sam tsüha-ela.’

³¹Nungtiphe asamüh asam chija asam e-po luattsün thsoso ta tsangshei kiuji.

³²Naito khuküta asam paosiposoüh yachutaiu nou lüchhikheman!

³³Asam paosipo nouso naiuso pao thsoso! Asam titi thekü inheeng ainou thakhu-e ta yangji!?

³⁴Nungtiphe ngü asam tü ngioji, ngü asam dongai e-po nouso, a-nge khaiunia nouso, naiuso atsandetsünso honge, asamüh ngüso ajantso luat-e, amao ajantso paiphu nai lalutte, ajantso ta Yihuda kamthang nai shioh-e, naiuso nok tsak ainou tsakai ta ngüso tü kumkei-e.

³⁵Asio khaiunia Abel luat nai yanou asio khaiunia Berakia thso Zakaria, asamüh sau Amkham Tsam si amthang jetko luat, nung angja kiutsün amai asam chiai shi-e.

³⁶Atsüoting ngü asam tü ngioji: nungso loattsün chikü thaiutha angja apem nung vetao khaiunia nouso ta shinappe!

³⁷“O Yirusalem, Yirusalem! Ni E-po nouso luat, naiuso adongai Goa ngiongem kantsünso lung nou yakkat! Waio anyiu nou apa thsoso meshen ekok khemai nialoukü pokjeitsünli ngü titsojam athsoso aikü niakamao aiu, lüko ni tsümongchio!

³⁸Nungtiphe, asam Amkham Tsam aodangkü naiuso akeng lean-e.

³⁹Tititenai ngü asam tü ngioji, ‘APAOU nianko sau shiji, apa lülomsan,’ ta asamüh mongiokün lektso, lo yakü asamüh ngo tilaitso tsüepshi-e.”