Read Khiamniungan Naga Mat 24 Bible Online

Mat 24 - Khiamniungan Naga bible

Mat 24

¹Yisu Amkham Tsam letaiukü khukü noitsün taonai, apa sahoisoüh nung Tsam lataiutsün tü apa hau yanglu-iao apa dongai shin.

²Apaüh “Ah,” “asamüh nung chikü tü meikü lüthap ta ngiom, Ngo asam tü nung ngioji: nung athang nouko lung tsak chiai lungpem tsak lüko sanlutkü poikü tsünoi-e.”

³Yisu Olip King ai moknoinai, sahoi pemsa shikü ngiom. “Ni goumchi ai shitsün athon atao nou naiuso vetao athon nouso tilai shinappe, sam hao achite.”

⁴Yisuüh thalakü ngüso tü ngiom, “Sauüh asam atsüo tsüdekünai tsünialükhunan-iao lütsüolo.

⁵Tititenai jü nianko piakü nou, ‘Ngo Khrista!’ ta chitekü shi-e, naiuso piakü atsüotsüdekünai nialükhune.

⁶Naiuso asamüh ehlitsün ngiolat naiuso ehli sungao angem nou lu-e, lüko asam tsülekkatao lütsüolo, tititenai nung shinapao noin, lüko nungto athon ta tsüde.

⁷Tititenai shingkhannio nou shingkhannio thako, nokshing nou nokshing thako ehli tsalou-e, naiuso ajantso-ai naiusile naiuso gohhaiu noi-e.

⁸Lüko nung chikü aangja ao ayachu.

⁹“Nungai ngüsoüh asam angja omhe-iao janheane, naiuso loat-i-e, naiuso jü nian thaiuthako apem nou asam lon chinyane.

¹⁰Naiuso piakü nou nung taoko amonglam lean-e, ngüso tsaküh tsak janhe-e, naiuso tsaküh tsak lon chinyan-e.

¹¹Naiuso atsüotsüdekün E-po piakü sunge, küta khaiunia piakü atsüotsüdekünai nialükhun-e.

¹²Naiuso tsümeikün shingjikan nou shioko, khaiunia piakü atsüojin tangshepkü iula-e.

¹³Lüko sauüh athon saoko jeilu-e apa kipsane.

¹⁴Naiuso nung Aün nokshing thaiutha Ngem Amei goumchi apemai shingkhan apem tü atsangshei mitha ao chime; küta athon shi-e.

¹⁵“E-po Danielüh ‘Alekkatao Angja’ ta ngiotaiutsün nung asamüh asiothang nai tsakü eppe” (Sauüh veji: nung ti tü ngioji apaüh lüngelo!)

¹⁶“Nungai Yihuda nai sauhai noin king nouso ai khuloau noin.

¹⁷Sau tsamkhaiu nai noin apa tsamai taiu nou jengtsaiu louao lasao.

¹⁸Naiuso sau eiu-ai noin apaüh apa ne louau laokü layashi.

¹⁹Lüko nung vetao nouko pemtsükengkü noinso naiuso nyao chepitsünso thatü ayangelatao tsak noi-e!

²⁰Asam khuwantsün nung chongtao tsüdekünai Yihuda Anounyi tsülathakü hao misao lüsao!

²¹Tititenai nungai aangja omhe asong apung anyim ainou losaokü nouko nungti tsünoikün atsaoting thawao-e. Naiuso nung khekkü loüh tilaitso tsünoishi-e.

²²Lüko Goa ajekhaiu haove nouso lothsaowaniu, nung ajekhaiu tsülothsaokiu tünto, khaiunia sau tsükipsanela, lüko apa achosanhoi nouso thaiutha Goa nou nung ajekhaiu lothsaokiu-e.

²³“Nungai khaiunia ajantsoüh asam tü, ‘Athaplu, nungai Khrista noin!’ tsüdekünai ‘khukü noin!’ ta ngionai, nung atsüo ta layang.

²⁴Tititenai atsüotsüdekün Khrista hoi, naiuso atsüotsüdekün E-po nouso sunge, naiuso shio naito, asiohoi lüko atsüotsüdekünai nialoao thaiutha ngüsoüh ii asong naiuso athanga han-e.

²⁵Anglu! Ngü asam tü atao nou khako nung ngiowaniu. Tsüdekünai ajantsoüh ‘Apa singtso goh nai noin’ ta ngionai naiuso

²⁶“‘Athaplu, apa tsampai mongnai noin ta ngionai, nung atsüo ta lamonglam!’

²⁷Tititenai ajepek ainou ajenap saokü ahsalap laptsün epji, nungti Khaiunia Thso shitsün noi-e.

²⁸“Tilüsongai miadom noi-e, nungai Letchehoi aikü kamjikan-e.

²⁹“Nung angja omhe ajekhaiu thonjikannai, aje nou nyakheme, alei nou meshen awon tsükiushi-e, maou ainou kianthsüo nouso sali-ane, naiuso maou nai oukong nouso haiuhaiu-e.

³⁰Nungai maou nai Khaiunia Thso ii sunge, naiuso ngüsoüh Khaiunia Thso thengmia chinai oukong naiuso ajinka asong nai shitsün epnai goumchi khaiunia apem nou kong nai lahkü shape.

³¹Naiuso Jangongmat ngem asong nou mate, naiuso apaüh meshen aün honghoi nouso aün athon tsak ainou tsakai saokü hongkü, anopüle ainou meshen achosanhoi nialo-e.

³²“Latpai ainou athatlu ngio lüngelo: tilai paisun akia iulakü ashah sungji, nungai asamüh asaiu shimkü noin ta ngeji.

³³Nungti, asamüh nung athawaotsünso apem epnai, apa koukhan dongko shimkü noin ta lüngelu.

³⁴Atsüoting ngo asam tü ngioji, nung apem moshinapkün lektso nung vetao tsüyanlükhun-e.

³⁵Aün naiuso goum yanlükhune, lüko jü ngio tsüyanlükhone.

³⁶“Nung ajekhaiu naiuso atao thaiutha Po nou chiai aünhonghoi nou lüko, Thso nou lüko, sauüh tsünge.

³⁷Noa, vetao titi noila, nungti Khaiunia Thso shitsün lüko noi-e.

³⁸Tititenai shelei moshikünai, naiuso Noa khengnai monapkün lektso, khaiuniahoi nou heshiukü, naiuso tsamsigoh yangekü noiküla,

³⁹naiuso shelei shikü ngüso khiam nou thumkü molimlowankün lektso ngüsoüh tsünge. Nungti Khaiunia Thso shitsün taoko noi-e.

⁴⁰Nung taoko khaiunia nime eiu-ai chhikü noinai, tsak nialokü khuwane, naiuso tsak nou poian-e.

⁴¹Nyiuhai nime tham thaokü noinai, tsak nialokü khuwane, naiuso tsak nou poian-e.

⁴²Nungtiphe thsümonkü lünoi, tiautenai ti ajekhaiu ko asam APAOU shi-e asamüh tsünge.

⁴³Lüko nung lüngelo: tsampao nou ti taoko kao nou shi-e, nung ngetünto, apaüh jimkü noi-ela naiuso apaüh meshen tsam tsüchisati-ela.

⁴⁴Nungtiphe asam lüko khemlokü lünoi, tiautenai asamüh tsüyangkün atao tsakko Khaiunia Thso shi-e.

⁴⁵“Nungaito monglamtsün naiuso ahaopungtsün tsamki nou sao? Apa to meshen tsampaoüh amao tsamkihoi hao atao ko chihsikhiam waoshenao taiukiutsün noin.

⁴⁶Apa tsampao shinai, tsamki sauüh nungti chhikü eppe, apa thaiumei!

⁴⁷Apaüh taiu nou apem khaiuko tsampao nou nung tsamki athaisanao the-i-e, ta atsüoting ngü asam tü ngioji.

⁴⁸Lüko apa tsümeikün tsamki naito tsampao piamkü tsülao-in-e ta meshen mongai ngio-e,

⁴⁹naiuso meshen hai tsamkihoi da shioao yachukü, thengtuk haiko heshiu-e.

⁵⁰Nung tsamki ün tsampao apaüh tsüngekün naiuso tsüyangkün atao tsak ko shi-e.

⁵¹Tsampao nou apa nelangkü hethat-e, naiuso apa haoson akausaihoi nouko sonkiu-e. Nungko apa hou jei-ekü shape.